راجس

122

رازي ألتفت على راجس يطالع ونظرت الذنب وراجس منزل راسه كانت كفاية عشان رازي يفهم انو كلام انس حقيقي !

رازي رجع يطالع في انس
- ك .. كيف !

انس ابتسم وهو يتحرك من المكتب
- انولدنا سوا .. بس .. انا كنت قليل الحظ الا لحقت الممرضة تعطيني لشخص ثاني .. بينما انت ..

كشر انس وهو يطالع رازي من فوق لتحت
- انت الا ظليت بحضن امك .. مو لفترة طويلة اصلا بس يعني .. جلست كفاية لدرجة انك صرت مرة حساس

رازي بلع ريقه وهو يطالع انس
- ما .. ماني فاهم

انس قلب عيونه بانزعاج وهو يمسك ثقالة الورق الا فوق مكتب سلطان والا كانت زي الكورة بس فيها شوية وزين وبدأ يحركها في يده
- امنا .. بس انا احب اقول امك لانها ما ترتقي عشان تصير ام ليا .. كانت خاينة ..

رازي عقد حواجبه وكشر
- حدك !

بس راجس مسك يد رازي اللي ألتفت وطالع راجس وزعق فيه
- كيف يعني خاينة !

راجس بلل شفايفه
- ما عرفت .. الا بعد وفاتها .. عادل انهار وقالي كل شي .. كل شي

رازي مسك كتف راجس يزعق فيه
- ايش هو الا كل شي ! .. ومن .. من سنين وانت ساكت ! .. عمرك ما فكرت تقول للبهايم الا هنا ؟! ..

راجس فز وغمض عيونه
- مو كذا ! .. ايش اقولكم ؟! .. امي الا تونا دفناها خاينة وكانت تنام مع واحد غير ابونا وهيا على ذمته !

رازي سكت للحظة وهو يربط الخيوط
- ر .. راشد قال .. انو مو اخونا .. انو مو .. مو من نفس الاب يعني ..

راجس فتح عيونه بصدمة
- ر .. راشد يعرف !

انس صفر وهو يكمل لعب في الكورة
- واو .. اخوانك ما طلعوا بالغباء الا توقعته راجس !

راجس زعق في انس
- عمري ما قلت انهم اغبياء ! .. وبطل تخرب كل شي بكلامك !

انس قلب عيونه بينما رازي بدأ يطالع في راجس وانس .. حتى طريقة تعامل راجس معاه تخلي رازي يفهم انو علاقة ذا الغريب الا المفروض يكون اخوهم براجس طويلة وعميقه مو شي فجأة اكتشفه راجس ..

رازي رجع خطوة لورى .. هل هما عيال عادل ؟ .. هل راشد هو الولد الوحيد لأبوهم عشان كذا كان تحليله مختلفه ؟!

راجس مسك يد رازي وتكلم بشويش
- خليني اشرحلك

رازي رفع عيونه يطالع راجس
- مين .. مين عشيقها ؟ .. ع .. عادل ؟!

انس صفق
- واو .. خليتين دماغه شغالة !

راجس كشر في وجه انس ورجع يطالع رازي وهز راسه
- كانو .. حبايب .. قبل ما ابونا يتزوجها

رازي فز للحظة
- ابونا ؟.. هل .. هل احنا عيال .. عادل ؟!

انس ضرب راسه بيأس
- اسحب كلامي طلع عنده خلية وربع !