Secret Commando [ Zawgyi + Unicode ] Completed

Chapter ( 45 ) *

ပြတင်းပေါက်က တစ်ဆင့် မျက်နှာပေါ် ဖျာကျလာတဲ့
နေအလင်းရောင် ဖျော့ဖျော့ ကြောင့် ရဲတေဇ
နိုးလာတယ်။ ဘေးဘီကို ဝေ့ကြည့်တယ်။
အခန်းက ကိုယ့်အခန်းမဟုတ်။ ဒီလိုဆို သေချာပြီ
သူ ရောက်နေတာ  မာန်ခရဲ့ အိမ်။

သူ တစ်နှစ်တစ်ခါ မူးလာတိုင်း မာန်ခအိမ်ရောက်လာမယ်။ စကားတွေ ဗလုံးဗထွေးနဲ့
သေသွားတဲ့ အဖေ့အစား တောင်းပန်စကား ပြောမယ် ။ ဒါ နှစ်တိုင်း တစ်နှစ်တခါ သူ လုပ်နေကျ ။
အသိစိတ် ပျောက်လုမတတ် မူးနေပေမယ့်
သူ့အဖေက မာန်ခရဲ့ အမေကို သတ်ခဲ့တဲ့ သူပဲ ဆိုတဲ့ စကားကိုတော့ မပြောရဲခဲ့။ မပြောထွက်ခဲ့ဘူး ။
တကယ်လို့ အဖြစ်မှန်တွေကို မာန်ခသိသွားရင်
သူ့ကို တစ်သက်လုံး မုန်းသွားလေမလား။
အဲဒီ အတွေးက  ရဲတေဇ ဆိုတဲ့ သရဲဘောကြောင်တဲ့ ကောင်ကို ဒီနေ့ဒီချိန်ထိ ခြိမ်းခြောက်နေလျက်ရှိတယ်။

သူ အခန်းပြင်ကို ထွက်လာခဲ့တော့ breakfast စားပွဲမှာ ထိုင်နေတဲ့ မာန်ခနဲ့ တွေ့တယ်။

'' အော် . . ကိုရဲတေဇ နိုးလာပြီ ´´

'' အင်း ´´

'' ကျွန်တော် ဦးလေးကြီးရဲ့ နှစ်ပတ်လည်နေ့ကို သတိမေ့နေမိတာ ။
တကယ် တောင်းပန်ပါတယ် အကို ။
အဲတာကြောင့် မနက်စောစောစီးစီး ထပြီး ကုသိုလ်ကောင်းမှု တချို့လုပ်ပြီးပါပြီ ´´

ရဲတေဇ ရင်ထဲ နင့်ခနဲ ဖြစ်သွားတယ်။
မာန်ခရယ် . . ကိုယ့်အမေကို သတ်ခဲ့တဲ့ လူသတ်သမားမှန်း မသိဘဲ အဲလူအတွက် ကုသိုလ်ကောင်းမှု တောင် လုပ်ပေးနေတယ်နော်။ မာန်ခကို အကြောင်းစုံ ဖွင့်မပြောဘဲ ထားထားတာ တမင်  ရက်စက်မိသလိုများ ဖြစ်နေပြီလား ။ တစ်ခါတလေ မာန်ခ ကိုယ့်ကို  ကြိုက်သလောက်သာမုန်းတော့ဆိုပြီး စိတ်ပိုင်းဖြတ်ကာ  ပြောပြလိုက်တော့မယ်လို့  အရဲစွန့် ကြိုးစားမိပါရဲ့။ သို့သော် တစ်ခါမှ
မအောင်မြင် အထမမြောက်ခဲ့။

'' ရော့ သုံပုရာရေ လေးသောက်လိုက် ´´

မာန်ခ လှမ်းပေးတဲ့ ဖန်ခွက်ကို လှမ်းယူလိုက်ပြီး
မသောက်ဖြစ်သေးဘဲ . . .

'' ဟို . . မာန်ခ မနေ့ က ငါ မင်းကို ဘာတွေများ ဒုက္ခပေးမိသေးလဲ ´´