Secret Commando [ Zawgyi + Unicode ] Completed

Extra

မြန်မာပြည်ကနေ အပြီးတိုင်ထွက်ခွာသွားတော့မှာဖြစ်တဲ့ ဂျေ၊မာန်ခနဲ့ ပီကျူးတို့ကို ရဲတေဇ ကိုယ်တိုင် လေယာဉ်ကွင်းကို ကားမောင်းပြီးလိုက်ပို့ရတယ်။
သူတို့ ဆွစ်ဇာလန်နိုင်ငံမှာ အခြေချနေထိုင်တော့မယ်တဲ့။ သူ ဝမ်းသာပါတယ်။ ဒီမှာနေရတာ မာန်ခအတွက် အဘက်ဘက်က မလုံခြုံဘူးမဟုတ်လား။  နေသွေးက မာန်ခဟာ ဦးနေရောင်ရဲ့သားဖြစ်တဲ့အကြောင်း media တွေမှာ ဖွင့်ချလိုက်တော့ ပိုဆိုးတယ်။ ဦးနေရောင်ကြောင့် ဘဝပျက်ခဲ့ရတဲ့ လူတွေရဲ့ ဒေါသဟာ မာန်ခအပေါ် ကျရောက်လာနိုင်တယ်။ ဒီနိုင်ငံကလူတိုင်းအတွက် မာန်ခဟာ ရန်သူလိုဖြစ်လို့နေပြီ။ အတိတ်ဆိုးတွေ၊ ရန်သူတွေနဲ့  ပြည့်နှက်နေပြီး အန္တရာယ်များလှတဲ့ ဒီနိုင်ငံကနေ အခုလို အပြီးတိုင် ထွက်ခွာတာ မာန်ခအတွက် အကောင်းဆုံးပါပဲလို့ ရဲတေဇ ဖြေသိမ့်ရတယ်။

ဒါပေမဲ့ တကယ်တမ်း ခွဲခွာရဖို့ နီးကပ်လာချိန်မှာတော့ သူ့ စိတ်ထဲ အီလည်လည်ကြီးနဲ့ ဝမ်းနည်းနာကျင်လာပြန်ရော။  ပိုင်ဆိုင်ရမှ အချစ်မဟုတ်ဘူးဆိုတာ အရှုံးသမားတွေ ပြောကြတာတဲ့။ ကိုယ်ဟာ တကယ့်ကို
အရှုံးသမားပါ မာန်ခရာ။ လေဆိပ်ရောက်တော့ မာန်ခက သူ့ကိုတင်းကျပ်စွာ ပွေ့ဖက်နှုတ်ဆက်တော့ သူငိုချင်စိတ်ကိုမနည်းထိန်းထားရတယ်။ မာန်ခကလဲ မျက်ရည်တွေဝဲနေတယ်။ ဂျေနဲ့ သူလဲ လက်ချင်းခပ်တင်းတင်းဆုပ်ကိုင်လို့ နှုတ်ဆက်လိုက်ကြတယ်။

” မာန်ခကို မင်း စိတ်ချမ်းသာအောင် ထားနိုင်မယ်လို့ ငါယုံကြည်ပါတယ် ဂျေ ”

ဂျေက ခေါင်းညိတ်ပြတယ်။
ခရီးသည်‌ေတွ လေယာဉ်ပေါ်တက်ဖို့ ကြေငြာချက်ထွက်လာတော့ ရဲတေဇလဲ အားတင်းပြုံးထားရင်း
လက်ပြနှုတ်ဆက်ပြီး ထွက်လာခဲ့တယ်။
မာန်ခက ပြန်လက်ပြရင်း မျက်ရည်တွေစီးကျနေတယ်။
ပီကျူးပါ သူတို့ခွဲခွာခန်းကို ကြည့်ရင်း မျက်ရည်ဝဲလို့။ ဂျေက နှစ်သိမ့်တဲ့အနေနဲ့ မာန်ခပခုံးကိုဆုပ်ကိုင်ပွေ့ဖက်ပြီး ခေါ်သွားတယ်။
ရဲတေဇ ကားပေါ်ရောက်တော့ ချုပ်တည်းထားရသမျှ လွှတ်ချပစ်လိုက်ပြီး  ရှိုက်ကြီးတငင်ငိုမိပါတော့တယ်။

+++

” ဒိန်း ”

ရဲတေဇ ကားမောင်းပြန်လာတဲ့လမ်းမှာ
ကားတစ်စီးရဲ့ ရုတ်တရက် ဝင်ရောက်ဖြတ်တိုက်ခြင်းကို ခံလိုက်ရတယ်။
ရုတ်တရက် မူးဝေသွားတာ တော်တော်နဲ့မပြေဘူး။
အဲဒီအချိန်မှာပဲ တစ်ဖက် ကားပေါ်က လူတွေက ရဲတေဇကို ကားပေါ်က ဆွဲချကြတယ်။ ပြီးတော့ ဒူးထောက်ခိုင်းပြီး ဘေးတစ်ဖက်တစ်ချက်ကနေ လူနှစ်ယောက်က သူ့လက်မောင်းတွေကိုချုပ်ထားကြလေရဲ့။ ကားက စုစုပေါင်းနှစ်စီး။ ကားအကောင်းစား နောက်တစ်စီးထဲကနေ အမျိုးသမီးတစ်ယောက် ထွက်လာတယ်။
သူမရဲ့ ဒေါက်ဖိနပ် အနက်ရောင်ကို အရင်စမြင်ရတယ်။
မော့ကြည့်လိုက်တော့ ဒေါ်နှင်းမော်ချီ။
သူမက အနားကပ်လာပြီး ရဲတေဇ ဆံပင်ကို ဆွဲဆောင့်ပြီး မေးတယ်။