[UNDER REVISION] Sshhh....Let's Make a Secret

Chapter 3

 Maka-ilang beses ko pang pinilit na hinatak pababa ang maiksing skirt na suot ko ngayon habang nakaharap sa salamin. Pangalawang araw ko na ngayon sa pagiging secretary ni Sir Freire at sa totoo lang, di ko na talaga alam – di ko alam kung paano ba ako napasok sa ganito.

Hindi ko inaasahan na dahil sa isang di inaasahang pangyayari ay magiging secretary ako ng isang Kinnon Freire Faioli – ang Vice President ng kompanya at isa sa mga nakakataas. Ito ang parusa ko dahil sa nakalimutan kong lagyan ng Wet Floor sign ang hallway kung saan siya nadulas noong nakaraang araw. Oh gosh. Bago pa lang ako pero hindi na maganda ang encounter ko sa mga executives. Kung hindi dahil sa pagiging chismosa ay sa pagiging palpak naman, wala naman ako karapatan mag-reklamo.

Kahapon pinasadya ni Sir Freire na sa loob ng opisina niya ang maging desk ko, kung saan walong oras na nag-init lamang ang pwet ko sa upuan. Lahat pa rin ay inuutos niya sa dati niyang seckretarya na si Myfanwy sa labas. Inutusan niya lang ako na magtimpla ng kape para sa kanya at imasahe ang balikat niya. Bata pa naman itong tignan ngunit hindi ko mapigilang mabastusan sa tuwing sumusulyap ito sa akin gamit nang malalagkit niyang tingin na hindi ko na lamang pinapatulan.

Napabuga na lang ako ng hangin dahil mukhang wala nang ihahaba pa ang mini-skirt na suot ko ngayon na halos wala pa sa kalahati ng hita ko ang kayang takpan. Siguradong sa maling galaw ko ay makikitaan na ako.

Pagdating ko sa kompanya ay para akong bidang highschool girl na pinagbubulungan kapag nali-link sa campus heartthrob. Ang clichè pero hindi ko sila masisisi kung pag-uusapan nila ako, galing sa maintenance department tapos mapapabalita na lang na isang araw ay sekretarya na bigla ng isa sa mga executives. Sobrang nakaka-stress ang issue kahit anong paliwanag ang gawin ko.

Habang tinatahak ko ang daan papunta sa elevator ay nahagip ng mata ko si Bree sa gilid, abala siya sa paglilinis kaya di niya man lang ako napansin. Gusto ko sana itong batiin ngunit base sa itsura niya ngayon ay pangalawa o pangatlo ang pagmo-mop sa lobby sa listahan na binigay sa kanya ni Sir D'lo ngayong araw na mga gagawin niya at alam kong may mga susunod pa.

Dahil inalis na ako sa maintenance department kaya ang kalahati ng mga naka-toka sa akin noon ay kay Bree ngayon binigay. Hindi namin malaman kung bakit ang init ng ulo ni Sir D'lo sa kaibigan ko kaya't sa kaniya madalas ibigay ang mga gawain, ngunit hinala namin ay marahil bakla ito at may gusto kay Chino kaya't may bahid ng pagseselos ang pakikitungo nito kay Bree.

Kung ang kaibigan ko ay purgang-purga na sa araw-araw na daming ginagawa, ako naman ay buong araw na uupo lang malamang sa opisina ni Sir Freire. Which is hindi ko alam kung dapat ko bang ikatuwa.

Napabuga na lang ako ng malalim na hangin at hindi na pinansin ang bulungan sa paligid. Pagdating sa elevator at matamang naghihintay sa pagbaba nito ay maingat akong sumakay dahil bawat galaw ko ay tumataas ang maiksing skirt na suot ko na kahapo'y binigay sa akin ni Sir Freire upang suotin ngayon.

Akala ko nung una ay ako lang ang aakyat, ngunit mabilis kong pinindot ang hold button nang mamataan si President Leigh na papasok. Kahit presidente siya ay hindi siya nagpagawa ng sariling presidential elevator, kaya't akala ko nung una ay isa lamang siya sa mga empleyado dito.

Pagkapasok niya ay sa akin agad natuon ang atensyon nito. Pinanuod ko itong isa-isang pinasadahan ng tingin ang suot ko. Hindi ko mabasa ang kaniyang nasa isip kaya't lalo akong nakaramdam ng panliliit, so I consciously pulled down the hem of my mini-skirt.

Naiilang ako sa kaniya sa totoo lang. Matapos nung pag-uusap namin sa opisina niya noong nakaraang linggo ay pilit ko na siyang iniwasan. Baka kasi maka-quota na ako at i-sesante na nang tuluyan.

"Why are you wearing like that?"

Pakiramdam ko ay lalabas ang puso ko nang out-of-the-blue ay magtanong ang presidente. Lalo pa akong na-intimidate dahil may accent ang pagkakasabi niya nun, at hindi ko rin mawari ang gusto nitong ipahiwatig base sa kaniyang tono.