اسكريبتات

84

-رايحه فين ي ندى ؟
ضحكت وبصيتلها شوية
_عندي معاد معاه دلوقت وهتأخر
-محكيتيش عنه يعني ..طب قبل ما تمشي احكيلي
بصيت فالساعه وبعدين اتنهدت وبصيتلها
_ طيب ي ستي اقعدي..
لما اتخطبتله مكونتش أعرفه هو واحد جه اتقدم وأنا ارتاحتله فوافقت عادي ،
قامت من مكانها وجت قعدت قدامي وقالت بفضول
-احكيلي ..
_عاصم ي ستي مِن بلد جمب بلدنا ،حقيقي مكونتش اعرفه ابداً ولا أخدت بالي منه خالص
كنت علشان اروح جامعتي بركب كذا مواصله فكنت بركب القطر علشان منزلش كذا مره وكمان بدوخ من المواصلات

بابا كان معتقل ي ستي وبعديها بفترة بسيطة
أخويا كمان اُعتقل
الفترة اللي اخويا اعتقل فيها كانت من اصعب الفترات علي بيتنا كله
أنا أو ماما أو ملاك مرات مُؤيد أخويا
وخصوصاً إن ملاك كانت حامل فآخر شهر ليها
لما مُؤيد اعتقل ملاك وماما حرفياً انهاروا
مش هنكر إني كنت زيهم وأمر كمان بس كنت بحاول علي قد ما اقدر أبقي متماسكة وقوية علشانهم
وخصوصاً إن مبقاش لينا حد يعولنا بعد بابا ومُؤيد
الفترة دي خرجت ادور علي شُغل
وطبعاً لاني لسه متخرجتش ملقيتش شغل في مجالي
فاضطريت اشتغل فاي محل
فضل 3أيام بدور علي شغل ورابع يوم لقيت بنت بتوقفني فالشارع
-لو سمحتي
_نعم؟
-أنا شايفاكي بقالك كتير بتدخلي بتلفي هو أنتي بتدوري علي حاجه ؟
_هو أنا بدور علي شغل بس للآسف مش لاقيه
-والله حسيت برضوا ،ربك كريم والله ي بنتي ،صاحب ابن عمتي كان بيدور علي آنسات للعمل فمحل للمحجبات وأنا وصحبتي اشتغلنا معاه بس صحبتي حصلها ظروف ووالدتها تعبت فاضطرت تقعد من الشغل تراعيها لو تحبي فممكن تيجي مكانها
_ده يبقي عملتي فيا معروف ،شكراًبجد
-ي حبيبتي الشكر لله ..أنا فرح وأنتي؟
_ندى انا ندى

من يومها وأنا وفرح صحاب وحقيقي بنت كويسة جداً

كنت بروح الكليه للضرورة بس

وكل وقتي للشغل والبيت والمذاكرة

-المهم بقي ملاك ولدت وجابت بنوته زي القمر
كُل حاجه كانت تخص ميلادها أنا اللي كنت متكفلة بيها وحقيقي الفرحة مكانتش سايعاني
جت علي وش الدنيا "ريمون مؤيد فريد عبدالقادر "
كانت شبه مؤيد جداً وعملتلها حفلة وجه فيها الناس المقربه مننا
ومنهم فرح اللي جابت هدية كبيرة للبيبي ومقدرتش اقولها لا لانها حقيقي بقت منا
-ليه تاعبه نفسك كده ي بنتي؟
_ايه ي ندى هي مش بنت اخويا انا كمان ولا ايه ؟
-ايوة ي ستي طبعاً بس ليه هديتين ما واحدة بس كانت كفاية ،كده كتير
_ي ستي مفيش حاجه تكتر علي ست البنات كلهم ،الست ريمون

-كملي وبعدين ؟
_مُؤيد ي ستي والحمدلله خرج
لما مُؤيد خرج طبعاً منعني اكمل شغل رغم أني كنت اتعودت علي فرح جداً وعلي وقتي معاها بس هو قال أن هو راجل البيت واللي خلاني اشتغل انه مكانش موجود ،اما دلوقتي هو بقي موجود ..
وقعدت مِن الشغل فعلاً
ورجعت بقي انتظم فالكلية والمحاضرات
بس علاقتي بفرح طبعاً منقطعتش ،كنا ع اتصال دايماً وكانت بتزورني أحياناً