-بس أنا فعلاً حبيتك ي داليا والله !
سكتت شوية وبعدين بصيتله
_عارف ي حسين ي ابن عمي أنا بقالي كام سنة مستنية اسمعها مِنك؟
-كام سنة ي داليا؟
-مش عارفه .. متستغربش والله حقيقي مش عارفه ،أنا عُمري عشرين سنة ومن يوم ما وعيت عالدنيا وأنا بسمع إن حسين لداليا وداليا لحسين ،من وانا لسه عيلة بضفاير وانا برسم في كراريسي صورتك وبحاول اتخيل ي ترى حسين شكله هيبقي عامل ازاي دلوقتي ؟ كنت بكبر وحبك اللي اتزرع في قلبي يكبر معايا ،استني الوقت اللي جدي يكلمك فيه علشان اتسحب واستخبي واسمع صوتك واشوفك بقيت عامل ازاي ؟
كل تفكيري كان ي ترى حسين اللي قضى عمره فبلاد بره ممكن يحبني أنا ؟ ..يعني كلام جدى هيمشي عليه ؟ وفضلت عمري كله أصبر نفسي وانا بكرر اللي بسمعه من صغري
حسين لداليا وداليا لحسين .
لغاية اليوم اللي رجعت فيه ،كنت مستنية علي احر من الجمر وأنا كُلي شوق اشوف حسين حبيب القلب اللي طول عمري استناه ويومها من شوقي جدي قالي
=أهمدي ي بنت يعني هو هيطير ،يقطع الحُب وسنينه ، بس..
-كملي ي داليا
_رجعت ي حسين وشوفتك ..بس مش رجعت لوحدك ،كانت السنيورة فايدك ،رجعت وجايبلي بنت الخواجات معاك
كنت بتدارى فجدي من الكسوف لما شوفتك
وقلبي أتفلق نصين لما شوفت كفك حاضن كفها وانت بتعرفها علي جدي بانها خطيبتك
طب وأنا مين ؟ كلبشت فدراع جدي وبصيتله وانا بسأله بعيني وانا ي جدي ؟ طبطب علي ايدي ورحب بيك وبيها
لما بقينا انا وهو لوحدنا
حضنته وبكيت ،يومها طبطب علي كتفي وقالي:
-مكونتش اعرف أنك دايبه كده ي بنت علي ،لو اعرف ان ابن مدحت خطف قلبك كده ودوبلك روحك والله ما كُنت سفرته يجبلنا البلوة الملونة دي ،مش عارف انا خاطبها علي ايه ده انتِ ست ستها ي ست البنات انتِ
_هتفضل تجاملني كده لحد امتي ي جدي ؟ ماهو لو ست ستها مكانش قلبه اتشنكل فيها هي
-يعني انا كلامي صحيح وابن مدحت حايز قلبك
اتكسفت ومردتش عليه فكمل وقال
-ماهو لو شاف حلاوة قلبك وعيونك دول كان زمانه دايب والله بس انتص فـ نظره وحب اجنبية ..بس ولا يهمك هجوزهولك
_ازاي ي جدي وهو بيحبها هي؟
-انتِ ايش عرفك انه حبها؟
_مش خطبها؟
-قبل ما يعرفك ،وانتِ اهو قدامه دلوقتي ..مين يسيب الاصل ويبص للتقليد بس غير الاعمي !
مسحت دموعي ووقفت قصاده
_تفتكري هيحبني ي جدى؟
-ولو محصلش ،الحلوة تستاهل سيد سيده ،بس نقول ايه اه مـ الحُب وسيرة الحُب ..
-كان معاه حق جدي ي داليا أنا فعلاً حبيتك ..
اتنهدت بحزن وبصت فالأرض
_بس خلاص ي ابن عمي مبقاش ينفع ..
-طب فُرصة واحدة علشان جِدي ..
_الفرصة اللي كت علشان جدي انت ضيعتها لما سبتني يوم فرحي ي حسين ،عارف كان اي احساسي وقتها؟
ده انت لو حجر كنت لنت ي اخي ،معرفش جت القسوة دي كلها منين ؟
-أنا اسف ي داليا سا..
_متكملش ،مسامحاك .. القَلب اللي شال حُبك فيوم مش حِمل يشيل لك كُره والله
-استاهل تكرهيني ي داليا أنا عارف ،مش فاهم ازاي كنت غبي وسبتك كده يوم فرحنا ..بجد كنت غبي
_انت عارف يوم ما حبيبة القلب سابتك ورجعت علي بلدها ..يومها شوفتك بتعيط قلبي كان بيعيط معاك قبل عنيا
الحلوة معرفتش تعيش عيشتنا وهربت علي بلدها رغم انك كنت عايش عيشتها عادي !
كنت هموت من قهرتي علي كسرة قلبك دي ،كنت بسأل نفسي ي ترى هو حاسس بايه ؟ ازاي تهجره وهو بيحبها كده ؟ الغبية ..في حد يسيب حد واقع فيه كده ؟
كنت بطمن عليك من جدي ولو صدفة اجتمعنا وضحكتلي وانت بترمي السلام كان قلبي بينط وراك
عارف لما بدأت تشوفني قدامك و تَتعامل معايا سعادة الدنيا سكنت قلبي
ولما جدي طلبني ليك ،حسيت كأني ملكت العالم باللي فيه
-حبيتيني اوي ي داليا؟
_حبيتك اكتر من روحي ي حسين ..حبيتك وبحبك وهحبك علي طول ..
-نرجع ي داليا واللي تطلبيه سيف علي رقبتي
_مهو لو كان بايدي بس..
-طب قوليلي اقدر اعمل ايه اصلح بيه الغلط اللي عملته؟
_اطلب من يوم فرحنا يرجع ومتفوتنيش وتمشي ،ماتكسرشي قلبي ،متهجرنيش زي مااتهجرت بحجة انك مش مستعد تتجوز ..لو كنت يومها عرفتني انك لسه مطبتش فحبي كنت هستني والله ،لو كنت جيت وحكيتلي كنت هصبر نفسي وقلبي عليك بس انت هربت ومفكرتش فقلبي ولا حسرتي
كنت بقول في حد يسيب حد واقع فيه كده ؟ واديني اتسابت وانا طابه علي اخري
اتنهدت بحزن وبعدين قامت وقفت فمسك ايديها
-رايحة فين ي داليا؟
شاورتله يسكت وهمست بشويش
_اشششش ،جايه
-هي مين؟
=بتكلم مين ي استاذ حسين ؟
بصلها بفزع وهز راسه
-مـ مبكلمش حد
=اممم ،اخدت دواك ؟
داري الدوا تحت المخدة وهو بيأكد
-اه ،اه طبعاً اخدته
=يعني مبقيتش بتشوف داليا خالص صح؟
بص لداليا اللي واقفه جمب الباب وبتضحكله ،رد وهو بيهز راسه نفي :
-مبقيتش بشوفها خالص لا ..
#ندى_سلامة
#حكاوي_ندى_سلامة
- عاالم مختلف )" !💛✨
