-والله العظيم دمعه كمان وهروح اجيبه من شعره في قلب الشارع افرج عليه الناس الجحش ده.
_ي ندى أنا..
-صباح، أنا قولتلك اهو، انا أساسًا مكونتش طايقاه من الأول ماشي، لو شوفتك بتعيطي تاني مش هعمل غير حاجه واحدة بس ..
_ايه هي؟
-هي حاجه واحدة، هاخد رقمه القمر ده من تليفونك وهكتبه على حيطان الحمامات العمومية وهعمل ييجي اربع خمس اكونتس فيك وانزل الرقم واكتب عليه السنيورة سعاد للتعارف الجاد، ومش بس كده هنزل الرقم في دندشة و ويفرز وڤوديكا وليدز وكوينز وكام جروب كده للبنات واقول متحرش في الاتوبيسات الحكوميةوصورته الحلوة هطبعها واكتب متخلف عقليًا هارب من مشفى العباسية وفي مقوله أخرى إرهابي متطرف مطلوب فورًا.
_حرام عليكِ والله.
-بت متعصبينيش أنا أصلًا مفشتش غليلي باللي عملته ده وحاسه اني عايزه أعمل أكتر.
_أنتِ عملتي ايه؟
اتنهدت وعدلت البلوزة وربعت رجلي وبعدين بصتلها باهتمام
-معملتش حاجه ياختي، لما سيادتك جيتيلي عالكافية معيطة وبتتشنهفي مقدرتش امسك نفسي بعد ما خلصتي حكي وقولتيله اللي قالهولك وانك سبتيه فالشغل ومشيتي، اول ما ركبتك التاكس روحت على شغلك دورت عالاستاذ مصطفى اللي مزعل سيادتك وطبعًا معرفش شكله عامل ازاي اساسًا ولا أعرف غير أسمه فضلت ابحلق في وشوش الناس شوية لحد ما سألت بنت مايعه كده عليه بصتلي من فوق لتحت وشاورتلي على مكتبه .
الافندي كان قاعد بيشرب سحلب وحاطت الهاند فري ببرود عادي بعد ما كسر قلبك، أول ما شوفته شياطين الدنيا كلها كانت بتتنطط قدامي، قربت من المكتب وخبطت بايدي عليه جامد وشديت الهاند فري
-أنا مش فاهمه ازاي البني ادمين بيركنوا قلوبهم كده، لو كان القلب مضيق على معدة سيادتك كنت عرفنا واحنا نلم من بعض و نستآصله لكن ليه كده هاا؟ ليه تضيق عالقلب على حساب طحالك، معدتك، أو كِرشك؟ ها ليه ي مؤمِن؟؟
فتح بوقه وتنح ومردش عليا فكملت وانا متعصبه
-أنت كبني آدم طبيعي عندك شوية مشاعر محمضة ارميهم لكن ليه تلعب ببنات الناس ومشاعرها؟ مش فاهمه ! البت غلبانه واتهفت في نفوخها وحبتك تقوم تضحك عليها وتكسر قلبها ياللي تنكسر رقبتك!!
_أ..أنا..
-أنت! أنت ايه؟ ذكر شرقي سيكوباتي عنصري مُتعفن وحسبي الله ونعم الوكيل اللي تتقلبوا قنافذ ونخلص ،فيها اي لو الحياة من غير رجاله!! ها كان هيحصل حاجه؟ والله ماهو حاصل حاجه..
_ي آنسة ،أنا ...
-أنت، أنت بتضحك كمان!! بص اصلًا العيب مش فيك العيب في المهزأة،المتخزوقه صحبتي والله لازفها من النهارده مسمهاش صباح، اسمها المتخزوقه راحت، المتخزوقة جت..وبالنسبة لرقمها فتمسحه من عندك ومشوفكش معاها فحته ولا لسانك يخاطب لسانها لاحسن يوحشك ماشي يابو الكباتن؟
_صباح وابو الكباتن!! أنتِ سواقة توك توك! ،كفاية كده لو سمحتي ميصحش فرجتي المكتب علينا.
