اسكريبتات

99

أول مرة شوفتها كانت لابسة فستان أسود جميل أووي
حسيتها خارجه حالًا من فيلم عربي قديم..
فضلت واقف باصصلها ييجي عشر دقايق وهي واقفة محتارة وكأنها تايهه ومش عارفه هي رايحة فين..

الحقيقة مكونتش قادر امنع الرغبة الشديدة اللي جوايا فأني أكلمها ،
اسمع صوتها ،اعرف اسمها أو أي حاجه المهم أخلق أي حديث معاها ..

لكن فنفس الوقت الموضوع مكانش هيبقى لطيف وخصوصًا أني بالنسبالها شخص غريب ولو كلمتها هتشوفني مُتطفل ويمكن تنفر مني وتفهمني غلط.

كان عندي معاد مُهم مع صديق ليا  وكنت متأخر ،لكن نسيت ده كله وضربت بكل حاجه عرض الحائط ووقفت اتابعها من بعيد.

قعدت على مقعد قصادي وبصت فالساعة بتوتر وبعدين وقفت اتحركت خطوتين لقدام وبعدين رجعتهم وبعدين قعدت تاني وقلعت فردة من الجيونتي الأسود الشفاف اللي كانت لابساه وحطته جمبها بتوتر وهي بتلعب في الموبيل وكأنها بتكلم حد بس مبيرودش..

لقيت رجلي بتتحرك ناحيتها بتلقائية وأنا كل تفكيري أنها ممكن تكون محتاجه حاجه دلوقتي، ورغم أني مكونتش عارف المفروض هتكلم معاها فايه لكن اتحركت ناحيتها..

وفجأة قبل ما أوصلها عربية وقفت قدامها فوقفت واتجهت ناحيتها بضيق وهي بتكلم الشخص اللي جواها وبعدين ركبت جمبه واتحركوا..

وقتها كنت واقف فالنص، مش عارف المفروض اعمل ايه؟
اكمل واتقدم ناحية هوا وطيف وهمي من ريحتها سابته وراها لما اخدت قلبي ومشيت ..

ولا ارجع لورا تاني وامشي عالميعاد اللي كنت رايحه وكأن مفيش  اي حاجه حصلت .

أخدت قراري ولفيت علشان أمشي لكن على أخر لحظة لفت انتباهي فردة الجيونتي بتاعتها اللي تقريبًا نسيتها بسبب التوتر والسرعة اللي كانت فيها..

اخدتها حطتها فجيبي وأنا بفكر أني يمكن نتقابل تاني وارجعهولها؟ ليه لا!

كلمت صديقي واعتذرتله عالتأخير واتفقنا نتقابل فيوم تاني وأخدت منه ميعاد..
لكن المرة دي أنا اللي هنتظره مش هو ..

قعدت عالترابيزة منتظره في كافيه مسرح هو اللي قالي عليه وأنا متوتر لأني أول مرة أدخل هنا وفنفس الوقت لوحدي وللآسف مش عارف أي حاجه ولا أي حد هنا ..

خرجت الجيونتي مسكته فايدي وبصيتله وأنا بفتكر حركاتها وتعابير وشها اللي كانت موضحة كل حاجه هي بتفكر فيها بشكل كبير وكأنها كتاب مفتوح سهل جدًا أني أقرأه 

فوقت من شرودي على صوت نزار صحبي اللي سحب كرسي وقعد قصادي وهو بيعتذر

-معلش ي غيث أنا آسف جدًا على التأخير لكن ليلى المره اللي فاتت اتأخرت عالتدريب بتاعها هنا بسببي فاضطريت اوصلها هنا النهاردة ولو كنت وصلتها واتفقنا ع مقابلة فمكان تاني كنت هتأخر عليك..