رمي الشنطة واترمي علي الكنبة بتعب - مش قادر خالص، فرحة انا جعان خالص فيه غدا ايه؟
- مفيش.
اتعدل - نعم! هو ايه اللي مفيش يا فرحة صلي علي النبي في قلبك كده والله ما وقت هزارك.
قعدت في الارض وعيطت - ماانت السبب.
قام وقعد جمبي - يالهوي عليا بتعيطي ليه دلوقتي، وبعدين انا عملت ايه بس؟
- انت عارف اني مبعرفش اطبخ اخري في المطبخ اندومي وكريب وحاجات تافهة وعارف انك انت اللي كنت بتعملنا الاكل اصلا علطول ومنبهتنيش ان احنا هنكتب الكتاب بسرعة على الاقل كنت لحقت اتعلم اكلتين ولا اي حاجة.
- وبالنسبة لفترة الخطوبة دي كنتي بتعملي، بتأزأزي لب؟
- احنا هنستعبط يا زين احنا اتخطبنا اصلا غير هما ٣ ايام بس!
ضحك - الله يسامحك يا جدو كان مستخبيلي فين كل ده ياربي متجوز عيلة وهبلة كمان.
" هو الله يسامحك يا جدو فعلا، بحكم ان من يوم ما ماما اتوفت من صغري وبابا كان عاوز يسافر ويخادني معاه بس انا كنت متعلقة بجدو ففضلت معاه وسافر هو، خالتو حاولت تاخدني اعيش معاها بس انا كنت حابة أفضل عايشة هنا مع جدو وزين وسلمي ولاد عمي، وبمعني اصح مكنتش بحب ابنها الملزق اللي اسمه ياسين ده، بس من كام يوم حصل مشكلة وخالتو كانت مصممة تاخدني اعيش معاها وعشان ابقي دقيقة اكتر كانت عاوزة تخطبني لياسين ويبقي الناس ملهاش كلمة علينا وابقي بنت اختها وخطيبة ابنها كمان.
جدو مكنش هيبقي راضي اني ابعد عنه ففهمها اني مخطوبة لزين اصلا وكتب الكتاب كمان كام يوم. كان يوم عبارة عن حلقة صدمات وخطبوني وجوزوني ومفكروش يعزموني حتي، الموضوع كان بالنسبالي عادي او طالما مع زين فايه الجديد، مااحنا من صغرنا مع بعض كل اللي اختلف ان الحدود اللي كانت ما بينا اتشالت، بس اعتقد الموضوع فارق معاه كنت سمعته في مرة بيتكلم مع جدو انه بيحب بنت من فترة، معرفش ازاي حدو جاله قلب يعمل في زين كده ويدبسه فيا! "
سمعت صوت دربكة في المطبخ - انت... انت بتعمل ايه دلوقتي؟
لف ووشه كان متبهدل من الدقيق وايه القمر ده يا ولاا، ضحكت - يا لهوي انت عملت ايه؟
رفع كتافه ب حيرة - معرفش والله حاولت اعمل حاجة صح.
قعدت علي الارض من كتر الضحك وهو قعد قصادي - متضحكيش بقي الله! مش احسن من واحدة حرقت الاكل؟
بصتله بصدمة - نهارك مش فايت انت عرفت ازاي؟
- اصل نفس الاكل اللي حرقته كنت برميه في الزبالة فشوفته.
ضحكت كتير اوي وقومت جبت مناديل وقعدت قصاده - هتعملي ايه؟
- شششش اثبت عشان اشيل اللي في وشك ده، هو انت كنت بتحاول تعمل ميكب بالدقيق ولا ايه؟
- هه سخيفة علفكرة.
ضحكت - عارفة علفكرة.
- و قمر بردو.
ولا ولا حد يخض حد كده، حدفت علبة المناديل في وشه - طب كمل انت بقي انا اصلا غلطانة اني بعملك حاجة.
روحت الاوضة وهبدت الباب ورايا وسمعت صوته وهو بيضحك - شوفي بقالي كام سنة اعرفك واول مرة اعرف انك بتعرفي تتكسفي ووشك يحمر زي البنات.
" حد يقتل البني آدم اللي بره ده، معرفش ازاي الوقت عدي ولقيت العشا بتأذن قومت اتوضيت وصليت ومحسيتش بصوت بره فخوفت ليكون ولع في البيت ولا حاجة، خرجت ولقيت البيت اللهم لك الحمد سليم بس محدش قاعد في الصالة دورت في الاوضة التانية والحمام وكل حتة وملقيتهوش و...، ثانية المطبخ "
- بالله فهمني ليه مصمم تخضني علي البيت.
المعلقة وقعت من ايده - بقي مين بيخض مين دلوقتي يا فرحة، يا شيخة اتقي الله.
ضحكت - طب بتعمل ايه عندك دلوقتي.
- يستي بعملنا اي حاجة ناكلها ده الصايم بيفطر المغرب يا شيخة واحنا بقينا العشا.
- طب وسع كده خليني اساعدك.
- لا والنبي بلاش.
رفعت حاحبي - نعم!
- اقصد يعني روحي انتي الصالة هتلاقي كيس كده جمب التليفزيون فيه شوية حاجات طلعيها وجهزيها كده عقبال مااخلص اللي في ايدي.
" روحت الصالة وبفتح الكيس ويا نهار حاجات حلوة وشيبسي و شوكولاتة وايه الحاجات القمر دي، طلعت كام حاجة كده م الكيس وحطيتهم علي الترابيزة اللي قدام التليفزيون وشوية ولقيت زين خارج م المطبخ وبيحط الاكل علي السفرة"
- ها طبختلنا ايه النهاردة يا شيف زين.
- عملت مكرونة وفراخ بس بطريقتي.
- طريقتك ازاي مش فاهمة.
- يعني قطعت الفراخ مكعبات وشوحتها علي النار كده مع شوية توابل وجبت المكرونة وسلقتها وبعدين حطيت الفراخ علي المكرونة وحطيتهم في قالب وحطيت جبنة شيدر وجبنة موتزريلا علي الوش بس كتير كده ودخلتهم الفرن شوية لحد ما الجبنة ساحت وبس كده.
- لا ده انت تنافس الشيف الشربيني بقي.
ضحك - المهم اقعدي ودوقي كده وقوليلي رأيك.
" قعدنا ناكل وللأمانة الاكلة كانت جميلة جدا، خلصنا اكل وشيلت الأطباق عشان اغسلها ولما رجعت للصالة لقيته جاب فيلم علي الشاشة و حاطط بسكوت وشيبسي وعصير علي الترابيزة قدامنا وحاجة قمر كده"
- اه نسيت اقولك ان الحظر هيبقي اسبوعين كمان ومفيش شغل خالص بقي وممنوع الخروج م البيت.
- وحسبي الله ونعم الوكيل.
ضحك - ليه كده.
- يعني انا هفضل قاعدة في البيت اسبوعين من غير مااخرج خالص؟
- فرحة فوقي انتي مكنتيش بتقومي من علي السرير اصلا.
- ولو، انا محدش يقعدني في البيت غصب عني اقعد بإرادتي بس.
- طب تعالي اقعدي يا لمضة عشان نشغل الفيلم.
- اديني قعدت، كوميدي ولا دراما.
- The visit.
قومت وقفت - انا انسحب لانها وصفتني بعدم التهذيب وهذا غير لائق.
ضحك وشدني من ايدي - اترزعي هنا خلينا نشغله.
- رعب يا زين رعب!
- يا بنتي مش رعب اوي والله هو مقرف شوية بس.
- يا ولااا!
" اتفرجنا علي الفيلم وهو مكدبش وطلع مقرف فعلا"
قومت طفيت الشاشة - ادعي عليك بإيه وانت فيك كل العبر.
- طب والله كان لطيف خالص.
- يالهوي عليا ده انت هتدخل النار حدف، تصبح علي...، ولا اقولك مفيش تصبح علي خير كمان يلا.
شدني من دراعي - اقعدي شوية عشان مش جايلي نوم.
- هعملك ايه انا يعني هحكيلك حدوتة؟
- اه احكيلي فكرة حلوة.
- مبعرفش.
- انتي رخمة ليه يابنتي.
- اهو انا كده بقي.
- طب ممكن نتكلم جد بقي؟
- ايه ده فيه انت خضتني.
- جدو كلمني النهاردة يا فرحة.
- ايه ماله حصل حاجة؟
- لالا مفيش حاجة، هو بس كان بيتطمن عليكي وقعد يوصيني عليكي كتير.
هزيت راسي - اه، طيب ماشي.
-بصي انتي عارفة ان كل حاجة حصلت بسرعة ونظرا للظروف اللي بتمر بيها البلاد حتي معرفناش نعمل فرح.
ضحكت - مش فارق معايا والله انت عارف اني مش بحب الزحمة والدوشة وكده احسن.
- مش فارق معاكي بجد؟
- اه عادي في ايه؟
- طب وانا؟
- مالك؟
- شيفاني ازاي!
ضحكت وسرحت شوية وقولت - انت القمر الجميل.
ابتسم - يعني ايه مش فاهم؟
اتوترت - لا مفيش حاجة.
- قصدك انك شيفاني حلو وكده.
- لا معناها مش كده.
- امال ايه!
- لما تكبر هقولك.
ضحك وسكت شوية - طب معندكيش اي أسئلة؟
فكرت شوية - وهتجاوبني بصراحة؟
- هجاوبك بصراحة.
- طالما بتحب حد تاني وافقت ليه؟
بصل بعدم فهم - حد تاني؟ مين قالك كده!
- محدش قالي، انا في مرة غصب عني سمعتك انت وجدو وانتو بتتكلمو وقولتله انك بتحبها من زمان وكلام تاني كده.
- طب انتي عارفة هي مين؟
- لا.
- اممم طيب.
- طيب؟
- ايه في ايه؟
- مفيش انا داخلة انام تصبح علي خير.
- استني بس.
-نعم عاوز ايه؟
وقف قصادي وابتسم - مبتتقالش كده.
مسح علي شعري وباس راسي - تصبحي علي خير.
" معرفش ليه عيطت، معرفش ليه كنت مستنياه يقولي مبحبش غيرك، لما باس راسي حسيت كأنه بيقولي متزعليش طيب، كأنه بيحاول يخفف عني وعن تقل قلبي، معرفش الكام يوم اللي بعد كده كنت زعلانة ليه، هو انا هبلة؟ ماانا عارفة انه بيحب غيري، ثانية ما يحبها وانا مالي، هو ايه اللي مالي المفروض يحبني انا زي ما بحبه و...
نهار مش فايت بحب مين؟
روح يا زين الله يوقعك زي ما وقعتني يلا بقي "
- بتعملي ايه؟
مبصتلوش - ملكش فيه.
- طب حاسبي لتحرقي الاكل .
- متبقاش تاكل.
- لا وعلى ايه هاكل وامري لله.
لفيت ووقفت قصاده - هي بتعرف تطبخ حلو مش كده؟
- هي مين!
رفعت حاجبي - يااااه يا فرحة انتي لسه فاكرة الموضوع ده.
- ليه هو انت نسيته اصلا عشان تفتكره.
- مالك طيب فهميني.
لفيت وشي عشان الحق دموعي - مفيش روح اقعد والاكل هيبقي جاهز كمان شوية.
" ماانا عارفة انه مش ذنبه، انا اللي زي الهبلة وحبيته عادي ماهو قدامي من يوم مااتولدت حبكت احبه لما يحب واحدة تانية يعني!"
- فرحة.
- يا نعم.
- ايه ده هو مش المفروض تقوليلي يا قلبها وكده يعني.
- احم ده بمناسبة ايه بقي؟
- ولا حاجة يستي ما علينا تعالي نتفرج علي فيلم.
- مش عاوزة.
شدني وقعدني - طب يلا هشغله اهو.
" بدأ الفيلم وكنت هغمض عيني عشان كالعادة كان هيطلع رعب بس لقيته مشغل The fault in our stars، اكتر فيلم بحبه تقريبا علي الرغم اني مبحبش النهايات الحزينة الا ان الفيلم ده قاعد في قلبي كده، فضلنا ساكتين واحنا بنتفرج شوية ولقيته بيميل راسي علي كتفه وبيلعب في شعري ودي اكتر حاجة ممكن بتهديني فعلا، كنت هرفع راسي بس هو اتكلم "
- سيبيها، من زمان وانا كان نفسي اعمل كده.
ابتسمت وبعدين كشرت وشي تاني - كان نفسك تعملها هي كده مش انا.
اتنهد وعدل راسي ووقف الفيلم - انتي هي يا فرحة.
- يعني ايه؟
- يعني مفيش هي، لما كنت بتكلم مع جدو كنت بتكلم عليكي مااقصدش حد غيرك، فكرك اني لو مكنتش بحبك كنت هستعجل علي كتب الكتاب كده!
فكرك ان جدو لما قال اننا مخطوبين رمي الكلمة وخلاص!، انتي اكتر واحدة عارفة ان جدو اكتر حد عاوزلنا الخير والسعادة وميقدرش يخاطر بحركة زي دي غير لما يتأكد اننا هنبقي مبسوطين، يوم ما قولتلك ان جدو كلمني كان بيتأكد انك كويسة كان بيقولي لو انتي مش مبسوطة او مرتاحة هنخلص الموضوع ده كله، كنت خايف من كده بس لما لقيتك بدأتي تغيري بعدها انك مفكراني بحب تاني حسيت ان ممكن لسه فيه فرصة نكمل.
-....
- ايه يبنتي انتي كل حاجة تعيطي كده يلهوي عليا، طب اهدي طيب.
ضربته في كتفه - انت عارف الاحساس اللي كنت حساه وملازمني طول الفترة دي كان وحش ازاي، الله يسامحك يا زين والله.
مسح علي شعره ب حيرة - هيسامحني ان شاء الله، بس الهانم هتحبني امتي.
- ما قولنا انت القمر الجميل.
- يادي النيلة عليا، الجملة دي مش لاقيلها معني علي جوجل خالص ولا اي قاموس.
ضحكت - ماهي مش موجودة في حتة غير قاموسي.
سند بايده علي خده - ومعناها ايه بقى في قاموس الهانم.
- بحبك.
في الخلفية جملة من فيلم The fault in our stars :
"وأجبرت نفسي علي تخيل عالم بدوننا..
وأنه سيكون عالماً لا قيمة له."
#ومقدر_لنا_اللقاء_ولو_بعد_حين
#هاجَر_عِيد
قولتولي اكتبيلنا حاجة تسلينا وتفرحنا واديني كتبت، يكش تظهروا وتعملوا شير بقي 😌💙
- عاالم مختلف ) " 💛✨
