لا أدري كيف لصدفة صغيرة أن تقوم بتأخير القطار خاصتي ، ومن ثم تدفع اللص ليسرقك ، ف تزين الدموع عينيك سريعا لأكون انا أول الشاهدين ف اقترب منك و أعطيك مبلغ من المال حتى تستطيعين فيه العودة إلي منزلك مقابل رقم هاتفك لإسترجاع المبلغ مرة أخري ، و لكن نعم أنا استرجعت المبلغ بعدها و نسيت ما هو أهم ، أني اقرضتك قلبي . 💙
_ شكرا جدا لحضرتك، أنا بجد آسفة بس بمجرد ما أوصل البيت هرن ع حضرتك و أنزل ارجعلك المبلغ
_ ولا يهم حضرتك ، بتحصل عادي
_ القطر وصل ، عن إذنك
ركبنا القطر و كانت هي ف الكرسي اللي قصادي و طول ما انا قاعد براقبها وبراقب تصرفاتها
كانت بنت عادية مش فاتنة الجمال بس ملامحها فيها حاجة غريبة تشد، فيها شئ من براءة الأطفال و رقتهم ، و اللي شدني اكتر أنها مش حاطة اي ميك اب .
كانت باصة من الشباك و سرحانة و بمجرد ما الشمس حضنت عنيها قفلتهم بسرعة ..
الظاهر إنها مش بتستحمل نور الشمس القوي.
و معرفش ليه فجأة لقيتني بفتح النوت بتاعتي و بكتب " حساسية من ضوء الشمس القوي " .
وصلت عند محطتي و لقيتها هي كمان بتوقف و الظاهر إنها نازلة ف نفس المحطة ، و بالفعل نزلت و كانت ورايا
_ لو سمحت
* كانت هي *
بصيتلها _ نعم ؟
_ حضرتك ساكن قريب من هنا ؟
_ آه
_ طيب خلاص ممكن نتقابل هنا بكرة بإذن الله علشان ارجعلك المبلغ.
_ زي ما تحبي
_ شكرا لحضرتك، عن إذنك
_ اتفضلي
مشيت، و أنا كمان مشيت بس حاسس إني سايب حاجة معاها، عقلي بيقولي أيوة أنت سايب فلوسك معاها، بس قلبي ملهوش جواب و مش بيتكلم ، كأنه مش موجود أو كأنه راح معاها !
رجعت البيت و أنا عمال أفكر فيها و مش فاهم في ايه ؟ ما اهو انا أكيد ملحقتش أحبها من ساعة مثلا ! بس الفكرة إنه في راحة ، شعور إنك تشوف حد لأول مرة و تحس إنك مرتاح للشخص ده من غير اي اسباب ، في حاجة زي المغناطيس بتشدك ليه ع الرغم من عدم معرفتك بيه بس حاسس إنك مرتاح و هو موجود ، متطمن بيه .
فتحت النوت و شوفت اللي كتبته و أفتكرتها تاني ، و كتبت
" فتاة ع هيئة مسكن للألم ، بمجرد النظر إليها تصيبك الطمأنينة ، ف تنسيك الدنيا بما رحبت " .
صحيت تاني يوم ع رنة الموبايل
_ ألو
_ السلآم عليكم
_ و عليكم السلآم ، مين ؟
_ أنا البنت اللي حضرتك ساعدتها امبارح ف المحطة و ادتني فلوس و كنت متفقة مع حضرتك أننا نتقابل النهاردة علشان ارجعهم لحضرتك.
فتحت عنيا ب استيعاب _ اه أهلا بحضرتك، مفيش داعي ترجعيهم انا مش
قاطعتني بسرعة _ لو سمحت مش هينفع ، ده حقك ولازم يرجعلك و انا مش هقبل إني اخدهم
_ خلاص براحتك
_ نص ساعة و هكون عند المحطة، تمام ؟
_ تمام.
قومت لبست سريعا و أنا فرحان ، مش علشان هاخد الفلوس بس علشان هشوفها و لحد دلوقتي مش لاقي سبب لكل اللي بيحصل ده !
وصلت المحطة ف خلال نص ساعة و قعدت منتظرها و لسه مجاتش ، فجأة لمحتها من بعيد واقفة و الظاهر بتعيط !
قربت منها _ يا آنسة
بصيتلي و كانت عنيها حمرا _ الشنطة اتسرقت تاني.
_ إزاي ؟
مسحت دموعها بكم البلوزة بتاعتها و كملت _ مش عارفة بس كنت بعدي الطريق و جه واحد ع الموتسيكل و شدها مني.
_ خلاص ولا يهمك ، حصل خير ، أنا قولتلك اصلا مش عايزهم
_ لا ده حقك
بصت للارض ب إحراج _ المشكلة إني للمرة التانية هضطر استلف منك علشان أرجع البيت و نتفق تاني إني ارجعهملك بكرة.
_ لأ مفيش مشكلة بس ممكن المرة دي نغير الرقم ؟
_ إزاي ؟
_ ممكن رقم والدك علشان أقدر أتواصل معاه بشكل أسرع
رفعت عنيها و ف اللحظة دي حضنتهم الشمس و تلقائيا غمضت عنيها
وقفت قدامها _ حساسية من نور الشمس القوي !
بصيتلي ب استغراب _ اه فعلا
كملت _ بس مقولتيليش محتاج رقم بابا ليه ؟
_ علشان أرجع اللي ضاع
_ قصدك المبلغ .
_ لأ ، قلبي . 💙
"ربما تتعثر خطاك ، لتتعرقل بشخص يكن لقلبك استقامته " . 💙
- عاالم مختلف )" 💛✨
