الفترة دي تصرفاته بقت غريبة اوي معايا
بقي عصبي وبيتنرفز بسرعة جامد وانا مبستحملش عصبيته دي
وصوته عالي وبيتخانق علي اقل حاجه
حتي مبيقوليش فيه ايه او ليه بيعمل كده
اتخنقت من طريقته وتعامله حتي اني بقيت اتعصب زيه واضايق
حتي لو في مشكلة مبيحكليش ونحلها مع بعض
امبارح اتخانق معايا علشان طلب كباية شاي وكنت بكوي واتأخرت ف عملانها
راح زعق جامد ومشي وسابلي البيت
المشاكل كترت اوي بينا الفترة دي علي اتفه الاسباب
هو مبيهداش وانا مش قادرة افوت عادي
-انا اسفه ي عبدالله حقك عليا
_مفيش حاجه خلاص
-اجهزلك العشا طيب
_مش جعان كُلي انتي ،انا داخل انام
مكونتش اتغديت وكنت مستنياه بس معرفتش اكل من غيره
حطيت الاكل فالتلاجة ودخلت وراه
-عبدالله
كان بيلبس الـ تي شيرت
لفلي بعدم اهتمام
_اممم
-ممكن اتكلم معاك شوية ؟
_عايزه ايه ي ندى؟
-هو انت زعلان مني فحاجة؟ انا عملت حاجه ضايقتك طيب؟
_ها! ..لا ابداً
-اومال في ايه طيب ؟
_مفيش حاجه ي ندى انا عايز انام ومصدع جداً ،تصبحي علي خير
سابني من غير ما نكمل كلامنا ونام
فضلت واقفه مكاني لفترة مصدومة من تصرفه
انا عملت ايه غلط معاه؟
قصرت معاه في حاجه؟
مطلبش مني حاجه ابداً ومعملتهاش
قفلت النور وخرجت
روحت اوضة الاطفال وقعدت اعيط هناك ،لغاية ما نمت
الصبح صحيت ملقيتهوش فالاوضه
كلمته مردش ،اضايقت جداً
سبت التليفون وحاولت اشغل نفسي فالبيت باي حاجه
فضلت ارتب فالبيت واغير فالصالة وكلمت سارة جارتي تجيلي تقعد معايا
فتحتلها الباب وروحت اجيب كتاب اقرأه
حسيت الدنيا بتضلم في عنيا
ومحستش بنفسي الا وانا ع الارض وسارة جمبي بتفوقني
-اي اللي حصل؟،انتي كويسة؟!
_يمكن مرهقة شوية بس
-البسي نروح للدكتور
_لا مش محتاجة دكتور
-ندى اخلصي عشر دقايق اغير واجيلك
اليوم ده عرفت اني منتظره بيبي وفالشهر التالت
فرحت جداً بصيت لسارة وانا بضحك
بس افتكرت معامله عبدالله ليا الفترة دي حسيت بحمل ع قلبي
طيب البيبي اللي هييجي ده هيعمل ايه؟
عبدالله مش طايقني حتي
اللحظة دي كنت بحلم بيها من يوم جوازنا !
ولما جت ..،هو مش موجود !
بيرجع متأخر كل يوم وطول اليوم بره البيت ،بقيت بشوفه لما بييجي ينام بس حتي بصحي ملقهوش
لو بس يريحني ويقولي انا عملت ايه يخليه ينفر مني كده ؟
فات شهر ونص ومعرفتهوش ابداً اني حامل ..كنت خايفه اقوله
مش عارفه ليه
فضلت مستنياه طول الليل يرجع
لغاية ما راحت عليا نومه
صحيت ع صوت الباب بيتقفل
دخل رمي السلام وكان رايح ع الاوضه
-احضرلك العشا؟
_اكلت بره
-طيب ممكن نتكلم شوية
بصلي شوية وقعد علي كرسي الصالون واتنهد
_ها ،خير؟
-هو انا مبوحشكش ي عبدالله ؟
بصلي بصدمة ووشه احمر
_ها!
-انا مبوحشكش؟
_ما انتي معايا اهو!
-وانت فين ؟ انا معاك وانت فين من حياتي؟
_في ايه ي ندى ،هو انتي لازم تنكدي عليا كده؟!
-انكد عليك؟ ..لا ولا انكد عليك ولا حاجه ي سيدي
_ممكن تقفلي الموضوع ده لاني عايز انام ونبقي نتكلم بعدين ؟
-لا مش هنتكلم بعدين
_اومال انتي عايزه ايه؟
-اطلق ،انا عايزه اطلق..
معرفش قولت كده ازاي انا اصلاً مفكرتش اننا ممكن نطلق حتي
_تطلقي ايه ي ندى انتي بتهزري؟؟
قومت وقفت وقولتله
-لا مبهزرش انا كده كده كأني مش متجوزه ،كل واحد يروح لحاله احسن ..هكلم بابا ييجي ياخدني الصبح بعد اذنك
قام بسرعة ومسك ايدي
_استهدي بالله ي ندى واهدي كده
-تصبح ع خير ي عبدالله
