_عجبتينى من أول مرة شوفتك
_ و ده من إيه إن شاء الله!
_حبيت شكلك بالكمامه
_هنهزر بقا!
... .... .... ....
_عاوزة أشوف أهلى، يوم واحد بس وهرجع والله
_اعقلى بقا يا آنسه، ما قولتلك مينفعش تطلعى غير بعد ال14 يوم ده إذا تم شفاءك
_ولو مخفتش! هموت هنا معزوله عن كل اللى اتربيت معاهم!
_تفائلى خير هتلاقيه
استنيت الليل وهربت أول ما سمحتلى الفرصة، كنت لابسة الكمامه والجوانتى، أنا مش ف نيتى أعدى حد، أنا بس عاوزة أموت على سريرى وسط أهلى
كنت بجرى وببص ورايا ع المستشفى خبطت ف حد
_آسفه جداً، مخدتش بالى والله
_ولا يهمك، بتجرى ليه كده!؟
_هاااه! لأ أبداً مفيش
سيبته وكملت جرى، مش لاقيه مواصلات فالوقت ده، ببص ورايا ع المستشفى لقيت نفس الشخص لسه واقف مكانه وبيبصلى!
أخيراً قابلنى تاكسى أخدته وروحت ع البيت
_مين؟
_أنا يا بابا افتحلى بسرعه
فتح الباب والدموع ف عينه: داليدا
حضنته جامد: مش عاوزه أروح هناك تانى يا بابا، خلينى هنا، حتى لو هموت عاوزة أموت وسطكم ومعاكم
عيط على عياطى وفضل ساكت
بابا أحن راجل ممكن أقابله، مهما أتكلم مش هعرف أوصفه
_أنتى إيه اللى جابك هنا! عاوزة تموتينا وتموتى إخواتك!
ده كان رد فعل ماما أول ما شافتنى، الحقيقة متصدمتش لما سمعته لإنى عارفه أمى! غشيمه حبتين
اللى صدمنى فعلاً رد فعل خطيبى لما عرف نتيجة التحليل، كان يومها قاعد عندنا فالبيت لما جالى اتصال.....
_ألو
_آنسه داليدا؟
_أيوة خير
_ظهرت نتيجه تحليلك لڤيروس كورونا وللأسف طلعت إيجابى
_إيه!!
_كان لازم نبلغك علشان كلها ساعه وحد م المستشفى هيجي ياخدك، هنعزلك 14 يوم لحد ما نلاقى حل
قفلت الخط ومش مدركه اللى بيحصل، أنا كنت متوقعه انها هتكون انفلونزا عادى!
_مالك يا داليدا! إيه المكالمه دى!
_نتيجة التحليل ظهرت، إيجابى
كان ماسك إيدى فجأه رماها كإنه اتكهرب، طلع إزازة الكحول من جيبه وفضل يرش على إيده وعلى نفسه
_حسام!! إيه اللى انت بتعمله ده! ده بدل ما تفكر معايا ونشوف هنعمل إيه!
_قصدك هتعملى إيه! روحى المستشفى فى أقرب وقت أنتى كده هتنقلى المرض للمنطقه كلها
.................. .................... ................
_بتعملى ايه يا ماما؟
_هتصل بالمستشفى يجوا ياخدوكى
_العزل وحش أوى، أنا بخاف وأنا لوحدي
"لا حياة لمن تنادى!"
بسرعة جابت الكحول ورشت لنفسها ولبابا كمان
...........................
_أنتى إزاى تتجرأى و تهربى!؟
_عاملنى بإسلوب أحسن من كده أنا مش ف سجن
_لأ أنا مش حابب أتعامل مع اللى زيك خالص، هشوفلك دكتور تانى يشرف على حالتك
_يبقى أحسن بردو
......... .........
مكنش بيهون عليا فالمكان ده غير القرآن، مسكت المصحف وقعدت أقرأ فيه
_غريبة! ده قالولى إنك مريضة متمردة بس الظاهر إنك غير كده
بصيت للشخص اللى بيتكلم ولما عينى جت فى عينه...
_أنت!!
_ثوانى، يعنى لما شوفتك بتجرى كنتى هربانه م المستشفى!؟
_عاوز إيه؟
_أنا دكتورك الجديد
_........
_تعرفى!؟ كان نفسى أشوفك تانى
_ليه يعنى
_عجبتينى من أول مرة شوفتك
_ و ده من إيه إن شاء الله!
_حبيت شكلك بالكمامه
_هنهزر بقا!
_لأ بتكلم بجد
_.............
_عموماً ده الدوا بتاعك، يلا خديه
_مش هاخد حاجه، عاوزة امشى من هنا بسرعه
_ما أنتى مش هتمشى غير لما تخفى
_لأ مش عاوزه أخف وأروح بيتنا، أنا عاوزة أمشى خالص
_مالك؟
_والله مش مجبورة احكى مشاكلى لدكاتره
_بس مجبورة تاخدى الدوا والحقن بعد شوية لما تيجى الممرضة، اتفضلى
سابنى ومشى
_مش هاخد حاجه
بصلى تانى: هتاخديهم
_أنت اسمك ايه؟
_والله مش مجبور أقول اسمى لكل المرضى
طلع ومجاوبنيش، وفعلا اخدت الدوا بس لإنى أضعف من التعب، لازم أقاوم
فالمستشفى كانوا بيقوموا بدورهم وزيادة تعقيم وكشف والحفاظ ع مواعيد الأدوية
علطول كنت لوحدي، ده طبيعى ما أنا ف عزل
أنا عمري ما انتظمت فالصلاة بس اليومين دول مسبتش فرض
تفتكروا ممكن يكون ربنا ابتلانى عشان أقرب منه!؟
دايما كنت بدعى إن انتظم فالصلاة
تفتكروا الإبتلاء ده مقابل تحقيق الدعوة!؟
_لسه مش هتقولى اسمك؟
_مناعتك ضعيفه جداً
_عارفه، علطول بيجيلى برد فالصيف
_طب طالما عارفه محصنتيش نفسك ليه؟
_ازاى؟
_تاكلى خضار كتير، وتشربى حاجات سخنه، البرتقال حلو جداً، معلقتين عسل اسود الصبح ميضرش
_مكنتش متوقعه إن كورونا هيسيب العالم كله ويجيلى
_ده بس علشان تجيلى هنا
_نعم!
_5 أيام عزل كافيين إنك تقعى ف غرامى؟
_كلامك الهزار ده بيضايقنى
_أو كلامى الجد
_وبعدين بقا!
_مكنتيش بتغسلى إيديكى بالماية والصابون علطول ليه! مكسله رشى كحول
_مكنتش متوقعه إن كورونا هيسيب العالم كله ويجيلى
_ده بس علشان تجيلى هنا
_أنا عمرى ما شوفت شكلك، ينفع تشيل الكمامه؟
_للأسف معاكى هنسى إنى دكتور، أشيل الكمامه ومالو
كان لسه هيشلها بس وقفته
_لأ استنى
_إيه؟
_مش هعرف أكمل علاجى من غيرك، مين هيشجعنى! أنت لو شيلتها هتبقى بكرة معزول فالأوضة اللى جنبى
_طب خفى بسرعه علشان تشوفينى
_هو أنت على طول كده؟
_مش فاهم؟
_متعود تعاكس المرضى؟!
_أنا ماشى
واحد اتخلى عنى أول ما عرف مرضى والتانى مش همه المرض وبيتحجج عشان يجيلى
_ميعاد الدوا يا آنسه داليدا
_تعالى يا صباح، هو الدكتور روح ولا إيه؟
_د/جاسر!؟ لأ موجود بس مشغول شويه
_اسمه جاسر...
_متعرفيش اسمه؟
_لأ
كان اليوم الوحيد اللى مجاش اطمن عليا فيه، مجاليش نوم طول الليل وافتكرت عيلتى وافتكرت حسام...
حسيت بطبطبه من حد: داليدا! بتعيطى!
_أنت لسه هنا!
_وأنتى لسه منمتيش!
_لأ
_مالك؟ بتعيطى ليه؟
_.......................
_عاوزة تروحى؟
_لأ
_طيب مالك؟
_صعبانه عليا نفسي، خطيبى سابنى أول ما عرف مرضى
هو الڤيرس ده وحش صح! أنا هموت؟
_لأ هتخفى، وهترجعيله
_مستحيل، ده أكتر حد كسرنى
_طيب بنفكر فى القديم ونزعل ليه! كلها اسبوع وهتمشي من هنا
_يارب
_يلا علشان تنامى
_مش جايلي نوم
_هقرألك قرآن لحد ما تنامى هطلع
_ماشي
..... ....... .......
"بعد اسبوع"
_للأسف نتيجة التحليل ظهرت
_لسه عندى! أنا كنت عارفة حظى
_آنسه داليدا تقدرى تروحي حالا مبقاش عندك أى حاجه
_احلف
_والله
_يعنى أروح عادي مش هتيجوا تاخدونى!
_لأ خالص
_يعنى خلاص همشى؟
_أيوة
كنت بتنطط م الفرحة زى العيال الصغيرة، بس قبل ما أمشى وقفت قدامه...
_عاوزة أعمل حاجه
_إيه؟
شيلت الكمامه عشان أشوفه، بصيتله كتير
_اسبوعين عزل كافيين إنك تقعى ف غرامى؟
اتكسفت سيبته ومشيت
_داليدا
_نعم
_سيبيلى عنوانك
_ليه! مش قولتلى مش هتيجوا تاخدونى؟
_أنا اللى هاجى أخدك، هخدك عندى
"أحبنى قلبٌ لا يعرف الخذلان، أحبنى رجلٌ"
الكورونا فيرس ضعيف جداً وسهل محاربته بس مشكلته ف سرعة انتشاره.. لازم كلنا نتبع طرق الوقاية عشان نعدى الفترة دى على خير
ويا عالم يمكن ربنا بعتلنا الإبتلاء ده عشان يقربنا منه
مستنية رأيكم فالقصة
#إلهام_صلاح
- عاالم مختلف ) " 💛✨
