حياتي زي حياة أي بنت عادية جدًا حاسة دائمًا إنها وحشة، الاحساس بالنقص بيوجع صاحبه، خصوصًا لو كانت بنت شايفة نفسها أقل من أي بنت تانية، شايفة نفسها مش حلوة وضعيفة ووحيدة، بتتعرض كل يوم للاحباط وتكسير المقاديف في مجتمع مشوّه، والمعايير فيه متلخبطة ولما تعمل حاجة صح تلاقي معظم الناس ضدك، ولما تبدأ تقلد الموجود وتبقى زيهم تلاقي كل التشجيع والدعم حتى لو كنت على باطل!
اتخرجت من الكلية، مجتمع مختلف تمامًا عن الثانوي، اختلاط.. علاقات تحت مسميات غريبة.. بنات شكلها أغرب.. ولاد شكلها عجيب.. اسلوب حياة مختلف وأفكار شاذة.. حاولت أكون في حالي ومحتكش بحد، دائمًا كنت لما أشوف بنت وولد قاعدين مع بعض كنت ببقى نفسي أكون مكان البنت، عمر ما حد قال لي بحبك! مكنتش بعرف ألفت نظر حد ليَّ!
يعني أنا وحشة ولا حلوة! مش عارفة بس كنت عادية جدًا مفيش في ملامحي أي حاجة مميزة، كل سنة كنت بقول لنفسي أكيد السنة دي هقابل فتى أحلامي، أكيد السنة دي في حاجة هتتغير!
خلصت الكلية واتخرجت.. وأنا زي ما أنا.
اشتغلت، كان عندي احساس دائمًا إِني شفافة أو لابسة طاقية الإخفاء! ما هو مش معقول محدش واخد باله مني خالص! طب المشكلة فين؟ فيَّ أنا؟ في شكلي؟ في الحجاب؟
أصل لازم يكون فيه حل! مش هفضل كده عايشة وسنين عمري بتضيع وأنا مخنوقة ومتغمية ومش عارفة رايحة على فين!
الحجاب فعلًا بدأ يكون عائق بالنسبة لي وأنا شايفة بنات كتير حلوة، بتلبس كل اللي نفسها فيه، بتحط مكياج، بتفرد شعرها، حاسة إنها حرة مش متقيدة بحتة قماشة!
العرسان.. فقدت الامل فيهم، كل اللي بيتقدم عايز واحدة جميلة أي واحدة جميلة وخلاص أنا أو غيري مش هتفرق!
وأنا اللي يعجبني.. أنا معجبهوش ولو حبيت حد اكتشف إنه مرتبط، أو أصغر مني أو بيعتبرني أخته.. أكيد المشكلة فيَّ أنا!
ماما أنا هخلع الحجاب.
...
مكنش عندها أي مشكلة ! هي كانت شايفة أصلًا إِنه عقبة في طريقي عشان أبين للناس أد إيه أنا جميلة!
خلعت الحجاب.. الدنيا كانت حلوة أوي.. بمشي في الشارع حاسة إني طايرة.. حرة.. حرة جدًا.. اتعلمت أحط مكياج اهتميت ببشرتي.. جبت لبس جديد شكله حلو أوي وملفت أوي، بدأت أحس إِن عيون الولاد مركزة معايَّ..
يعني طلعت مش شفافة! أخيرًا حد أخد باله مني!
أصحابي بعدوا عني، معظمهم، بس لاقيت تشجيع كتير أوي على الخطوة دي ولاقيت ناس كتير فرحانة بيَّ، تحديدًا ولاد كتير فرحانين بيَّ ناس كتير شجعوني اكتب بوست على الفيس احكي فيه عن شعوري، و كتبت..
التعليقات كانت غريبة!
شتيمة..
سب..
إهانة..
هتدخلي النار..
تشجيع..
ناس فخورة..
ناس مستنية تشمت..
