برغم كل النجاح اللي وصلت له في حياتي إلا إني مش حاسة بطعمه، أنا بنت عاشت عمرها كله مقررة إنها تنجح ومتخليش أي حاجة تقف عقبة في وش نجاحها..
درست إدارة الاعمال وتفوقت في الكلية وحضرت الماجستير والدكتوراه وأهلي كانوا جنبي شجعوني وكانوا دائمًا نعمَّ السند، بابا كان دائمًا يشجعني عمره ما ضغط عليَّ أو فرض عليَّ شيء حتى أمي دائمًا كانت فخورة بيا وبتتكلم عني بمنتهى الفرحة والفخر قدام أهلها..
لما خلصت الكلية بتفوق عميد الكلية طلبني في مكتبه وعرفت يومها إني بقيت معيدة في الكلية، الفرحة مكانتش سيعاني يااااه أجمل شعور في الدنيا إنك تلاقي ثمرة لتعبك ومجهودك، يومها بابا قال لي لازم تسافري وتكملي دارستك برا وفعلًا سافرت ودرست وتفوقت كالعادة وعملت الدكتوراه في امريكا، وكانت أحلى سنين عمري اللي قضيتها هناك مكنتش بحس إن فيه حاجة نقصاني، ورجعت مصر حياتي بدأت تهدأ شوية والصخب والدوشة اللي كان في امريكا مبقاش موجود في حياتي في مصر.
رجعت شغلي في الكلية بس بعد ما بقيت دكتورة، الحياة كانت روتينية، نوم صحيان بدري شغل خروجات مع أصحابي فُسح، أرجع البيت أقعد مع أهلي شوية وأنام.
لحد ما لاقيت عادل ابن عمي بيتصل بيا وعايز يقابلني، اتصدمت لما عرفت إنه بيحبني !
عادل خريج كلية التجارة بيحبني أنا عايز يتجوزني!
مفكرتش كتير وكان ردي وقتها إني مش بفكر في الجواز..
محدش ضغط عليَّ بابا وماما كانوا شايفين إن عادل مينفعش! بس أنا رفضت بحجة إني مش عايزة اتجوز دلوقت!
هو أنا فعلًا مش عايزة اتجوز؟!
الحقيقة مش عارفة!
بس اتجوز ليه؟ أنا مش محتاجة حاجة ولا ناقصني أي شيء عشان أكمله بوجود راجل في حياتي ممكن يتحكم فيَّ ويكبت كل أحلامي وطموحي!
هو أنا لسه عندي أحلام وطموح بعد كل اللي وصلت له ده؟!!
آهاا طبعًا أكيد عندي!
طب إيه هي أحلامي وطموحاتي اللي لسه محققتهاش؟!
مش عارفة! بس أكيد فيه! بس جواز دلوقت! لأ، لسه بدري..
بعدها بكم شهر عادل اتقدم تاني، وقتها قولت له أنا مش حابة ارتبط لما اصر عليَّ وقال إنه هيستناني صارحته وقولت له إني مش موافقة عليه ومش حابة ارتبط بحد مستواه العلمي أقل مني، وقتها ابتسم لي ابتسامة غريبة وقال لي وإنتِ محتاجة المستوى العلمي في إيه هو احنا هنحضر دكتوراه؟ احنا هنتجوز!
عارفة إننا هنتجوز بس لازم نكون في نفس المستوى عشان نعرف نتفاهم يا عادل!
طب وإنتِ ليه متخيلة إننا مش هنعرف نتفاهم سوا يا ليلى؟
مش متخيلة، بس دا الواقع كل التجارب اللي شوفتها قُدامي كانت بتفشل عشان الاطراف مش مناسبة لبعضها، لازم يكون فيه تناسب.
