" مش عيزاه مهندس ! "
_ مريم متقدملك عريس
= لااااااا
_ مهندس
= انا همشي اديه في اديا و مش هخاف و اخبي
_ طب يلا يا اختي العريس برا
= ايه دا ماله مستعجل كدا ليه انا لسه مسلمتش عليكوا
_ يا بنتي هو ايه هو هياخدك وهو مروح؟
= ايه يا يعني هو عنده غير كدا ؟
_ يا رب ليه خلفتي في البنات كلها هطله كدا استغفر الله العظيم
= يلا يا ماما تلاقي الراجل خلل برا
_ سبحان الله مكنتيش كدا في الي قبله
= يا ماما دا مهندس
*********************
_ احم أهلا
= أهلا
_ عاجبني كسوفك على فكرة
= كسوف هيهييي
_ نعم ؟!
= اقصد انا كدا على طول مبرفعش عيني في عين بابا
_ ايه ؟ ليه ؟
= عشان انا بتكسف جدا، بتكسف خالص، بتكسف أوي، الله عينك عسلي ايه الحلاوة دي
_ لا واضح جدا
= خير انت عايز ايه
_ افندم ؟
= ايوه جاي ليه يعني
_ انا اتكلمت مع باباكي من شوية كنت جاي طالب ايدك
= تعمل بيها ايه
_ هي ايه دي ؟
= ايدي
_ .......
= ايه مالك قفوش كدا ، انا بهزر معاك لا لا لازم ناخد على بعض اكتر من كدا
_ احم هو دا مش بيت الانسة مريم عامر بردو
= ايوه يا سيدي و انا مريم و الي كلمته دا بابا و الي قدامك دي تربيزة الصالون ها ايه تاني
_ انتِ بتعملي كدا عشان تطفشيني هاه ؟
= لا و انا هعوز اطفشك ليه وانت زي القمر كدا ، ايه دا بتضحك علي ايه
_ انا مشفتش في تلقائيتك
= لا لو بدور على الهيهي مكسوفة و يلاهوي انت ازاي كدا و انا هقع و الحقني هقع من طولي من الكسوف و الرسم دا لا مش عندي
_ طاب يا آنسة مريم أحب أعرفك على نفسي ، أنا مالك دكتور نسا في مستشفي الح...
= ايه استنى ! دكتور !! لا اخنا متفقناش على كدا
_ نعم ؟ متفقناش علي ايه
= انا شيرت بوست وقلت مش عيزاه مهندس تقوم جايلي دكتور
_ ثواني بس افهم
= وست الحبايب داخلة تقولي مهندس !! طاب ثواني يا دكتارة اوعي تتحرك من مكانك جيالك و اوعي تدب ايدك في الجتوه على ما جيلك
**********
_ كدا بردو يا ولية تقوليلي مهندس ويطلع دكتور عليه كريم كراميل !
= يخربيت سنينك انتِ سايبة عريسك و ..
_ دا انتِ نهارك مش فايت يا نجوى
= شوف قليلة الادب الي معداش عليها خمس دقايق تربية
_ عيد الام هناك اهو شيفاه
= اه
_ وربنا من جيبالك علبة مناديل حتي
= اجري يا بت خشي لعريسك خلينا نخلص
_ انتِ بتعامليني كدا ليه انا لقيطة صح قولي قولي انك لقياني علي باب جامع قولي
= خشي الله يخربيتك جبتيلي الضغط
_ لا اشربي كركادية روقي دمك ، اما ادخل احرق دم الي جوا دا كمان
******************
_ انا جيت عشان اعليلك الضغط
= ايه ؟
_ لا متخدش في بالك .... هو المفروض اقول ايه
= هو في الحقيقة وانا جاي كنت مقتنع بيكِ
_ اه و بعد ما عرفتني عايز تاخد علبة الجاتوه و تخلع
= بالعكس انا متمسك بيكِ أكتر
_ الهي تنستر
= انا عارف انك كنتي عايزة مهندس بس دكتور نسا مش وحش بردو
_ اوماله يا اخويا حتي نوفر مصاريف الولادة
= اه .. ايه ؟
_ انت مبتشربش عصير ليه ،
نانسي_أشرف
- عاالم مختلف ) " 💛✨
