كان دائمًا بيقول لي إنتِ آخر واحدة ممكن أفكر أتجوزها وأحبها، عمره ما نطقها بلسانه بس أنا مش عبيطة، أنا كنت بفهم كل تفصيلة بتحصل منه كان يقصد بيها إيه وكان بيعملها ليه!
حتى حُبه لسوزان، أنا فهمته من قبل حتى ما هي تفهم إنه بيحبها، معرفش ازاي بنقبل نضحي بقلوبنا ونرميها للي بنحبهم كده بدون مُقابل، هو احنا لاقيين قلوبنا دي في الشارع يعني ولا للدرجة دي قلوبنا رخيصة كده وملهاش تمن!
المرة دي بقى قررت إن مفيش حاجة ببلاش وإن حتى الحب لو كان لعبة مش هخسر فيه، عشان قلبي غالي جدًا، جدًا، وصالح مش هيحب غيري جايز هي لعبة يمكن بس محدش هيكسبها غيري.
احنا بنتحب لما اللي قُدامنا يقتنع إننا غاليين جدًا، محدش بيحبنا واحنا رخاص!
كنت واقفة في المطبخ بعمل قهوة عشان أقدر أسهر واخلص الشغل اللي كان عندي، الساعة كانت حوالي عشرة ونص، سعمت تليفوني بيرن، كانت سوزان، استغربت إنها بتتصل بيَّ واستغربت أكتر إنها بتتصل دلوقت مخصوص!
السلام عليكم، اهلًا يا سوزان
ياسمين هو فيه حد أخد رقمي منك؟
حد مين؟ لأ طبعًا وحتى لو حد طلبه مستحيل أوافق ما يطلبه منك إنتِ!
بشمهندس صالح كلمني النهاردة على الواتس وطلب نتقابل برّا عشان عايز يكلمني في موضوع مهم!
صالح... بشمهندس صالح!!! موضوع إيه؟
معرفش وحتى رفض يقول لي عايز يتكلم في إيه من وقتها عقلي مشغول جدًا ومش فاهمة حاجة!
وإنتِ قُلتِ له إيه؟
في إيه؟
هتقابليه يعني؟
لأ طبعًا لو عنده حاجة عايز يقول لها يتفضل يقولها في المكتب مش هقابل حد! أنا بس اتصلت اسألك بما إننا 3 مهندسات في المكتب بس ومحدش معاه رقمي غيرك إنتِ وهدى، بس كلمت هدى وطلعت متعرفش حاجة برضو
هااا!
إنتِ بتنامي ولا إيه! اسفة كلمتك متأخر.
لأ ولا يهمك أنا قلقت عليكِ بس، على فكرة ممكن يكون اخد الرقم من السكرتارية إنتِ عارفة وفاء مبتحبش ترفض طلب لحد خصوصًا بشمهندس صالح يعني!
إنتِ هتقولي لي ما أنا عارفة، المهم اسفة على الازعاج اشوفك بكرة إن شاء اللّٰه، تصبحي على خير.
وإنتِ من أهله، مع السلامة.
_____
ضاع التركيز، قفلت معاها وأنا مش عارفة افكر غير في سبب واحد يخليه يكلمها غير إنه قرر أخيرًا ياخد خطوة ويطلبها للجواز، كنت مضايقة والقهوة فارت وبهدلت الدنيا، جريت على الحمام اتوضيت ولبست إسدال الصلاة ووقفت أصلي، وأنا ساجدة لاقيتني بعيط ومعرفتش أقول غير لأ يارب، قلبه بطلبه منك، أنا مش عارفة أشوف غيره، سنتين يارب مفكرتش في لحظة اغضبك وأعمل حاجة حرام أو أفكر حتى أقلل من نفسي، سنتين يارب وأنا ساكتة وكاتمة حبه في قلبي سنتين يارب، لأ يارب متخليهوش يتجوزها طلبته منك يارب طلبته منك، وفضلت أعيط ومعرفتش أنام يوميها ولا حتى عرفت أخلص حاجة من الشغل اللي بدأته!
