Lenses ..👀💚
_ ايه دا مش تحاسب
_ على فكرة انتِ الي خابطة فيا
_ وكمان بتقاوح
_ يا ستي الينسيز الي انتو بتحطوها عمياكوا
_ لينسيز !! لينسيز ايه
_ لينسيز .. البتاعة الملونة الي بتحطوها في عنيكوا بتحطوها ازاي يا قادرين
_ احنا قادرين ! ولا انت الي ماشي حاطط السماعة في ودنك ولا داري بالناس الي حواليك
_ مهو انتي لو كنتي مركزة في الطريق كنتي خدتي بالك
_ مهو انت لو مش سايب الدنيا ومنتبه للأغاني كنت خدت بالك
_ بقلك ايخ خلصنا .. انا آسف يا ستي
_ وانا مكنتش مستنيه منك إعتذار أساساً
_ استنى بس رايحة فين
_ انت اجننت انت ازاي تمسك ايدي ؟!!
_ انا انا اسف ..
_ بقلك ايه شغل الهيهي دا مش عليا روح اعمله مع حد غيري
_ مكنتش أقصد أنا ..
_ أنت ؟؟
_ أنا آسف
_ .......
_ ممكن أسألك واقفة هنا ليه لوحدك وفي وقت زي دا
_ مستنية اتوبيس
_ تمام
_ ايه دا ؟!
_ هستناه معاكِ
_ ايه دا لا طبعا
_ ايه دا انا مستنى الاتوبيس انتي مالك
_ انت كنت هتركب تاكس
_ يا ستي غيرت رأيي دا انتي حاجة غريبة جدا
_ طب إتاخر سِنة
_ اهو
_ كمان شوية
_ اهو
_ كمان شوية
_ لا كدا انا هنزل عالرصيف وعربيه هتلطشني
_ متقفش جمبي
_ ليه يا اختي جربان ولا اكونش جربان
_ لا بس خطيبي جاي وبيغير عليا
_ خطيبك ايه يا حجة ، فين الدبلة !
_ ايه دا انت خدت بالك ! قصدي دبلة ايه هو في بين اتنين بيحبوا بعض دبل
_ انتي بتقولي ايه !
_ الله ! مهو انا لازم اقول كدا عشان احمي نفسي من اشكالك
_ ليه يا اختي اشكالي بتعملك ايه
_ كلكوا حمدي الوزير
_ اه ، وحوار خطيبك الي هيجي يضربنا دا بقا الي هيحميكي مش كدا ، فاكس موت يعني
_ منا لو مقلتش كدا هتفتكر اني ضعيفة وتستغفلني وتخطفني تاخد مرادك بقا وترميني مقتولة قدام أي مستشفي
_ يا بنتي انتي هبلة ما دام انا قتلتك هروح ارميكي قدام مستشفي ليه منا قتلتك
_ الله وانا ايش عرفني ما يمكن ضميرك صحي في الآخر
_ يا دي النيلة ، بصيلي كويس دا شكل قتال قتله
_ خطاف خُطفه
_ ايه دا .. دي جديدة في اللغة ولا ايه
_ والله لو ما لعدت عني حالا لصوت والم عليك الناس كلها و امممممم...
_ اششششش ، يخربيت سنينك هتفضحينا !!
_ .......
_ هشيل ايدي من علي بُقك وهتسكتي ، فاهمة هتسكتي !
_ .....
_ هاااا
* وأومأت بالإيجاب *
_ واحد .. اتنين .. تل..
_ وربنا لخليك تبات على البرش انهردا ، الحقونااااي يا ناااس متحرش قاتل حرامي نصاب بيخون مصر اممممم
_ انا فعلا هرتكب جناية حالا
_ .......
_ ايه مالك قلبتي ليه
_ ......
_ هشيل ايدي من على بُقك ، وتتخرسي خالص لحد ما الاتوبيس يجي يخبطك قصدي يشيلك ، قصدي ياخدك
* وأومأت بالإيجاب *
_ مش مطمنلك
_ ......
_ طيب خلاص
_ وربنا ا ...
_ هااااا
_ خلاص خلاص
_ الاتوبيسات اتأخرت ليه
_ مهو اصل انت وشك سمح ما شاء الله عليك
_ انتي لو مسكتيش هرزعك الكتاب الي في ايدي دي في وشك
_ وكمان عاهة مستديمه دا انت هتاخد اقامة مدى الحياة في السجن اممممممم
_ خليكي كدا بقا لحد ما الاتوبيس يجي
*********************
* وتاني يوم *
_ مساء العنبر ممكن النمبر
_ انت تاني !!!
_ بالله كيف عرفت أني لزقة
_ انت عرفت مكاني منين ؟!
_ ياختشي الي يسأل ميتهش
_ .....
_ بس قمر اوي المكان ، مليان ورود كدا و حاجة تفتح النفس
_ جاي تتأمل يعني ولا ايه
_ بصراحة لأ ، كنت جاي أخد لخطيبتي ورد وكنت عاوز أخد رأيك مدام دي شغلتك
_ خطيبتك ! ايدك مفيهاش دبلة !!
_ ايه دا انتي خدتي بالك ! لا مهو اصل مفيش ما بين اتنين بيحبوا بعض دبل
_ لا يا شيخ
_ اشتري مني
_ طيب عايز نوعها يبقي ايه
_ عندك ايه
_ أوركيد - لوتس - بلدي - عباد شمس
_ اوه عباد شمس زي صورك المميزة عالفيس
_ انت كمان جبت الأكونت !
_ لا دنا شبح جدا انتي متعرفنيش
_ لا يا شيخ
_ يلا بقا عشان متأخرش عليها
_ اختار ايه
_ عباد الشمس
_ هتكتب عليه حاجة
_ اسمي ، طارق
****************
_ عريس !
_ ايه يا بنتي هو انا قتلتك ؟
_ عريس ايه يا ماما دنا وقتي متقسم بين الدراسة و المشتل !
_ الله ! الراجل جاي ياخدك على بعضك ومطلبش انك تقعدي من الدراسة
_ والمشتل
_ يا دي المشتل ! هو انتي خلفتيه ونستيه يا بنتي
_ انا قلت انا اندبينداند وومان وعايزة استقل بحياتي ومش عايزة راجل
_ صبا !!! هتقابلي العريس وهتستلطفيه انا عايزة الغسيل يخف شوية من عليا
_ شوف ازاي ! طب ما ساعدك انا في الغسيل
_ لا انتي هيبقي ليكي غسيلك انتي وجوزك
_ متقوليش جوزك !!
*****************
_ قدمي العصير لعريسك يا صبا
_ ميقدمه لتفسه هو اتشل !
_ بنت !!
* قربت منه لكن عنيها جخظت للحظات لما اتقابلت بعنيه ، بصلها بابتسامة خبير *
_ ايه يا صبا وقفتي ليه
_ هاه ، لا ابدا يا بابا اصل ..
_ ممكن اكلمها على انفراد يا عمي طبعا لو مش هيضايق حضرتك
_ لا يا ابني انا موجود جمبكوا اهو
* التفت ليها *
_ مش معقول لسانك الي دايما خارج عن اللجام دا
_ انت ايه الي جابك هنا ؟
_ انا كنت جاي اسلم على الوالد
_ وبوكيه الورد ؟
_ اشتريته من بياعة ورد زي القمر على اول الشارع
_ وخطيبتك ؟
_ مستني اما نشتري الدبل
_ جيت هنا ازاي ؟
_ بالاتوبيس
_ .....
_ طيب بما ان فقرة الأسئلة بتاعتك خلصت جه دوري بقا ، هي دي لون عنيكي الطبيعي
_ بمعني ؟
_ اصل اول ما شفتها افتكرتها لينسيز .. هي عسلي ولا زيتي
_ مش عارفة هي لون عين ماما ممزوجة بلون عين بابا
_ يعني مش لينسيز
_ تؤ
_ طب ايه بقا
_ ايه
_ انا عاوز بنوته عنيها عسلي في زيتي في رمادي
_ رمادي !!
_ اه لون عيني
* ابتسمت بخجل اما هو قرب سِنة *
_ ها قولتي ايه
_ كلم بابا
_ لا انا عاوز رأيك بجد
_ بابا بينادي عليك بجد !
*******************
* وبعد مرور اعوام *
_ بابا يا باباااا
_ يخربيت امك
_ صبا : الله وانا مالي يا لمبي !
_ بابا هو انا لون عيني ايه
* التفت لصبا الي ابتسمت *
_ طارق : ليه بتسألي السؤال دا
_ أصل مروان صاحبي في المدرسة سألهولي
_ طارق : ومروان لون عنيه ايه
_ لونها أخضر
_ طارق : امممم ، ربنا يستر
*****************
_ نانسي أشرف 🍂
