_حمزه انا نازله سبتلك قهوتك عالسفره
=رايحه الدار
_لا الكافيه
=طيب خدي بالك من نفسك
_وانت كمان ياروحي ومتتأخرش ع شغلك يلا باي
"دخلت الكافيه وأعدت ع ترابيزه بعيده دايما بحب أعد عليها وشايفه كل الناس اللي ف الكافيه او أغلبيتهم مش عارفه ايه متعتي ف أني اتأمل وشوشهم وملامحهم وأرسمهم بعد ماأتخيل قصه لكل واحد من ملامحه واللي بشوف ع وشه الحزن بحب أمحي الحزن من ع وشه ف لوحتي "
_امممم ياتري الاختيار ع مين النهارده
"طلعت الاسكتش بتاعي وشغلت الميوزك اللي بحبها بعد ماطلبت قهوة ووقع اختياري ع بنت كانت اعده مع صحبتها تقريبا وكان باين انها زعلانه رسمتها بس بملامح مبسوطه يمكن مقدرش اشيل زعلها ف الواقع بس بعمل كدا ف رسوماتي"
"خلصت رسمتي وقررت امشي بس لفت انتباهي صوت ضحك ببص لمكان الصوت لقيت شاب قاعد مع صاحبه اول مره اشوفه هنا ملامحه حلوه اوي وهو بيضحك عنيه وغمزااته دقنه ملامحه شدتني وبدءت ارسمها لحد ماحاسب ومشي "
"مشيت انا كمان ورحت الدار بقضي فيه اغلبيه وقتي بضحك وبهزر مع الاطفال وبعلمهم الرسم وبلعب معاهم بحكم اني مليش اصحاب وبحس الاطفال دي شبهي انا اه عشت مع بابا فتره انا وحمزه اخويا بس مكناش اولوياته واللي اهتم بينا وبتربيتنا تيتا وجدو الله يرحمهم "
_الو ايه ياحمزه
=لسه ف الدار؟!
_اه انت روحت ولا أيه؟!
=اه عموما خليكي هعدي عليكي وناكل بره ونقضي باقي اليوم سوا فسحه اي خدعه ياستي
_تسلم يارجوله مستنياك
ضحك=رجوله !بيئه اوي
_بطل رغي يلا مستنياك انجز
"حمزه اخويا الصغير بس رغم كدا بحسه الكبير من اهتمامه بيا وع طول بيفرحني هو كل صحابي وكل أهلي "
=ها يستي مبسوطه
_ربنا يخليك ليا ياحياتي يلا غير هدومك وتعالي نتفرج ع افلام رعب سوا
=رعب يا حياااه
ضحكت_رعب ياحمزه
"رحت الكافيه تاني يوم وللصدفه شفت نفس الشاب تاني بس كان لوحده وماسك كتاب بيقراه وكان مركز جدا كانت ملامحه هاديه وجميله تشدك انك تفضل تبصلها طلعت الاسكتش بتاعي ورسمته للمره التانيه وهو مركز ف كتابه"
"فضلت كدا شهرين بشوفه كل يوم اوقات لوحده وبيقرا او بيشتغل عاللاب بتاعه او مع اصحابه وطول الشهرين مش برسم غيره "
=ياحياة دي تالت مره اصحيكي انا هنزل بقا
رديت من غير ماافتح عيني_هي الساعه كام
=11
قومت بسرعه_وسايبني نايمه كل ده وكمان محضرتش ليك الفطار
=دي تالت مره اصحيكي بس اقول ايه بقره نايمه
حدفته بمخده_انا بقره يا....
رجع حدفني بالمخده=لما ارجع نبقا نتخانق هتأخر دلوقتي انا نازل
_فطرت طيب
=اه يلا باي
"رحت الكافيه وانا واثقه اني مش هلاقيه لانه بيروح ع حدود الساعه 10 يطلب قهوته ويخلص شغل لو كان لوحده ويمشي الساعه 11 "
