لما كنت رافضة فكرة الجامعة وإني ليه أكمل تعليم يعني؟ طالما بابا موفر ليَّ كل حاجة أنا عايزاها، وهشتغل مع بابا في شركته، اتعرفت على شخص وقتها خلاني أحب الدنيا واقنعني أغير وجهة نظري في موضوع الكلية وقدمت، فضلنا نتكلم حوالي أربع شهور، كان حقوقي ومنضم لمؤسسة تبع منظمة حقوق الإنسان، كان مهووس بعلم النفس والأدب الانجليزي كان شخص غامض عمري ما عرفت أكتشفه من جواه كنت ساعات بحس إنه سفاح ومُجرم بيحاول يخفي شخصيته الحقيقية وساعات بحس إنه طفل نفسي أخده في حضني، مش هكذب وأقول اعجبت بيه!
..
أنا حبيته، برغم إني مكنتش بعرف أتوقع ردود فعله وبرغم إنه كان شرير في بعض الأحيان في ردود فعله دي بس كنت بحب استفزه عشان شكله المسالم مكنش بيجذبني أكتر من ردود فعله الشريرة وضحكتي أول ما أعصبه ويفهم إني كنت بعصبه ويفضل باصص في عنيا كأنه بيقول لي إنتِ بنت بريئة جدًا وساذجة بلاش تحاولي تخرجي الشخص الشرير اللي جوايا، كنت بحب كل نصايحه ليَّ كأني طفلة صغيرة لسه أول مرة تخرج لوحدها للعالم مع حد كبير!
..
بلاش تهزري مع ده بلاش تضحكي بصوت عالي كده، بلاش اللبس الضيق ده، خليكِ بنت عندها حياء، بلاش تتكلمي معايا أو مع أي راجل بالنعومة دي، خليكِ جد مع الأغراب، توقعي أي حاجة وحشة من أي حد في أي وقت، متأمنيش لحد بسهولة، بطلي تبقي ساذجة كده، قولي رأيك من غير خوف حتى لو حاسة إنه غلط وأنا هساعدك تصلحيه!
..
أي بنت مكاني كانت غصب عنها لازم تحبه، لأني عمري ما دخلت حد في حياتي بالشكل ده تحديدًا في المساحة دي، المساحة اللي بنحط فيها حد في مكان عالي ونتعلم منه ونحكي له أخطاءنا عشان هو يأكد لنا إننا مش وحشين وإن جوانا لسه نضيف، حد يقبلنا بكل النقص اللي فينا، حد يحطنا جوا قلبه زي ما احنا سبق وحطيناه جوا قلبنا برغم كل العيوب اللي شوفناها فيه والغموض اللي خوفنا منه بس كنا بنكمل على أمل احساسنا بإن جواه لسه نضيف وفيه حاجة حلوة تستحق نعافر معاه عشانها!
..
كانت الصدمة وقت ما قولت له إني بحبه، وإني مش عايزاه في حياتي مجرد حد ملهوش مُسمى أنا عايزاه معايا دائمًا!
مش فاهم يعني إيه بتحبيني؟
يعني بحبك! هي ليها كم معني؟
أقصد يعني من إيه ده؟ حبتيني على أساس إيه؟
مش هو ده الرد اللي المفروض تقوله على فكرة!
آسف مقصدش، بس مستغرب!
وإيه الغريب في كده؟ إني حبيتك ولا مستغرب إنك ممكن تتحب؟
لأ على فكرة إنتِ مش أول بنت تعترف لي بحُبها! أنا بس بستغرب إيه اللي بتحبوه فيَّ أنا مبعملش حاجة زيادة مع حد بعامل كل الناس بنفس الطريقة!
