-بس انتي ازاي استحملتي واحد مابتحبيهوش خمسه وعشرين سنه!
-ومين قالك اني ماحبتهوش انا ااه يمكن اتجوزته غصب بس مع الوقت اتعودت علي وجوده وبقيت مطمناله، الدنيا كانت بتخبط فيا بس هو كان سندي، جبت منه بنتين وولد هما احلى حاجه ف حياتي واحلى عوض ليا، الحب بتاع المراهقه حاجه والحب بعد الجواز حاجه، الحب بعد الجواز بيبقي عباره عن امان وسكن انك لما تسمعي مفتاح باب الشقه وهو داخل عليكي تبقى بالدنيا واللي فيها، سيبك من قلبك وامشي ورا عقلك، اختاري صح ونصيحه كمان اسمعي كلام اهلك.
سابتني ومشيت زي ما قعدت اتكلمت معايا من غير استأذان زي ما يكون ربنا بعتها اشاره ليا بعد كل الحيره اللي انا فيها، بصيت ع النيل والشمس بدأت ف الغروب، بحب اجي هنا واقعد لوحدي لما ببقي عايزه افكر وعمري ما رجعت مكسوره الخاطر، دايما برجع وانا معايا مفتاح للحل او دليل امشي عليهف كلامها واربطه باللي حصلي الفتره الاخيره.
ف نفس الوقت ده سمعت صوت اتنين بيتكلمو جمبي ماكنوش بيتكلمو على اد ما بيتخانقو كان صوته عالي اوي وبيكلمها باسلوب مش كويس قدام الناس برغم انهم شكلهم متجوزين قريب، زي ما لفت انتباهي راجل ستيني ومعاه زوجته اللي ملامح الكبر بدأت تظهر على وشها كان ماسك ايدها بحنان وهي كانت سانده على كتفه قدام النيل كان شكلهم مبهج اوي! دايما بسأل نفسي معقول هختار الشخص اللي هوصل معاه للمرحله دي ولا اختياري هيبقي غلط زي الشاب اللي مش محترم زوجته اللي جمبي من الناحيه التانيه، العلاقات عموما معقده ومش سهل نفهمها زي مش سهل ابدا نختار شريك حياتنا، دايما عندي خوف غريب إتجاه الموضوع ده، خايفه اختار غلط، خايفه إن الطرف التاني يتغير بعد الجواز واكتشف اني مع شخص معرفهوش، خايفه اكتشف قسوته بعد الجواز واللي كان بيخبيها ف حنيته المصطنعه ف فتره الخطوبه ،خايفه من حاجات كتير اوي وهي السبب اللي جابني هنا النهارده، بس انا خدت قراري خلاص!
-مساء الخير يا أهل البيت الكرام ، ماما انتي فين!
-شششش وطي صوتك انتي جايه بهيصه ليه كده
-ليه في ايه!
-في ضيوف ف الصالون
-صحاب اخويا دول ولا مين؟
-لا ده العريس جاي يشوفك
-نعم! عريس! هو مش انا رفضته برضو، هو في ايه!
-ماهو صمم ييجي يقعد معاكي وابوكي ماحبش يكسفه
-اوك ادخل انا اكسفه
-يابنتي استهدي بالله رايحه فين
-ايه هو انا مش مفروض هدخل برضو ولا ايه!
-بس براحه يابنتي عيب الراجل ف بيتنا
-على اساس انه احترم رغبه اهل البيت هه.
دخلت الاوضه بصيت على كل اللي قاعدين عيني وقعت على العريس وبعدين قعدت جمب بابا وحطيت رجل على رجل
-مساء الخير
كنت عارفه إن بابا اضايق من تصرفي وهيعاقبني عليه بعدين بس انا دماغي ناشفه ومابحبش ابداً حد يمشي كلمته عليا، كلهم سكتو عن الكلام لما انا دخلت واللي قطع السكوت صوت بابا وهو بيسحب اخويا من ايده وبيقول هنقوم نصلي العشا ففهمت انه هيسيبنا مع بعض وده اللي انا كنت عايزه
-خير يا بشمهندس
-ازيك يا ندي
-الحمد لله، خير برضو
حسيته بدأت يتوتر
-احم انا كنت جاي اطلب ايدك و..
-وانا رفضت!
-وانا لسه عايزك وعشان كده اتقدمتلك تاني
-بس انا ماغيرتش رأيي ولسه رافضه
-طب ممكن اعرف ايه اسباب الرفض يمكن احاول اشيلها ! انا متمسك بيكي
-مش مهم
-بس انا من حقي اعرف الأسباب دي ايه!
-وانا احب احتفظ بيها لنفسي
-انتي ماتعرفنيش ،انا مش سهل عليا اني اضيعك من ايدي ومش هسيبك.
-يبقي بتتعب نفسك ع الفاضي، مصطفي انت حد كويس والف بنت تتمناك غيري
-بس الالف بنت ما يلزمونيش انا مش عايز غيرك
بدأت اتوتر انا وكان لازم انهي المقابله دي بأسرع وقت انا مش هرجع ف قراري
-انا خلصت كلامي بعد اذنك
-هستني رأيك من والدك
-اظن انه مالهوش لزوم
