-هتتجوزي حـظابط يا هبلة اعقلي .
قعدت جمبها وربعت ايدي
_مش عايزه اصدمك ببس بيبقى عنيهم زايغة وبيحبلك عشرتلاف واحدة اشكالهم ملونة كده ايشي اصفر وايشي احمر وايشي اخضر تقوليش اشارة مرور لا وكمان مش بيكفيه
-ايه ده بجد ده بجد؟! صحيح بالله؟؟
_اسكتي انتِ هطله ومش عارفه حاجه انا بوعيكي
-انا بدأت اقلق
_وكمان لو كرهتيه او زهقتي وعوزتي تسيبيه وطهقتي من العيشة معاه هيهددك بالسلاح وممكن يلبسك قضية كده ولا كده وتروحي فداهية.
-والله أنتِ باينك معاكِ حق وأنا بدأت اقتنع بكلامك، بس يا ندى طيب ده كل البنات في الحي هنا هتموت وتوقع ظابط فديل فستانها وأنتِ اقنعتيني الصراحة وكلامك دخل دماغي بس يعني لو متجوزناش ظابط هنتجوز ايه احلى من كده؟
قومت وقفت وسندت عالسور بتاع السطح وبصيت على سطح بيت سليم اللي بعد بيتنا بـ بيتين
اتنهدت وبعدين بصيتلها
_ياهبلة دول بنات مخها طاقق وعقلها مهفوف كلمة بتجيبهم وكلمة بتوديهم لكن احنا مش زيهم أكيد ولا أنتِ زيهم؟
هزت راسها بـ لا فـ كملت
_عاقلة وشاطرة وبتفهمي ،احنا بنات عاقلين منقعش فواحد صابغلي شعره ولا واحد نافخلي صدره وماشي يرسم على دي ولا دي احنا لما نقع، نقع في واحد عليه القيمة ويستاهل وقعتنا اصل يعني مش هنقع الا مرة واحدة ولا ايه؟
بصتلي وضحكت
-والله كلامك حلو وعجبني اوي يا بت يا ندى
_هو أنا عمري قولت حاجه وحشة يابنتي
-طب قوليلي بقى الحليوة اللي احنا المفروض هنقع فيه ده المفروض يبقى عامل ازاي ؟
_الحليوة ده ياستي يبقى طويل كده زي عمود النور اللي تحت بيتنا ده ،ويبقى قمحاوي شوية يعني لا هو أبيض ولا هو أسمر الشمس سايبه أثرها فيه ،وعيونه تبقى زي عنيا كده عسلي زي لون العسل وأحلى ودقنه خفيفة ودمه أخف و و...
-يوه! أنتِ عماله توصفيلي فشكله وكأنه بني ادم بحق وحقيقي، ما تقوليلي كده الأفندي ده بقى هيبقى شغال ايه مثلًا ؟
_احم ..يكون ،يكون مثلًا باشمحاسب ،باشمدرس كده او باشكاتب مثلًا
-زي سليم أخويا .
لما قالت اسمه بصيتلها وأنا وشي مولع نار، لتكون حست ولا حاجه لقيتها بتبص قدامها ومش مركزة فكملت وأنا بتوه عالموضوع
_ايوة مثلًا يعني
-تصدقي يا بت يا ندى الصفات والمواصيف اللي أنتِ عماله تقوليها دي والله تحسي أنك بتوصفيلي فـ سليم أخويا!
بصيتلي وهي بتضحك جامد وكملت
- الله! والله دي تبقى حكاية لو حصل واتجوزتيه،ايه رأيك يا بت يا ندى؟
بلعت ريقي بالعافيه ومسكت ديل الفستان لفيته على ايديا زي ما بعمل اما بتوتر كل مره ورديت عليها
_والله أنتِ ما وراكي حاجه غير الهزار يا فاطمة، دلوقتِ تتأخري على طنط وترجعي تقوليلها ندى اللي أخرتني
حطت ايدها ع بوقها وخبطت راسها بايديها التانيه
وقامت بسرعة لبست جزمتها وقالتلي وهي بتحط الطرحة على راسها
-والله أتأخرت فعلًا وأمي هتهزأني، أكيد سليم زمانه رجع من الشغل وأنا سبتها تجهز الأكل لوحدها ،أما ألحق أروح أخدلي كلمتين فجنابي .
