كنت واقف وتقريباً بحسم قراري
دي تالت مرة اجي اقف نفس الوقفة دي ع مفيش انا فعلاً ضعيف ..
لما شوفتها ع بُعد اربع امتار تقريباً كانت بتعيط ..فضلت واقفه لفترة مش طويلة وانا مركز معاها مكانتش بتتحرك كانت واقفة بتعيط وبس مكانتش حاسه بوجودي حتي
فوقت من تركيزي علي حركتها
اتوقعت انها تعمل كده بالفعل طلعت وقفت فوق السور
وقتها مفكرتش غير فانه لا مينفعش اسيبها
اي نعم كنت متناقض مع نفسي انا لي همنعها دلوقت !
-ي انسة !
التفتت ع صوتي وبصتلي بهدوء
كانت عيونها غرقانة ف دموع ولونها احمر من البكا ..
_ابعد متقربش ..اياك تقرب
-طيب طيب اللي انتي عايزاه ..بس اكيد مش هتخسري حاجه لو اخدت من وقتك خمس دقايق نتكلم فيهم
حاولت اجاريها ف الكلام بس علشان اقدر اوصلها
_انا معرفكش علشان اتكلم معاك
-مش انتي خلاص قررتي تنهي حياتك ..اكيد مش هتفرق تعرفيني او لا هما خمس دقايق بس
_عايز اي؟؟
-هتعملي كده لي؟
_يهمك ف اي؟
-حابب اعرف ..اول مرة اشوف حالة زي كده ،فحابب اعرف السبب
_مفيش سبب لاني افضل ..طاقتي خلصت خلاص انا تعبت
_مفيش ولا اي سبب ضئيل يخليكي تمسكي فيها علشانه ؟
سكتت شوية وبصت تحت ..
الناس كانوا صغيرين اوي والاماكن نفس الحال ..كنا ف الدور السابع الاكيد لو حد نط من هنا مفيش ولو فرصة ضئيلة انه يفضل عايش
هيبقي حلو احساس انك هتفارق بس مش هترجع
_دايماً بيسيبوني وبيرجعوا يلاقوني واقفه مكاني انا اضعف من اني ارفض رجوعهم بس ..انا ..انا مش لعبة يسيبوا ويرجعوا وقت ما يحبوا انا فعلاً تعبت ،تعبت جداً .
كانت بتتكلم بنبرة قوية تبين قد اي هي موجوعة وقلبها محروق
مسحت دموعها بسرعة وكملت
_علشان كده ..انا خلاص قررت انا اللي همشي المرادي بس ..انا مش زيهم لما امشي مش هرجع خلاص
-كده المشكلة اتحلت !
_مبقاش مهم تتحل او لا ..احساس جميل انك تبقي طاير ف الجو ..حتي ولو لدقايق ،بدون اي قيود هتحس انك حر ومفيش حد متحكم فيك ..اي نعم انا معنديش جناحات بس ده ميمنعش اني اجرب اطير
-هتموتي ..الاحساس الجميل مش هيفضل صدقيني الوجع هو اللي هيحل محله
_ وقتها مش هحس ..وقتها كل حاجه هتبقي انتهت ..كل حاجة فعلاً انتهت ..في كل مرة مكونتش محتاجة اكتر من انه يقولي ان هو معايا انه موجود علشاني بس كده ،هو حساها كتير عليا هه ..فعلاً كل حاجه انتهت ..
سكتت وغمضت عينها عرفت ساعتها انها حسمت قرارها وهتعملها ...كانت اقوي مني بمراحل
شوفت جسمها كله بيميل لقدام وفردت ايديها كانها بتطير محستش نفسي الا وانا بشدها ..
وقعت بين ايديا بصتلي لثواني وغمضت عينيها ..
******
لما فوقت كنت في مستشفي معرفش اي جابني هنا او اي اللي حصل ..اخر حاجه فاكراها هي لون عينيه ..مش قادرة افتكر اي حاجه غير كده
-الحمدلله ع سلامتك ي انسة
_ها..انا انا اي جابني هنا !
-الاستاذ اللي كان معاكي كان نايم برا طول الليل تقريباً بس معرفش راح فين ؟ ..اطمني انتي دلوقتي كويسة بس حاولي متتعبش نفسك بس
_اسمه اي؟
_مش عارفه والله
-ممكن لما ييجي تخليه يدخل اشكره
_حاضر
********
فضلت قاعد ف المستشفي مستنيها تفوق انا اصلاً موراييش حاجه غيرها ولا حد يهتم بغيابي .....كان عندها انهيار عصبي ،واضح انها تعبانه جداً
معرفش نمت ازاي بس نمت تاني يوم الصبح روحت اجيب اكل ليا وليها اكيد لما تفوق هتكون جعانة ..
-الانسة فاقت وسألت ع حضرتك وكانت عايزه تشكرك
_اقدر ادخل ؟
-اكيد ..
خبطت ع الباب وسمعت صوتها بتسمحلي بالدخول
ودخلت ..
-عاملة اي دلوقت ؟
_الحمدلله كويسة
-جعانة؟
سكتت ومردتش
_بصي انا جعان فاكيد هتاكلي معايا
مستنتش انها ترد وقعدت جمبها ع الكرسي وطلعت الاكل وبدأت اكل ..
-لو هتفضلي مكسوفة كده فمش هتلحقي حاجه وهاكله كله وانا بصراحة بحب الاكل اووي
_هاكل
بدأت تاكل وكان باين جداً انها جعانه ..كانت طفلة جداً وهي بتاكل شكلها كان مضحك اوي
احترت بين انها مكانتش راضيه تاكل لانها مكسوفة ولا لانها بتاكل بطريقة مضحكة ؟
افتكرت اني معرفش اسمها حتي ! ي تري ممكن يكون اسمها اي ؟!
-بتبصلي كده لي؟
صوتها فوقني من شرودي ..كنت سرحان فيها وكأنها فاجئتني بسؤالها ..بصراحة ارتبكت !!
_هاا..لا ده انا سرحت شوية مقصدتش
_اممم ،اسمي ندى وانت ؟
-تيم ..اسمي تيم
_تيم!
-اسم غريب صح ؟
_غريب شوية بس حلو
-شكراً
_نبقي صحاب؟
-بقينا صحاب
*******
-ندى ،انزلي نشرب قهوة
_خمسة واكون عندك
