واقفة قدامي عادي كأنها بريئة معملتش حاجة والراجل واقف جنبها رقبته بتنزف في المواقف اللي زي دي لازم تكون خايفة وبتبكي بس هي مكنتش لا خايفة ولا بتبكي كانت بتدور على حاجة في شنطتها!
إنتِ يا آنسة إنتِ متوقفي عدل بتدوري على إيه؟
استنى بس!
ردي عدل على الباشا يا بت
إنتِ بتزُقني زي الحلوف كده ليه؟ متمدش إيدك تاني عشان متتكسرش
بس يا ابني امشي اطلع برا، وإنتِ اقعدي ساكتة مسمعش صوتك فاكرة نفسك فين هنا؟
فاكرة نفسي في قسم الشرطة اللي هي في خدمة الشعب
دا كان زمان ياماما
طب أنا عايزة اعمل مكالمة أنا مش متهمة أنا كنت بدافع عن نفسي من حقي أعمل مكالمة واحدة على الأقل
تعالي اخلصي دقيقة واحدة
..
كنت فاكرها هتتصل بحد يجي لها القسم بس لاقيت تليفونها بيرن !
الحمدللّٰه لاقيته اهو بص حضرتك هوريك حاجة
هتوريني إيه استني بس، هو إنتِ طلبتي تعملي مكالمة عشان ترني على نفسك؟
أيوه مكنتش لاقية تليفوني أعمل إيه! وقت المشكلة والخناقة نسيت وحطيته في شنطتي طلع في قعر الشطنة اهو أنا عايزة أوريك حاجة مهمة أصلًا الشوال اللي بتقول عليه في سن أبويا ده أساسًا شغلانته يتحرش بالبنات في النفق وأنا شوفته بيتحرش قبل كده وصورته واتفضل شوف بنفسك
بيتحرش وزفت إيه إنتِ كنتِ هتدبحيه!
لأ ثواني أنا مدبحتش حد، بس لو حد فكر يقرب لي هيندبح طبعًا لكن اللي أنا عملته ده ثقب بسيط في رقبته يتخيط عادي احنا درسناه في الكلية متخافش يعني!
مخافش إيه! إنتِ كم سنة يا بنتي هاتِ بطاقتك، تدبي القلم الجاف في رقبة الراجل وتقولي محصلش حاجة!
ايوه واقف زي الشحط اهو، أنا أصلًا جاية أقدم فيه بلاغ
وأنا كمان دي كانت هتقتلني
ما إنتَ تستاهل بصراحة
بس إنتَ وياها، احنا فين هنا، البلد مفيهاش قانون! عشان تعملي فيه كده؟
وأنا دراعي راح فين؟
بس مسمعش صوتك هاتِ الزفتة بطاقتك ولا عايزة ترني عليها هي كمان! اخلصي هو يوم باين من أوله
..
بعد أكتر خمس من ساعات كانت مشيت ومرضيتش تتنازل عن المحضر، وهو ثبتت عليه التهمة لأنه طلع عليه محاضر كتير ومشهور في القسم إنه مُتحرش نفق المترو، كان اليوم انتهى طلعت من الشغل على المستشفى قعدت مع أمي شوية زي كل يوم أكلمها وأحكي لها كنت محتاجها بس هي كانت في عالم تاني، داخلة في غيبوبة من أربع شهور وكل يوم وأنا رايح لها ببقى حاطط إيدي على قلبي وخايف ألاقي سريرها فاضي، وصلت تحت البيت بعد ما طلعت من المستشفى وودعت أمي، وبركن العربية سمعت صوت خربشة جامد في عربية قريبة مني، نزلت بسرعة ببص أشوف الصوت جاي منين!
