- حاسس إن مشواري التعليمي هيقف، معقول ممكن اتطرد من الكلية ؟
- تتطرد ! هو محل عصير يا أحمد !
- والله حاسس، قوليلي أعمل ايه
- حد قالك روح ابعتلها جواب وأعمل فيها شاروخان
- أيوة انتي قولتيلي
- أنا يا بني !
- وقولتي كمان أكتر حاجة تدوخ البنت الحركات دي
- لأ، قولتلك خليك راقي، مش سرسجي وتعمل حركات الشباب الغبية دي، تقوم تبعتلها جواب !
- أهي راحت اشتكتني، مبسوطة ؟
- وأنا همبسط ليه ياأحمد، أنا هتمنالك الشر !
- حليها، عاوزك تحليها دلوقت
- احنا نكلمها ونقولها تقول للعميد حصل خير ياكوكو
- تقول للعميد ياكوكو ؟ قومي يامٌهزأة من هنا
- طب والحل ؟
- أنا ضيعت خلاص، خلاص مبقاش في تعليم، يعني مفيش مستقبل !
- الحمد لله مش حياتي.
سكت شوية وبعدين سألته - انت كتبتلها إيه ؟
- ده وقته !
- ماهو لازم أعرف علشان أحل الموضوع
- هتحليه إزاي ؟
- احكيلي بس وبعدين هوريك الشيف حنان هتعمل إيه
- ربنا يستر، قولتلها بسم الله الرحمن الرحيم أ..
- قولتلها بسم الله الرحمن الرحيم ؟ داخل تشقط البنت فبتسمي الله !
- ماهو علشان ربنا يباركلنا.
- يباركلك في الشقط ياموكوس !
- معرفش ياحنان أنا متعود أسمي الله، وبعدين مكنتش بشقط أنا فعلًا معجب بيها
- بلاش الحركتين دول عليا، لو معجب بيها هتروح تتقدم، انت بتسلي وقتك، قولت أيوة بسلي وقتي
- طلعتيني حيوان !
- ماعلينا كمل
- بعدين قولتلها أستاذة أمل أنا معجب بيكي، آسف على إزعاجك و..
ضحكت - أحمد انت طلعت ورور ؟
- إيه ورور دي ماتتلمي يابت.
- مش قادرة أقسم بالله من الضحك، عارف آسف على ازعاجك دي آخر مرة اتقالت كانت في فيلم لعبد الحليم، مش متخيلة شكلك وانت بتكتبها والله.
- والله لو مابطلتي تريقة لأسيبك وامشي
- خلاص خلاص متزعلش كمل.
وقتها بابا دخل - خلصتوا مذاكرة ؟
قولنا في نفس واحد - بنخلص.
- بتخلصوا إيه !
- لأ يابابا خلصنا
- خلصتوا ولا بتخلصوا ؟
أحمد اتكلم - خلصنا اللي مخلصينه.
بصيتله - قوم روح بيتكم يالا.
بابا زعقلي - إيه الأسلوب اللي بتتكلمي بيه ده ! حد يكلم ابن عمه كده ! وإيه يالا اللي بتقوليها دي ! مش أنا قولتلك خد بالك منها ياأحمد ومتخليهاش تصاحب بنات مش كويسة
- والله ياعمي واخد بالي منها، وطول الوقت معاها.
- أومال الكلام اللي بتقوله ده بتجيبه منين !
- والله مابسيبها
سقفت بإيدي وأنا بضحك - واضحة أوي دلوقت بجيبه منين.
بابا وقف قدامنا - يابنتي اتلمي
- آسفة والله.
دي رابع محاولة انه يشقط بنت من وقت ما دخلنا الكلية، وبتفشل للأسف، صعبان عليا أوي، ما هو اللي بيختار بنات معقدة وعاوزة تنتحر، وبيجيب الذنب عليا في الآخر.
- لاقيت حتة بنت يا حنان.
- لا لا بقولك ايه، اطلع من دماغي شوية.
- استني بس، دي بتقعد جمبك على طول.
- أوعى تقول بسمة.
- هي بعينها بحلاوتها.
- بسمة حلوة !!
- اومال انتي اللي حلوة !
- طب طالما أنا مش حلوة روح اولع.
- كلميها يا نونو.
- والله أبدًا، انت بتتسلى، عارف لو داخل جد، هكلمها حاضر.
- خلاص هكلمها أنا.
