بقالنا 3شهور متجوزين ولسه فاكره يوم فرحنا كانه امبارح
اليوم اللي المفروض يكون اجمل يوم ف عمري اتحول لاسواء كوابيسي
خطوبتنا مطولتش كتير وقتها مقدرتش احدد كويس هو راضي او لا ،مجاش فبالي اصلا انه ممكن يكون مش عايزني او مبيحبنيش
هو بيتعامل معايا بمنتهي الاحترام والمحبة ف ال3شهور دول بامانة مشوفتش منه اي حاجه وحشة ..
اما يوم فرحنا فده محفور في ذاكرتي بطريقة غبية
كنت مكسوفه جداً وخايفه ومرتبكة وباصه ف الارض
-ممكن تغيري هدومك وتاكلي لو حابه انا مليش نفس ..
رديت عليه بكل هدوء
_ولا انا ..
-طب كويس ،لو تعبانة الاوضه ع اليمين تقدري تدخلي تغيري وتنامي لو تعبانة
وقتها انا رفعت عيني وبصتله وتنحت ،اول ما عيني جت ف عينيه لقيته بيهرب مني وبيتحاشي انه يبصلي
_طب ..و..وانت مش هتنام ؟
-لا انا مجيليش نوم ،هشرب سيجارة ف البلكونة وهقعد شوية ولما اعوز انام هبقي انام
مكونتش عارفه اقول وقتها
كنت مصدومة ومش فاهمه في ايه بالظبط
هو ده اللي المفروض يحصل يوم فرحنا!.. يعني هو ده احلي يوم في حياتي!
حسيت بسقعه جوايا وروحي بتترعش دخلت الاوضه وقعدت ع الارض وانهرت عياط
كل اللي كان ف بالي ليه كده ي رب ،ليه اعيط يوم فرحي؟ انا عملت اي يخليني استاهل ده؟!
بعد نص ساعه عياط قومت غيرت هدومي واتوضيت ولبست اسدال الصلاة وروحت اصلي
كنت بصلي وبعيط بحرقة ،كان في وقتها نار قايدة جوايا
انا عملت ايه يخليني استاهل ان زوجي يسبني لوحدي كده يوم فرحي؟
ونمت وانا بصلي ومحستش بنفسي الا تاني يوم الصبح وهو بيصحيني
-ندى ..
بصيتله وانا بحاول افتكر ايه اللي حصل امبارح وانا ازاي نمت ع الارض كده
-صباح الخير ..لو سمحتي ممكن تغسلي وشك وتحصليني ع بره عايز اتكلم معاكي شوية ..
مقدرتش ارد عليه كنت حاسه اني لو اتكلمت هنفجر في العياط هزيت راسي فخرج وسابني
قومت اتوضيت وصليت وبعدين خرجتله
كان قاعد في الصالون ومشبك ايديه وباصص ف الارض ،كان بيهز رجله جامد وباين عليه التوتر
وقفت قدامه فبصلي وشاورلي اقعد
قعدت وبصيتله استنيته يتكلم
-بصي ي ندى ،انا عارف اني غلطان ويمكن انتي دلوقتي مش طايقاني وحقك والله
عارف مفيش واحدة تقبل ع نفسها ان زوجها يسبها يوم فرحها لوحدها كده
بس غصب عني والله ي ندى صدقيني
مش هقدر اخدعك انتي بنت ناس وطيبة ومحترمة
وبنوته جميله وتستاهلي كل خير
بس انا مبحبكيش ..
اول ما وصل لكلمه مبحبكيش دي لقيت دموعي بتتسحب من عنيا بالغصب بصيتله وهو بيتكلم. راح باصص ف الارض وهرب بعيونه مني
-انا ..انا اسف والله وهعملك كل اللي انتي عايزاه بس اسمعيني للاخر ..
انا كنت بحب بنت زميلتي من ايام الجامعه بس للاسف اهلي موافقوش عليها وحصل مشاكل كتير بسبب الموضوع ده ووالدي تعب وهددني انه غضبان عليا واني ابقي مش ابنه لو متجوزتش اللي هو يختارها واسمع كلامه ،والدتي اترجتني اوافق علشان مرض ابويا وغصب عني وافقت انا مبقولش اني لسه بحبها ،هي خلاص اتجوزت وربنا يسعدها بس اللي بقوله ان انا لسه مش قادر احب فسامحيني
انا عارف انه كان لازم ع الاقل اصارحك من الاول وان ملكيش ذنب بس ده اللي حصل
والله والله غصب عني ولو عايزه اطلقك انا معنديش مانع بس نقعد فترة علشان كلام الناس وبعدين هعملك اللي انتي عايزاه ..
كان بيتكلم وانا كل تفكيري ان هو ده اللي المفروض اسمعه من زوجي تاني يوم زواج؟
نطلق !!
بس انا ..انا بحبه
انا محبتش حد غيره اصلاً
قعدت 3سنين ادعي ربنا انه يبقي نصيبي ولما ربنا استجاب واتقدملي كانت الفرحة مش سايعاني وانا شايفه حلمي بيتحقق قدامي
ودلوقتي بيقولي نطلق وانه مبيحبنيش!!
3سنين براقب فيه من بعيد واحلم بس لو يبصلي نظره واحدة بس
او يشوفني حتي ويلاحظ وجودي
بدعي انه يبقي حلالي وربنا ميكسرنيش فيه
الشخص الوحيد اللي انا حبيته ف حياتي كلها بعد ما بقي زوجي
بيكلمني دلوقت عن البنت اللي بيحبها وبيفكر في طلقنا!!
اكيد ده ابتلاء من ربنا وانا ..انا اكيد هقدر اعدي ،ي رب الصبر والقدرة
ساعتها مسحت دموعي بالراحة وقولتله بهدوء
لو خلصت كلامك فدلوقت استأذن انا هدخل اوضتي علشان الجماعه اكيد ع وصول وطبعاً مش محتاجة اقولك اننا هنتصرف طبيعي قدامهم ..بعد اذنك
مشيت وسبته متنح مكانه ومصدوم ،انا نفسي كنت مصدومة من القوة والجبروت اللي كانوا عندي ،وازاي كنت بتكلم بثقة وكبرياء كده !
دخلت الاوضه وانفرطت في العياط وبعدين قومت غسلت وشي واتوضيت ..
صليت وسجدت وفضلت ادعي ربنا يحنن قلبه عليا ويحبني لو حتي ربع محبتي ليه بس ..
لبست وجهزت نفسي ولقيته بيخبط ع الباب ..
-ندى الجماعة جم
_حاضر جايه
اخدت نفس عميق وحاولت ابان طبيعية قدامهم خرجت وانا بضحك
امي اول ما شافتني حضنتني جامد وفضلت تبوس فيا ،سلمت علي والدي وباس راسي ودعالي
لقيت معاذ بيشدني من ايدي وقعدني جمبه
وهو بيرحب باهلي
-اهلاً اهلاً ي حمايا والله نورتوا
=ده نورك ي ابني والله ،انتوا عاملين ايه ؟
لقيت معاذ بصلي وحط ايده ع كتفي ومسك ايدي باسها حسيت وقتها ان جسمي كله بينتفض
ضغط ع ايدي بالراحة وبص لبابا
-الحمدلله والله ي ولدي ، كفايا بس ان ندى حبيبة قلبي منورة بيتي
بصيتله بتعجب هو ازاي قادر يمثل كده لدرجة ان انا نفسي صدقت!
المهم
ماما اتكلمت معايا شوية وعدا اليوم طبيعي جداً لحد ما مشيوا
-معاذ عايزه اتكلم معاك شوية
_اتفضلي
-انا سمعتك كويس امبارح وفكرت في كلامك،اعتقد ان 6شهور فترة كويسه علشان نقدر نقول بعدها اننا اختلفنا مع بعض وننفصل بهدوء وخلال الفترة دي هنعيش مع بعض عادي جداً وهنتصرف قدام الناس طبيعي خالص ،كويس كده؟
_اه اه كويس
-طيب بعد اذنك انا هدخل اوضتي..
احنا فعلاً بنفذ اللي اتفقنا عليه هو كان بيروح الشغل ويرجع اكون عملت الغدا ناكل وكل واحد في دنيته ولا اكننا متجوزين اصلاً لحد ما فيوم جه خبط علي باب اوضتي وهو تعبان وكانت حرارته عاليه اوي
اول ما فتحت اترمي ع كتفي ومكانش قادر يصلب طوله
سندته لغايه السرير وعملتله كمادات لحد ما حرارته نزلت وغطيته كويس ،لسه هخرج من الاوضه لقيته بينادي عليا
-ندى..
_ايوة ي معاذ انا هنا جمبك ،انت كويس ؟ اجبلك ايه طيب؟
-خليكي جمبي بس
_انا جمبك اهو
نمت جمبه اليوم ده وصحيت لقيته حاضني
حسيت وقتها اني فرحانة جداً اني في حضنه بس قلبي وجعني لما افتكرت اننا المفروض متفقين علي الطلاق
شيلت ايديه بالراحه وخرجت اجهز الفطار
