سايبين بلدنا من 16 سنة تقريباً كان عندي 5سنين
لما سبنا الصعيد وجينا هنا مصر
مش فاكرة بوضوح يادوب مجرد ذكريات وطشاش ..كانها احلام بس
بس فاكرة كويس محمود ابن عمي چابر ،فاكرة قد اي حنين وطيب وكان بيخاف عليا ،فاكرة واحنا بنعاند في بعض ويشد ضفايري ،وفاكرة لعبنا واكلنا
كنا دايماًمع بعض انا وهو وإبراهيم اخوياوهيام اخته اللي هي دلوقت مرات إبراهيم
كانوا بيحبوا بعض من صغرنا وكان كله عارف حتي ابويا وعمي ..خطبوهم وهما لسه ولاد 16 سنة واتجوزوا واهو عيالهم منورينا
اما انا بقي فـ واقعه في عشق سي محمود ..
محمود تقيل وراكز مش زي إبراهيم أخويا كان واضح ف كل حاجه زي الشمس
********
-يلا ي ندى علشان الفطار
_حاضر ي بابا
بابا عادل اقرب حد ليا في الدنيا كلها ..مش كبير لانه اتجوز بدري اصلا فـفي توافق بينا كبير
بابا انخرط ف البيئة الجديدة بسهولة اللي يشوفه ميصدقش ابدا انه ابن الصعيد واللي ساعده علي كده ان علامه كان هنا في القاهرة ..وهنا بقي اتعرف علي امي وحبها واتجوزوا لكن عمي چابر متمسك جداً بكل حاجة تثبت اصله الصعيدي من لهجة لطريقة لبس لاسلوب لكله ..
بحب اقعد معاه اووي
بيفكرني بارضي الام ولهجتنا الحلوة ،بيحسسني قد اي الدنيا حلوة وهو بيحكيلي عن الصعيد وناسها وعاداتها وجمال اراضيها وخيرها ..
********
-ده كله علشان تيجي ي ندى القهوة بردت ي حبيبتي
_معلش ي عم هشربها وهي باردة كفايا ان الحلو بتاعي هو اللي عاملهالي
_بتاكلي بعقلي حلاوة ..ماشي ي ستي افطري يلا علشان كليتك
-إبراهيم هيوصلني صح ؟
_لا إبراهيم مش فاضي والله خرج بدري للشغل في اجتماع مهم وانا ي دوب الحقه
-اومال مين هيوصلني طيب؟
_هشوف محمود ابن عمك لو فاضي يوصلك هو ..
محمود يوصلني!! حسيت في برق ضرب قلبي..معرفش الدنيا مره واحدة بقت حر وبدأت اعرق واتوتر مكونتش عارفه ارد اقوله لا ولا اعمل اي !!
بتكسف منه جداً ،رغم ان كلامه قليل ده اذا اتكلم اصلاً
مش عارفه ازاي هركب معاه ؟
اكيد هيبان عليا التوتر
بس انا فرحانة اني هبقي جمبه
رغم خوفي اللي مسيطر عليا في جزء جوايا فرحان ..
محمود ابن ال27
دايماً ساكت وهادي ..انيق وشيك جداً ابن عمي
الاستاذ التقيل الغامض اللي مدوب قلبي في هواه
محدش يعرف عن حياته الشخصية حاجه ،شخص كتوم من صغره حتي شيك كده دايماً
رغم انه كان رخم حبتين واحنا صغار بس كنت بحب رخامته دي
مش فاكره اوي بس امي كانت تحكيلي عن مجاكراتنا لبعض ومواقف بينا زي مثلاً..
********
-شكلي حلو ي محمود ؟
_لا مش حلو
-مش حلو !! .. هقول لعمي
_قوليله وانا اي يهمني
-يعني مش خايف ؟
_لا مش خايف هتعملي اي ؟
-هـ هـ ..هعيط والله هعيط
_عيطي وشوفي هعمل اي
-هتعمل اي؟!!
_هحضنك
******
بتقولي انه كان يضحك عليا لما يغلبني ومعرفش ارد عليه ..بس لما كان يشوفني ببدأ ف العياط كان يطبطب عليا ويحضني وتقولي قال ايه من خبثي طبعاً كنت ابينله اني مضايقه رغم اني كنت بحبه يضايقني علشان يراضيني بحضن
مش عارفه ازاي كان بيحضني !
احياناً بقول ان ماما بتضحك عليا بالحكاوي دي بس افتكر كويس انه فعلاً كان بيعاندني
