حب تحت حكم الفلاڨة
🌿✴✴🌿
وقف قدام باب الكوري اللوح وخزر بعينو الباكية للحصنة الموجودين فيه...شافهم مهبطين روسهم وياكلو في التبن وموش حاسين بشي ...دخل وخطواتو كانت بالقدرة متوازنة ...ساقيه ثقيلة وقلبو ينز دم...تحسس جلد اول حصان وصلو وتلذذ برطوبتو ...لعب على وذنين الثاني وباس خشم الثالث ودموعو تتڨاطر ...خزر للرابع بقلة حيلة وحرك راسو يحاول يقوي روحو "سامحوني ...اما ...مجبور ...وماعنديش غير ها الحل باش نمنعكم ...سااامحوني "
خذى السوط بين يديه وبدى يضرب فيهم الواحد وراء الواحد...باب الكوري كان محلول والحصان ايلي ياكل شحطة يخرج هارب ...عشرة حصنة ...ماقعد منهم كان رباطاتهم ...وبكير واقف في الوسط...نزلت دموعو وتهزت اكتافو بنواح مسموع "انسو بكير واهربو لبر تلقو فيه ايلي يرحمكم والا مصيركم باش يكون كيف رعد "
سرحت الخيول وركضت فرحانة بالحرية ...ماصدقتش انها بلا لجام وبلا سرج وبلا راكب ...صهلت بصوت عالي و هبطت الحدرة ايلي عارضتهم ...وين باش تهزهم الدروب خلي تهز ...المهم هوما احرار ...من غير خيال ولا مروض.
قعد بعدهم بكير وحيد ...حزين ...مقهور ...وروحو مذبوحة من الوريد للوريد تناجي في ساعتها ...عدى سنين يروض في الخيول ويربي ...لين شاب شعرو ...نسى روحو معاهم و مافاق كان بعمرو تعدى ولا مرا ولا صغير في جرتو ...كان يشوف في المهرة والجواد عايلتو ...وكان يرى الحصان صاحبو ...ترويضهم ولهوتهم خدمتو ...ومايعرف في الدنيا كان الخيل ....تعرف عليه السلالات الاصيلة وايلي يحب خيل من خيول الجنة ...مافمة كان بكير يعاونو ...وموش بالساهل يفرط فيهم و يشردهم في الجبل ...لكن ...هذا ارحم ليهم...الضابط الفرنساوي قالو راجع ...وها المرة باش يزيد يكمل انتقامو في بقية خيولو ..عارف انو مافشش غيضو بعد الاهانة ايلي لحقتو قدام جنودو وقت رفسو هاك الحصان الصغير الهايج ...ورغم ايلي عذبو كيف ما حب باقي مابردش ...وما يتهنى الا ما يعاود ايلي عملو في بقية الحصنة ...وفي بلاصة ما يشوفهم يتعذبو و يموتو قدامو عرق عرق وبقسوة كيف القسوة ايلي شهدها مع حصانو ايلي تجلد قدامو لين دمات جلدتو وتطاير لحمو ...وفوق هذاكا مارحمهوش بالموت ...خلاه يتعذب ورماه في الواد ايلي ماتزورو كان الذيوبة في الليل...
🌿✴✴🌿
شفايفها بيض مقشرين ...وجها شاحب واصفر ليمونة ...عرق خفيف ينز على جبينها وين لصقو عليه خصلات من شعرها مبلولين ...كفوفها على كرشها تتحسس في حركة صغيرها ...في كل لحظة تتلمسو وكيف ما يرفسش بساقو يطيح قلبها وتتخيلو مات ...لكن الروح ترجع فيها دوب ما توخزها ضرباتو ...دورت عينيها فيلي قاعدين بجنبها ...بية تبكي وعلى اول ماتنزل دمعتها تمسحها باش ماتبينلهاش ...ام راييس مغمض عينيها وتسبح بصوابعها ، واحد برك قادر ينجي الام وولدها وهو ايلي خلقهم ...زوز نساء اخرين ..وحدة منهم القابلة والاخرى وحدة تدرب معاهم في السلاح ...تقطعت الكلمات على لسانها وهي تسأل " حذا...مي...وين.."
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Adventure⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
