🌺حب تحت حكم الفلاڨة🌺
💚🌿💚
البال مشغوب ، والصدر موحش ظلمة باوجاعو ...تتمشئ والعقل سارح والڨلة ماها فايض بل اطرافها و سقى الارض تحتها ...خيرها واختارها من بعيد ...فرڨها من دون الصبايا واستنى غفلتهم باش يجري متلهف لملڨاها ...حثلة ساقيه وهي تزرب خلتها تدور على جرتها خايفة ومرعوبة ليكون حد ناوي ياذيها ...العيطة ايلي كانت ناوية تخرج من ڨرجومتها فيسع ما تكتمت من هول صدمتها ...تبسم وعينيه نادت بوحشو "بيوووووت "
رمشت شوافرها ...يا ويحها ترمي روحها لصدرو وتطفي نار وحشها ...وياويحها تحاسبو على غدرو و مخالفتو لوعدو ...هزت راسها شمخت بيه "تفضل "
ضحك وضحكتو حيرت فيها محااين كبيرة " هكا تستقبل عمر بعد ها السنين ..." جازف بالخطوة ايلي مازالت بيناتهم و مشاها " خمسة سنين يابية ...خمسة سنين كيف النار ايامها تكوي فيا كي "
مالازمش تحن ولازم تتفكر عيونها اش شافت " باسم الله عليك...الكوية كان للمريض والممسوس"
بدا يفهم انها لايمتو وفي نبرتها حساب مخبي " شنوة بيوت...ياخا متغششة والا تدلل ؟!...تصورتك تجريلي وترمي كل شي من ايدك و تترمى في حضني ...تقابلني بها الوجه المقلوب والبرود ؟!..."
حطت الڨلة ع الارض وواجهتو بقلب معمر " شنوة...سيبوك جماعة العاصمة...والا تفكرتني تو ...والا ايلي مرافڨها حتى في الجنايز سمحتلك تطل عليا ؟! "
الحكاية ظاهر فيها جدية وهو لازمو يفهم قصدها " مانيش نفهم فيك يا بية...وضحلي ...كلامك ملغز "
صاحت والعصب مكنها من غير سابق انذار " ولا انا فاهمتك...قتلي استناني واستنيتك ..."
صاح بدورو وموش عارف شنية جريمتو " وهاني رجعت "
بية "فات الفوت ...رجوعك مامنوش فايدة "
حاول يهديها ويهدي روحو ويفهم مليح القصى "بية!...شنوة صار...والله معاد فاهم شي منك...شنوة تبدل ؟!..شو...عندك حق تلوم غايب ولا نهار بعثت جواب ...لكن صدقني كنت في مهمة ...وتمنع عليا نتواصل مع اي حد غير محمود...تجبرت ...ولو ماجبروني ماكنتش نغفل عليك ثانية "
صر سنونها بغل "انت واحد كذاب "
حل فمو مصدوم " شنوة ؟!!"
زادت في جرأتها "واحد سفيه وماتسواش "
خطف ذراعها بقوة رجها منو "رد بااالك...قاعدة تغلط ومانسمحلكش "
جبدت يدها منو بنطرة "ولا انا نسمحلك تستغلني وتمنيني بالفارغ ...استنيت وصبرت وايلي يخطبني نقلو على ذمة فارس...اخرتها نراك مع مرا غيري...ماتبهتش وماتنكرش ...ربي اذا يحب يكشف حد ويظهر حقيقتو يخلق الاسباب ...وانا ريتك وبعيني وماقالي حد...نهار الجنازة كنت حاضرة و ريتها شادة في ذراعك وانت حاميها وتحاذي فيها ...ورد بالك تقلي من عايلتي و قريبتي ومن هاك الحديث "
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Pertualangan⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
