✴✴
قعد ساكت لثواني وهو يثبت في عينيها الخايفة ، تجرأ وتلمس خدها بصوابعو وحس معاه ببدنها رعش بكلو تحتو "انا نلقالك خدمة اما قبل كل شي ...عاوني ...بالاحرى عاون حذامي "
زاد خوفها "شبيها حذامي ؟! جراتلها حاجة... تي تكلم ياعمر راك طيحتلي قلبي "
تبسم وبالسيف شد روحو ع الضحك وهي تنزل بصوابعها على صدرو الحركة مخليتو في سابع سماء" اللطف على قلب مريتي "
هي ذايبة خليقة وكمل عليها بهاك الكلمة ، حمارو خدودها وخصتهم باش يشعلو بالسخانة ،ضحك وضحكتو زادت في حشمتها لكن فيسع ما لقف روحو وتفكر علاش هو جاء..جبد من جيبو جواب ومعاه ورقة صغيرة " اسمعني ملييييح ...حذامي ...قتلك توصل ها الجواب للبلاصة المكتوبة في الورقة ...وليوم قبل غدوة ..."حطهم في يدها وكبس عليها"بيوتة ...الحكاية فيها حياة حد عزيز علينا ...الحكاية فيها اسم البلاد وحلمة الاستقلال ..."
حلت فمها مستغربة " انا ؟!...باش نعمل هذا "
دخل يدو لجيبو مرة اخرى وجبد فلوس " هاذم مايلزمك للسفر "
هربت بعينيها منو " لا ...مانحبش... تو نتصرف "
خذى كفها بالسيف عليها وحطهم "موش مني ها الفلوس .. هاذم متاع حذامي ...وهي وصاتني نمدهملك ...وتوا ...."
تنهد بصوت مثقل ببارشا حكايات " لازم تروح وفيسع وتبدى تحضر روحك "
رمشت شوافرها متوترة "يعني ...انا ما عليا كان ...نمد ها الجواب لمولاه ...اكاهاو "
"ايه " بعد خصلات شعرها على عينيها بعد ماهزهم الريح"خلينا نتلقاو ...في فرصة اخرى ..."
هبطت راسها حاشمة "باهي"
هربت من قدامو وجرات بعيد ...وهو تبعها بعين مليانة محبة ومشاعر مدفونة ...تنفس براحة وحل ذراعاتو لنسمة الصيف ...حب يتبختر شوية قبل مايرجع للاكاديمية ...لكن على ثاني خطوة تدعثر وجاء لوطة على ركايبو ...صر سنونو وهو يقوم وينفض دبشو من الغبرة ...موش لازم منو التبختير ...يكبس روحو ويرجع للجماعة خير.
✴👑✴👑✴
مسحتلو فمو بالمنديلة وفمها هي باقي ما شاحش ع الكلام " لازمك تكمل ها الصحفة...مالا كيفاش باش تعاود تشد صحتك...وتو نعملك شبعة خضرة كولها لكل عوض ايلي خسرو بدنك ..."
ماكانش مركز معاها ولا سامع كلامها ...عينو ترشقت علي وقف في الباب ويتبسملو برقة ...تبسم بدورو الشي ايلي خلاها تتلفت وراها تشوف شكون ...واول ماراتو زربت حطت الصحفة ع الطاولة بجنبها "انت !؟...شتعمل هوني !؟...مازال عندك وجه وتقابلني ؟!..شوف بوك جرايرك ..."
خطفتو من ذراعو و دزتو على فرش بوه "تفرج وين وصلتو ...تحب تعرف يا خاين اش عملت؟! ...شوف " هزت ساق بوه وخلاتو يشوفها "معادش حاسس بيها .." ،كانت ناوية تزيد تلوم ...لكن الڨايد قص عليها "يزي يا مراااا...لو لا ابراهيم ماكنتش انا معاك ...كنت توا ميت وعظامي منسية في الزنزانة...ولدك دمو من دم الڨايد...مايخونش "
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Aventura⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
