🌺حب تحت حكم الفلاڨة🌺
🌿💚💚🌿
زحف طالع من الطين ...شاد في رقبة الاغر ...متحامل على الوجايع ايلي تسطر من كل انش في بدنو...كركر روحو لين وصل للتراب الشايح...وقتها تمد على ظهرو بتعب وخزر للسماء المغيمة...مايتفكرش قداش من نهار تعدى عليه وهو موش واعي...ولا عارف قداش المسافة ايلي بعدها ع الجبل...صدرو يتهز ويتحط بانفاس قوية ...عينيه زايغة رمشة وحدة مارمشتهاش...برد كبير نخر اعظامو خلاه يتكمش بكلو ويلف ساقيه ويديه على بعضهم لعل يدفى وترجع فيه الروح...ضرب الاغر الارض بحافرو حثو باش يقوم ...لكن يوسف غلبو تعبو ومعادش عندو حيل يزيد يتقوى على بدنو ويقاوم...خير يرتاح شوية ...كيف لقاه هكاكا وماوصل معاه لشي ، رقد الحصان بجنبو بالضبط ع الجيهة ايلي واصلو منها الريح...هو مبلول ...يقطر بكلو ...وزاد عليه الطقس بارد...على شوية يجمد...ع الاقل يسرق شوية سخانة من جوادو ...ربت عليه بكفو المتصلبة ...هذاكا ايلي ينجم يعمل معاه...لوى الاغر كرومتو عليه بلين وحنانة حتى اابشر مايكسبهاش...بنادم...تعملو خير اما ينكرو والا يرجعهولك شر...لكن هاك الهايشة ايلي ماتنطقش ...تكافيك في وقت الشدة بايلي تقدر...لزلو يوسف واغتنم الفرصة يقلل بردو ..يرتح بدنو و يرمي حملو عليه حتى لين يشد عظمو ويرجع قوتو.
🌿__💚💚__🌿
في مفرق الثنايا ايلي يوصل للدوار ويعدي للجبل ...كان قايد العمليات يدادي بلاش صبر ...على اعصابو ...متوتر ومنڨالتو يتفقدها كل ثانيتين تقريبا...لقاها ستيفو فرصة باش يزن في راسو من جديد "يا قايد...خمم مليح...محمود راهو عدونا ...انت مصدق انو باش يرجعلنا الاسرى؟! ...شوف ...توا تعدو قداش من نهار...احنا انسحبنا وكنا قد الاتفاق لكن هو...خلف المفاهمة "
ڨحرلو الضابط موش حابو يزيد يكمل ...اضطر ستيفو يسكت قدام هاك الشر ايلي ظهرهولو ...واحد من الجنود قرب منهم وهو يزرب ومد المنظار لقايدو " قايد.. فمة مجموعة ماشية تقرب لهوني ...يظهرلي الاسرى "
لخلخ وجه ستيفو " قصدك...محمود...سيب الاسرى ؟! "
زم القايد شفايفو وهو يثبت في هاك الجايين من بعيد بالمنظار ايلي بين صوابعو " محمود... مازال محافظ على شرف الكلمة والوعد ..."
بدل ستيفو حديثو واقترح " اذا هوما الاسرى بالحق...خلونا نعرضوهم "
وقفو القايد وهو يطلق ذراعو قدامو ويدزو من صدرو يرجعو لتالي " يزي من التبلبيز يا كابيتان ...هو التزم بوعدو...واحنا زادا...تفاهمنا ناقفو هوني ...من غير مانقدمو خطوة"
عوج ستيفو فمو موش عاجبو...ها القايد يلعب في لعبة الحرب بسطحية كبيرة ...مازال يحكي بشرف الكلمة واحترام قواعد الحرب ...موش فاهم انو باش تربح لازم تخدع وتكذب...
مشى ايفان حافي ع الحصحاص...ورغم ساقيه المدمدمة...كانت ملامح وجهو ساكنة وباردة...تايه بخزراتو وعقلو سارح بعيد...كتفو مضمد بضماد نظيف ورصاصتو منزوعة ...الفرسان ...كانو بشر ...موش وحوش كيف ماحكاو عليهم ...داووه ...شربوه...وكلوه...حتى الضرب ...ماتضربش...متأكد انو ...لو تقلبت الاية وكان واحد منهم اسير عندهم...فموش باش يتعاملو بهاك الطريقة ...
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Adventure⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
