"انت ...شتعمل هوني !؟ "
انت !!!؟؟...يعني قيمتها عندو تحبس عند كلمة "انت " ...طرف لهفة ،مودة،خوف ،فرحة ...ماراتهاش في عينو ، وهي ايلي منت روحها ببارشا حب وحنية.
مازال يستنى فيها تجاوبو ،ومازال يتفكرها مليح ،اصلا الليلة ايلي شافها فيها مانساهاش ،وقتها حالتها حليلة ودموعها على خديها "نسأل فيك راهو "
علاش ها القسوة معاها...مجافيها وزارع الشوك بيناتهم ...قربت منو خطوة و مدت صوابعها لكول كبوطو ايلي كي لبسو قعدت مطوية ...ركحتهالو وهي تقاوم في دموعها باش ماتفضحهاش"نحب نحكي معاك ...اعطيني شوية من وقتك "
شدلها معصمها بقوة ونطرلها يدها...يعرفها مغنية في كازينو أسينات و الناس الكل تحكي عليها ذبالة عينين و تسحر الرجال بڨدها و ميولو موش لهاك النوع " هاذي اكاديمية ...للرجال ...ممنوع عليك تدخلها ...وانا ماعنديش وقت لحديثك "
هو هكا ذبحها بسكينة حافية...جاتو تجري تحب تقلو انا بنتك عنقني ...صدها بقوة وكسر بخاطرها ...عزت بيها كرامتها و قوتها نخوتها وماحبتش تزيد ترخص روحها ...هي عاشت ناقصة لحنان البو وموش باش يفرق معاها شي اذا كملت حياتها من غيرو ..في وسط الضعف والوجيعة خلقت تبسيمة ، زينت فمها وسط الضبابة متاع دموع عينها " على راحتك "
تعداها وكمل طريقو لداخل ...حتى وخزة صغيرة في قلبو ماحسهاش ...قعد صياد يخزرلها للحظات وهي شاردة في جرة محمود" كان مستحقة نعاونك في حاجة قول "
غمضت عينها وهبطت راسها باش تمسح دموعها بالخفاء وماتخليهوش يشوفهم " ايلي بيا سبابو محمود وماينجم يعاوني كان هو "
مخو دار بارشا دورات ...محمود ...وها الشابة المزيانة ...والكازينو ...وغير هذا اول ماراها عرفها بالدليل سألها 'شتعمل هوني ' ..يكونش صارت حاجة بيناتهم في الخطا و ملزوم عليه يتحمل مسؤوليتو !...
هزت راسها بعد ما كفكفت دموعها وخزرت للساحة متاع التدريب ...نجمت تشوف افواج الضباط قاصدين التدريب،خطرت ببالها تدخل وتتحدى قوة وجبروت محمود ...قالها ممنوع وهي مستعدة تخالف الممنوع الكل شماتة فيه...قدمت ناحية الباب ومشات خطوات تتمايل بيهم موش هامها بهتة صياد والجندي ايلي خلط وراها وهو يصيح "ممنوع ...ارجع يا انسة "
اما هي لولة في العناد،خفت مشيتها لين وصلت بحذا الافواج ...بارشا يعرفوها ويتذكروها ،ايلي يراها يصفر ...والا يغمزها ...وفيهم ايلي عيطلها باسمها وقلد غناها ...وهي واقفة تتبسم تلوج في الوجوه على حد معين ...وكيف راتو نادتلو "يوووووسف "
الضباط الكل تلفتو لولد الشادلي ايلي وقف على بلاصتو باهت "زينة ؟!"
ضحكت برقة اول ما وصلتلو و دخلت يدها في ذراعو وكركرتو بعيد عليهم " عندي مانحكيلك "
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Aventura⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
