🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )

🌹الفصل 53 : فاقت على مشاعر اخرى🌹

تململ في فراشو ومط شفايفو الشايحين وهو يحاول يهز ساقو ايلي حس بيها رزينة عكس العادة ...حل عين دوبلاش وخزر لساقيه يشوف شنوة ايلي مثقلهم ...صر سنونو وكبسهم بغل وقت لقى ساق يوسف  فوقهم وزيد مطيش يدو على صدرو ...دزو عليه و قام من بلاصتو بالوقت ...هاكي ايلي مازال وقعد عاد يبات معنق ولد الشادلي ...نفض الغطاء عليه و خزر لفرشها لقاه فارغ  ومنظم وملحفتو مطوية مليح ومحطوطة  تحت مخدتو ...تلفت وراه وين المفروض يكون عمر راقد...مالقاهوش زادا لا هو ولا فراشو...خزر موش مصدق ليوسف ايلي كمل نومتو لا على بالو ...يعني قعد راس راس معاه ؟!...

لم فراشو وجبد مخدتو من تحت ذراعو بعنطزة خلاه يحل عينيه ويخزرلو وهو مدهشر بالنوم ...عفسو بلعاني على ساقو ونادى بالباب و  خرج يزرب ...تقلب يوسف على جنبو الاخر وبشطر عين خزر لفرشها واول مالقاه فارغ وساعت عينيه وطار منهم النوم ...وينهي ...وقتاش فاقت ...وين ومع شكون مشات ؟!...وكيفاش ماشلقش بيها؟!...تنطر جاء واقف وفيسع مالم غطاه وفراشو وطووول جرى للشومبر متاعو باش يحضر روحو قبل مايوصل محمود ويشوم النهار .

سبقو ابراهيم ،بدل حوايجو وجرية هبط ...عينيه من بلاصة لبلاصة تلوج عليها ...التراكن الكل فلاها حتى من المطعم مالقاهاش ...قعدت كانت ساحة التدريب اكيد والف بالماية فم ...خطيوات من بعد.وسمع صوت برندات وراااه  " براااااهييييم "

خزرلها من وراء اكتافو وبعد دارلها وتبسم "برنادات ؟! شتعمل هوني ؟!"

تمايلت بكل رقة وبكل انوثة ومدت راسها باش تسلم عليه ...باست خدو ودخلت يدها في ذراعو " توهشتك..كي ات ماتوهشتنيش ..ومالوجتش اليا ...انا ...جيت لانت(توحشتك كي ماتوحشتنيش ومالوجتش عليا ..انا جيت ليك انت )  "

حاس ببارشا احراج "لكن...هوني بلاصة خدمة "
ضحكت بدلال "اه....انسى الكدمة ...كلينا نكرجو(انسى الخدمة ،خلينا نخرجو ) "

جبد مرفقو منها "لا كيفاش..." مسد كتفها " برا انت تو ...و العشية نتقابلو ...ديجا عندنا عطلة اخر ااجمعة "

شاورت براسها لا " لا ...نهبك ات اكرج مآيا انا ...(نحبك انت تخرج معايا انا ) "

"ماانجمش برنادات ملتزم بقانون ها الاكاديمية "

تبسمت دليل ايلي عندها ورقة رابحة باش تلعبها وتخليه يوافق ...وهو غافل سرقت منو بوسة خفيفة على اجناب فمو خلاتو بعدها متمسمر في بلاصتو ويخزرلها بضياع ومافاق كان بحس حاجة طاحت من وراهم ...تلفت يشوف شفمة وهو يدعي لا حد يكون شاف الفازة ايلي صارت ...ماصدقش عينو كيف شاف حذامي وهي تاخو  حزام الكرطوش من الارض بعد مافلت من يدها ...هزتو وخطفت دورتها ورجعت على ثنيتها تجري ...ربثتها وتوترها كشف انها رات كل شي ...كبس على شطر راسو وضغط عينيه ...بعدها العملة شنوة يمشي في بالها عليه ...هو كان عندو امل معاها وبها الفازة ضاع وتبخر ...هز عينيه وخزر لبرنادات وماول يخلي صوتو اكثر حزم وحدة