🌺حب تحت حكم الفلاڨة🌺
💚🌿🌿💚
دوب ماتفقدت شعرها وركحتو بطراطش صوابعها ومشات ناحية الباب قاصدة الخروج ، المفروض يكون نصر وصل ويكون يستنئ فيها لبرا كيف عادتو ...لكن ....الشخص ايلي لقاتو غير ..استغربت وماعرفتش شكونو ...خاصة انو ما ظهر منو شي " نصر ؟! "
خزرلها على جنب وبصوت فيه بحة جروح قديمة تكلم " نصر غايب ...ليوم...ولغدوة ..."
ماصدقتش ايلي راتو ، عيونو ونبرة صوتو راسخين في بالها مايتنحوش " الكابيتان محمود !؟" ضحكت فرحانة " انت بكلك جيت لعندي؟! "
شاورلها للباب "اسمحلي ندخل ...مانجمش نبقئ بارشا لبرا "
بعدت شوية "بالطبيعة ...انت تدخل وقت ماتحب "
استناتو يدخل قبل وبعد سكرت في جرتهو الباب ...سمح لروحو ينحي غطى راسو وكشف وجهو ...مشط لحيتو وهي راشقة فيع عينيها المليانة اعجاب ،تجاهلها وعدى عينيه على تراكن البيت " عندي حاجة عندك ...وصار الوقت باش تعطيهالي "
تبسمت برقة بعد مافهمت قصدو " دقيقة وتكون بين يديك "
غابت عليه شوية وبعد رجعتلو ومعاها حملة اوراق مدتهالو وخزراتها ينطقو بانجذابها الكبير ليه " هوكا باش تعرف انو آمنة مستعدة تمد يدها وتعاونك...هاذم القوادة ايلي نجمنا نحصروهم...تلقى فيهم قوادة ستيفو في الصفحات الاخرانين "
" انت تعاون في بلادك موش في محمود شخصيا ..."
نبرتو كانت حادة وهو يجاوبها ...خذى منها الاوراق و بدا يقرى في محتواها ...يتبع بصبعو سطر وراء سطر لين حبس قدام الاسم ايلي سمعو من سوايع من عند ولد الڨايد الكبير ...صر سنونو وكمش صوابعو عليها بغل ...راتو يحل الباب ويخليه مشرع وراه تقول باب دارو ...الاسم خلاه يخرج من صينتو و ينسئ حتى باش يغطي راسو و يخبي وجهو .
🌿💚💚🌿
على خط واحد ...تمشاو الاربعة ...كل واحد منهم مشبر سلاحو لجهة معينة ماخو حذرو منها...وكيف وصلو لهاك العلوة وين ظهر تحتهم بيست عربي اسانست تدخل منو كماين السلعة و امدادات العسكر ...لقاووه فاضي ومهجور ومتروك من ناسو ...الشي ايلي خلى يوسف ينطق بشكو " موش فاهم انا حكاية الحد هاذي منين طلعت ...علاش يخرجوه بكماين....وعوض هذا الكل اسهلهم يخرجوه في طيارة.."
شاور ابراهيم بكفو خلى كان صوت النفس مسموع ...غمض عينو واستشعر الصوت البعيد ...حل عينو على كبرهم ودار على جنبو مشبر سلاحو خلى البقية يعملو كيفو في استعداد لمواجهة ماكانتش متوقعة ...بدا الشي يظهر من بين الشجر...وكل جندي فرنساوي كشف روحو وهكاكا لقاو اربعة الفلاڨة ارواحهم في الوسط والعديان دايرين بيهم ...خزر يوسف وابراهيم لبعضهم وعمر وشوش وعينيه تحسب في كم الجنود " شنوة يا قايد...ع الموت نضربو الكرطوش والا كيفاش"
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Macera⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
