🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )

🍀الفصل الخامس: محمود ...مافماش رحمة 🍀

💚🎈🎈💚

ضيقت عينها بكل ماليها من خباثة وقربت منو مسلبسة ..هز حواجبو مستغرب ردة الفعل متاعها ...جبدتو من يدو وكبست ع المعصم متاعو بكفوفها الزوز وبكل ماليها من القوة ..تلوى وهو يشدلها ذراعها باش تحبس وماتزيدش تضغط " اه اه اه ..توجع راهي "

هزت راسها بكل ثقة " هذا لانو حكيت معايا بقلة احترام ...وايلي باش يطمع فيا خاطر بشرتي انظف من بشرتو ...باش يلقى اضعاف هذا "

ملا قوة وثقة ..ماتعرفش منين جابتها ...هي اصلا ماعندهاش القدرة باش توجه اي حد اذا طمع فيها ...كانت خايفة تتكشف انها مرا ويصير فيها لكن توا يسخايلوها نوع اخر ينجمو يطمعو فيه...مازال يتلوى من الوجيعة لين هبط على ركايبو "سيب سيب ...اه ...سيب امان "

ضحكت تتمسخر " ياخا وفاو الرجال من البلاد باش يجيبو حد بها الضعف هذا ..." مالت فوقو "ياخا قادر تهز سلاح وتضرب الكرطوش وتحارب ؟!...يا خوفنا ترميلهم كل ما ليك وزيد تبوسلهم ساقيهم "

صاح "اه ..اه ...سيب عااااد "

رخفت يديها عليه من غير ماتسيب معصمو " هذا تنبيه...المرة الجاية تعرف شنوة انجم نعمل "

هي في حد ذاتها موش عارفة اش تنجم تعمل ...ومتأكدة انها موش باش تعمل شي وانو الغلبة ليه هو بالطبيعة ..اما لازمها شوية كذب وتبهبير باش تبان راجل قوي وبكلمتو ...رغم الفيانة ايلي تظهر من ملامحها.
سيبتلو يدو وتعدتو وهي تعاود تترمى ع الفرش ...غمضت عينها وهي تشاورلو بصبعها بكل محقرانية " مانحب نسمع حتى صوت ...تخمد ارقد وسكت حسك "

عض شفايفو من الوجيعة ايلي في معصمو وزادا من الغل ايلي مكنو بسبب ها المجودر ...جاء لبالو يهرسو بطريحة نباشة القبور اما ...توا هو حيلو مهدود ...ويادوبك ياقف على ساقيه ...وايلي زاد حرقو انو ها المستخنث مركى بونتو عليه ...اما ميسالش الايام مازالت بيناتهم وموش باش يمنع منو .

ماصدق باش حط راسو ع المخدة ...طول تعدى في النوم ...من غير لا يخمم ولا يفكر في اي موضوع ...وايلي بجنبو زادا ...رغم كانت خايفة ومرعوبة من فكرة راجل يشاركها الشومبر الا انها رقدت وزيد حلت فمها معاه ونسات روحها اصل ...
وقت طلع الصباح ، كان ابراهيم وعمر اول ناس لابسة الزي و مسنترين رواحهم ...هوما الزوز خذاو بيت وحدة ...وكيف كيف نصر و اسماعيل (ايلي جاء مع نصر ) زادا خذاو شمبر مع بعضهم ..تلاقو الاربعة في الدروج هابطين ...ضحك عمر على جنب ورمى المعنى " شنوة نصر ...مازلت باندي والا تكسرت شوكتك "

زم نصر شفايفو ومطهم "اي اكاهاو عاد عمر ..." خزر لابراهيم ايلي ساكت وماعمل حتى ردة فعل " برهوم ...بحكم عايلاتنا تعرف بعضهم ...خلينا اصحاب ...موش لازم نتعاركو مرة اخرى قدام البقية "

صفر اسماعيل وقت شاف حذامي هابطة ...كانت هي زادا لابسة الزي الاخضر وتمشي بكل ثقة "اوهووو...هاو اك الفرخ متاع لبارح ايلي ماكمل الدورة المائة الا ماروحو طلعت "