🌺حب تحت حكم الفلاڨة🌺
💚🌿🌿💚
"بنت الشادلي ياناس...بنت الشادلي من دون البشر هاذم الكل...اخت يوسف !!!...متخلي على رقبتك يانصر...يا اخي هيكا اخت اسماعيل قد جمل...ياسيدي اخت عبد الرحمان ...تي هوكا الدوار مليان بنات ...جات على بنت الشادلي وقلت منها نخلق "
ماكانش في وعيو وهو يمشي في الشارع و يهر وحدو كيف المهبول وماقص وخرج من هاك الكبير كان كي نڨز عليه حد من قفاه وغرسلو راسو لوطة ...ضربو في كرشو بعدو شويى ولوالو يدو وراء ظهرو ،تأوه الاخر بين يديه " سايس نا راييس هااا"
نفخ بعصب ونطرلو ذراعو سيبو "أوووف ولد الدوار منين طلعتلي "
هندم راييس حوايجو وضحك" شنهي؟! ...هترت خلاص وليت تتحدث وحدك "
تأفف نصر" بربي فوتني ...مانيش في مخي "
ضرب كتفو بكتفو "شنهي...مخك تقلب ملي وڨفت مع هاك الهسكة "
فهم من كلامو انو كان حاضر من وقت تقابل مع ازهار وقعد يتبع فيه ، وكوك " بنت...بنت...جيرانا يا حيوان يمشيش مخك لبعيد "
حب يفيقو انو يعرف حاجات اكثر ملي يتوقعهم ومايعديهاش عليه " ومن امتى بنت الشادلي بنت جيرانكم ..." عجبتو الحكاية خصوصي انو وجه نصر مشى الوان وجاء الوان " يا لو كان يسمعك بوسف ...الا ماااا ..." عدى يدو على رقبتو بمعنى يذبحك
وساعت عين نصر " وانت منين تعرف ازهار ؟؛"
هز راييس حاجب بحاجب " واسمها ازهار زادا...نحن في الدوار نسمو وردة...زهرة...وانت لمدتها جنينة كاملة ..." مال عليه " شنهي ...خذات عڨلك وڨلبك؟! ..."
دزو بعدو عليه " تسخايلني خايف من خوها انا ...اسمي نصر راو موش رئيس ايلي ياكل الطرايح ويسكت ..."
ضحك راييس"هاي هاي...تو نشوفو شكون ايلي باش يطيب كي الحلفة "
ضرب لارض بساقو " هاي مرشومة هنا...وتفكرها ياولد الدشرة ...مانيش نصر اذا ما ماعرستش بيها ....."
ضحك راييس " معناتها جد ...بنت الشادلي خذات عڨلك "
زم نصر شفايفو وكز سنونو " امشي امشي وسيب عليك من ها الريق "
💚🌿🌿💚
عدت ام محمد صوابعها على شعر هاك البنية الصغير ايلي في حجرها ومافلتتش الفرصة باش تتلكش " هكا شعر الطفلة ؟!..كان ايلي تلهيت بيه برويحتك و حميرك راك سلكتلها شعرها و لميتهولها في الضفيرة خير ..."
حطت زينة الناب ودوب ما فرشتو " بربي شبيه شعرها هوكا مسلك ومااحلاه و هو مهدع وزيد هي تحبو هكاكا "
" هذاكا لو كان كي شعر محمد راهو يتهدع والنسمة تهزو ...اما شعرها طلع حكاكة لميمتها "
حلت زينة فمها ماردتو " انا شعري حكاكة؟! ..."
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Aventura⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
