🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )

🌸الفصل 35 : هي ...نعمة ربي عليا 🌸

حاجة اقوى منو وضعيف قدامها  الله غالب  ،كيف يراها تضحك  لولد الڨايد  يخرج من صينتو والمرة هاذي خلاتو وراها وتبعت ابراهيم زادت على مرمتو وشعلو فيه بركان صعيب نارة تطفى   ...هز بلاتو فطور صباحو  من غير ما يركزش  شنوة محطوط فيه ...سبڨ للطاولة وين كانت  قاعدة مع ابراهيم و عمر ...ملا صحبة الحاصل ولت بينهم ...  هو وصل حذاهم و راييس خلط معاه فرد وقت ...الزوز قصدو الكرسي الفارغ ايلي بجنب حذامي اما ولد الدشرة جبد روحو و تلز يخليلو البلاصة  كي شاف ڨحرة ولد الشادلي ايلي على شوي كان كلاه ماكلة بيها  ...ركز بلاتوه بعنطزة وخزرلها وهي تقشر في العظمة متاعها  ...مد يدو وخذاها من عندها وكمل في بلاصتها التقشير ،هكا من غير لا تقلو حب يعاونها ...نفضها مليح من اي قشرة تنجم تكون مازالت عالقة فيها  ومدهالها مع تبسيمة حلوة لعل يأثر عليها بيها  ...الجاست خلت ابراهيم ياكل بعضو ماكلة ...اش مدخلو فيها وعلاش ديما يتلوصق النساء ،اولهم زينة خطيبة خوه وماتهنى كان ما فسد بيناتهم ...وثانيهم الطفلة هاكي ...تأفف وهو يهز فيه  ويحط  وقام من بلاصتو ،لكز حذامي بالشوية  " حاتم ...كان كملت  خنمشو"

ضيق يوسف  عينو  بتحدي وقرر يجاوب في بلاصتها " مازال ما كملش ...انت كان كملت انافا  توكل "

مدلها ڨوبلاي الحليب الالومنيوم  باش تشرب منو اما هي عطاتو ڨحرة على جنب وقامت من كرسيها نيتها تمشي مع ولد الڨايد ...هكا تكون فورتلو الدم في راسو ...رصها لوطة ع الكرسي  وكبش في ذراعها بظوافرو ، بهتت فيه وفي تصرفاتو ...تقول طفل صغير يتصرف ...خرج صوتها رقيق خايف  "سيبني "

ع الكلمة جبدها ابراهيم وراه ،حس انو لازم يحميها من ولد الشادلي النسونجي ... الشي هاكي خلى سي البطل يوسف ياقف قدامو ويدز صدرو بتبوريب  ...تقابلو وجه لوجه يتسردكو مع بعضهم ...عمر حال فمو والعظمة في يدو نيتو كان ياكلها اما حرب الاعصاب ايلي موش مفهومة قدامو خلاتو يتجمد وهو بهاك الوضعية ويقعد يبحلق فيهم بعين محلولة على كبرها ...بالنسبة لولد الدشرة ماعلى بالو بيهم يرفس فيها رفسان  ويعبي في كرشو وفي قلبو يقول الله لا كون فيكم  تتعاركو تقتلو بعضكم مايهمنيش ، يستنى فيا تدريب صعيب ماتنفعني فيه كان كريشتي ...حذامي وحلت وحلة القضاء  بيناتهم ...،ها الزويز يتسببو  ويتحككو على بعضهم من اول ما دخلو للاكاديمية  ...لازمها تفض الحكاية قبل ما تلحم بيناتهم  ...دزت ابراهيم لتالي نيتها تبعدو على ولد الشادلي اما  مانجمتش تحلحزو جملة ...جربت مع يوسف لقاتو لاصق على بلاصتو تقول مخيط عليها  ...عينيهم مرشوقة في بعضها  بكل تحدي ولا واحد فيهم  حاب يتنازل ...تنهدت بصوت مسموع  وقت حست انها موش باش تنجم تعمل شي ...هزت بلاتوه وخلتهم ،يعملو ايلي يحبو المهم تمنع بجلدها قبل ما يوصل محمود  ....عض يوسف لسانو في حركة حب يقلو بيها ،يجي نهار ونكور بيك ...قرر ينهي الحكاية و  تعدى من جنب ابراهيم وهو يتشوحرلو ، لولا حذامي مشات كان قعد معاه لغدوة ...اما هو حب يخلط عليها ويحكي معاها شوية قبل ما يدخلو في التدريب   ...نفخ ولد الڨايد بقلة صبر و ودار لاحق عليهم هو زادا ...خزر  عمر بعين دامعة للماكلة ايلي قدامو  وقام من بلاصتو ،شد جرتو  وهو يحس في معدتو باش تتنقب  بالجوع .