النهارين تعدو في لمحة ...اصلا مافاقوش بيهم كيفاش تعدو ..تقول رقدو وقامو لقاو رواحهم في اول الجمعة ..اغلبيتهم اذا موش الكل رجعو فوق من قلوبهم وتمنو يزيدو حتى نصيف نهار آخر .. اما حذامي فماصدقت كان كي خرجت من حومتها وركبت التران ...خايفة لامها والا بوها يشوفو شعرها القصير وتتحل سين وجيم ويطيح كل شي في ماء ...اول حاجة عملتها تعدت لدار بية ...وبحكم الوقت كان عشية مالقاتهاش ، فاضطرت تستعمل المفتاح ايلي مدتهولها قبل ما تروح لدراهم ،دخلت بدلت حوايجها ولبست سروال قماش في الازرق ومعاه كبوط كوير اكحل حد ركبتها وتحتو تريكو صوف بنفس اللون ،تفقدت وجها قبل ماتخرج ومسحت كحلها ع الاخير ومن بعد جبدت الباب وراها و شدت الطريق للكازينو ...كيف كانت حذامي ،كان الدخول لغادي ممنوع ...وتوا وهي حاتم عاادي تدخل وبكل اريحية ...طلت براسها بالشوية وقت لقات الباب دوب مامردود دليل انهم مابدوش يخدمو ...مشات خطوات وهي تخزر على جنابها لين قابلتها بية تنشف في الكيسان وتنظم فيهم ع الكونتوار ...محمحت باش تخليها تتلفتلها واول ماراتها صاحبتها جراتلها وعنقتها " حذامي ...هاك جيت بكري ...من تو باش ترجع للاكاديمية "
حذامي " لا ...مازال عندي الوقت لنص الليل ...اما قلت نطل عليك ونقعد حذاك شوية ومن بعد نرجع "
باستها من خدها وعنقتها بقوة " يعيشلي حتومتي الباهي "
ضحكت حذامي وضربتها على خشمها " نقصتش من الدك متاعك "
رجعت بية لبلاصتها وراء الكونتوار و حذامي قعدت قدامها مقابلتها " ياخا وقتاش تبدو تخدمو "
صبتلها كاس ماء ومدتهولها " احنا ناس الليل...اول ماتظلم نبدو خدمتنا ...اه ...قلي ...شعاملة في الاكاديمية !؟...فمة شكون مقلقك ؟!...عملت اصحاب ؟!...فمة شكون شك فيك انك مرا "
حذامي " اششش ...تكلم بالشوية ...بالنسبة للاصحاب ...عملت الحق فمة راييس ...طاهر ...ابراهيم ...عمر ..بالنسبة ليلي مقلقني ...فما بارشا اولهم ولد الشادلي و ولد شريك الڨايد "
حطت بية يدها على خدها " يا حليلي ....ولد الشادلي ...اسمو ...اسمووو...تي نعرفو اك المرة خطف زينة وهي تغني ..."
عوجت فمها " ايه ...شفت هاك العمايل ...واحد مدلل رمز ماسط مافيه ما يتخالط ...عكس ولد الڨايد ...سيس ،متفهم ، رزين ،مزياااان "
قرصتها بية من زنودها " يا وحيدة ...ياخا طحت في المنداف مع ولد الڨايد "
هبطت راسها حاشمة " عندك حق ماتعرفش ايلي هو يرى فيا كطفل كيفي كيفو "
" مالا اعطيه فرصة ...ونحي عليك ها الحكاية متاع التنكر والاكاديمية ...خليه يراك حذامي المرا...خلي يرى زينك وحلاوتك ...وقتها احكم "
مجرد الفكرة انها مرا مزيانة في عينيه خلات وجها يحمار وعينيها تلمع ...آش خص كان يحبها حتى شوية ...اما موش كراجل يخدم معاه ...كمرا ...قص على حديثهم الحلو صوت ساقين تجري خلاهم يشنڨو روسهم ناحية الباب ،الحق ماعرفوش منين ولاشكون ، هاكي علاه قعدو يخزرو على اجنابهم لعل يعرفو شنية السبة ...شهقت حذامي وقت لقاتو عمر...اخر حاجة تخيلتها هي انها تراه فم ...على اساس كان هي جات للكازينو وتعرف البلاصة.
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Pertualangan⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
