مشات خطوات لقدام قاصدة جمع النساء ايلي كانت في وسطهم بعد ماخلت بوها واسينات مع بعضهم لعل فمة حديث خاص يتحكى بيناتهم وهي كبيرة وتفهم ...لكن قبل ماتوصللهم جبدها يوسف من ذراعها وكركرها وراه ...خباها بحصانو وهو يتبسم فرحان ...خزرتلو من فوق للوطة ...اعترفت بينها وبين روحها انو حتى زي الفرسان واتاه وزاد في وهرتو ...ركح شاشو على راسو وعدى صوابعو على حزام الكرطوش في وسطو بمعنى شقولك مواتيني ؟!...ضحكت عليه وهي فاهمة وين يحب يوصل " ايلي يراك يقول فارس من صغرتك "
محمح بغرور ونفخ صدرو " مانحبش نحكي على روحي ...اما ...بالحق ...انا فارس من صغرتي "
زمت شفايفها ومهمهت بمعنى يزي من كذبك ...تهز صدرو بلهيث خافت ...وحط عينيه في عينيها ...لثواني قعدو يخزرو لبعضهم وقلوبهم تخض بقوة ومن غير ماتعيى ...حشمت وحمارو خدودها ...محمحت وهي تدزو خطوة لتالي " ماكش باش تقول شي قبل ...ماتمشي "
مال عليها وقرب وجهو من وجها وخلى صوتو همس "نحبك ...نعشقك...نفنى بيك ...وعليك..."
دزتو مرة اخرى وهي تخزر شافهمش حد " فاش تعمل ؟! ...الناس الكل يخزرو...عيب "
تبسم وذابت عينيه محبة " الحب موش عيب...وانا عشقتك وفات العشق حدو ...شريتك ومازلت ناوي نشريك...سومك غالي ولازم ندفع دم باش نشريك..."
كلامو ...فرحها ...خلى قلبها يدق اكثر ،تمتمت وهي معادش متحكمة في مشاعرها ...هي زادا تحبو....وبارشا...اكثر من اي حد ...موش...عارفة تعترفلو بحبها وتصبرو والا ...تصبر هي وتستنى رجوعو ...
وهو يحكي مع اسينات ويوصي فيها ...لوج بعينيه على بنتو ...قبل مايمشي لازم يعاود يعنقها ويبوسها ويوصيها بدورها على اسينات وعلى حالها ...من الاول ماشافهاش ...لكن فيسع ماعينو لقطتها مع يوسف....حس بالنار تغلي في راسو ...بعد اسينات من قدامو وبدى يمشي ناحيتهم وهو يحاول يهرول على قد ماينجم وتسمحلو جروحو ...خلطت عليه اسينات بعد مافهمت التاڨزة " محمود....بنتك كبيرة وتعرف ...والزوز يحبو بعضهم "
صر سنونو بغل " مالقى من البنات كان بنتي انا باش يحبها...الا مانسفرلو بروحو "
من الظاهر انو صيفتو كبو وحزارتو ظهرت وتفكرها وقتها ...مانجمش يعدي الفازة ويعمل روحو ماشافش ..
وساعت عين حذامي وهي ترى فيه جاي ووجهو مقلوب مايبشرش بالخير...خزرت ليوسف لقاتو مازال يستنى فيها باش تصارحو هي زادا بمحبتها ...
وشوشتلو " يوسف"
زاد قلبو غرق اكثر " عيووون يوسف ..."
صرت سنونها بغلبة " يوسسسسف "
تنهد من اعماقو " قلب يوووسف ..."
مالقات كان حل واحد...ضربت ركبتو بساقها " بابا جااااي "
نسى وجيعة ركبتو بالوقت و خزر وراه لقى الكابيتان خطوتين ويوصلو ...طول شدلها يدها وكبس عليها " اذا قتلني... ماتنساش اني حبيتك من قلبي وانك احلى حاجة صارتلي في ..."
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Aventura⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
