شوفتو في هاك البلاصة خلت قلوبهم تطيح ... اذا هو بشحمو ولحمو وموش جن يشبهلو فمعناها مشاو زيزي...تبخرو مع الريح وموش باش تقوملهم قايمة ...كمل خطوات اخرين لقدام وكيف ولى مقابلهم وقف ...عقد ذراعاتو وراه ...هز راسو لفوق بكل ثقة وخزر في عينين كل واحد بكل برودة دم...هاذي بالذات علامة انو ايلي جاي باش يكون جهنم على حالو ...
تمتمت حذامي بصدمة "كابيتااااان محمووود!! "
وقت سمع حروف اسمو ڨحرلها "وي ...كابيتان ...محمود "
خزرو لبعضهم وكل واحد يلوج في تفسير من عند خوه ...كل شي تشربك في بعضو وماعادو فاهمين شي ...بدى يمشي ويجي قدامهم والبرتكان متاعو يغطس و يطلع في الطين "على اساس مع الفجر نلقى الناس الكل تستنى بحذا الكماين ...اما الشمس طلعت و ريحتكم مافماش....ظاهرلي ايلي وخركم مشكلة كبيرة ....اه...شقال صيااااد "
وساعت عين صياد برعب ...هذا ماينطق بكلمة كان مايوزنها ويعرف قيمتها ومادام لمحلو هكا فهو يعرف كل شي .
وقف محمود قدام طاهر ايلي باش يموت من الرعب....مال فوقو و شدو من كتفو ...جبدو لقدام بقوة " طاهر مثلا باش يحكيلي ع المشكلة ايلي وخرتكم "
عض نصر شفايفو بخيبة امل ...طاهر على اول كف باش يقول اش صار و بالتفصيل زادا وكان لزم يهزو للقبر ...خزرلو بشطر عين لقاه يفبري بكلو ويديه متيبسة على الزي متاعو ...شفايفو زرقة من البرد وترعش من الخوف ...صاح عليه محمود " أااااااانطق "
رجع يبكي و تكمش على روحو موش حاب يخزر في عينين محمود ايلي عاود صاح " قلي شنوة ايلي وخركم "
تلعثم "ش....ش....ش...شي "
هز محمود حاجب بحاجب " شي !؟...كيفاش شي واصحابكم توا قريب يوصلو للاكاديمية وانتوما تتشخلعو في ااجبل..ماهيش حابة تدخل راسي "
طاهر " ك....ك......ض...ضعنا في الطريق "
غرس ظوافرو في وجهو وجبدو ليه ...وجهو قريب من وجهو ...النفس متاعو سخون لسع وجه طاهر البارد " رد بالك تكذب والا باش نقتلك هوني وقدام عينيهم ...هيا انططططق "
طاهر برعب " ض....ضعنا ...كابيتان "
تحداه محمود "انتوما ماضعتوش ماتكذبش "
رعشت شفايفو وشد صحيح في كذبتو " ضعنااااا ...كابيتان "
ها الطفل الصغير البكاي طلع راجل ويتعمل عليه ...فرحة صغيرة دخلت قلبها في وسط ها الخوف ...ماتصورتهوش يكون كاسح ويواجه محمود من غير ما يقول حتى كلمة ويفضحهم الكل .
ضم محمود شفايفو لبعضهم وخزرلو في عينيه الباكية ...لحظات صعيبة تعدو عليه وهو بين يديه ...وماصدق لربي كان كي دزو بعدو عليه ...شد روحو باش مايجيش على وجهو ودنكس راسو بين اكتافو ورجع يكمش في زيو بين صوابعو ...اذا طاهر كان بڨلبو فهوما زادا لازم يكونو كيفو ...كل واحد خذى قرار بينو وبين روحو مايحكي شي ويشد في كلام صاحبهم ...هوما ضاعو واكاهاو ....اما الكابيتان كان مهف عليهم ...وايلي قاريه الثعلب حافظو الذيب هاكي علاه جبدلهم الدوسيات الكل وفرشها
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Adventure⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
