🌺حب تحت حكم الفلاڨة🌺
🌿✴✴🌿
✴تونس 1948✴
العين ماها ثجاج ..وحر الصيف صهد وجهو و زاد غمق سمورية ساعدو...طبس يملى في كفوفو يروي عطشو و يخفف الشهيلي عليه ...غسل اطرافو ووجهو ...بل شعرو و تلذذ بماه وهو يقطر على رقبتو ...غرف من جديد عبى كفوفو باش يشرب لكن حصانو رفس التراب وراه و اختار المسرب القريب باش يجري فيه... ماهيش عادتو وبعمرو مافلت من يدو وتمرد ...خلط وراه يجري فماش ما يشدو ويكبس لجامو ...لكن الجواد عربي حر ...مايتشدش ...جرى وراه لين عيى ...وقف يتفرج فيه مأيس ...واحد من المجاهدين وسلاحو على كتفو وقايد كبير...موش معقول يدخل بهاك الحالة للدوار....شافو ياقف قريب لفرس بيضاء ترعى في ماتبقى من السبولة بعد الحصاد...يعني حتى الهايشة لقات حبيبة وتمردت باش توصللها ...وقعد كان هو دافن حب حذامي في قلبو ...ومغرقو بين ضلوعو ...كل ما يضيڨ خاطرو وتجي لبالو يتفكر ولد الشادلي والموت ايلي منعو منو اكثر من مرة .
جرى ناحيتو ...لعل وهو غافل يغازل في الفرسة يغفلو و يشد لجامو ويرجعو معاه للجبل ...خطيوات خفاف و ماقعد بيناتهم كان مسافة صغيرة ...تخضت ضلوعو بصوت مرا وراء" ڨدم خطوة وحدة اخرى ...نسيح دمك من غير ندم "
غمض عينو بقلة صبر...ومط شفايفو بضيق...مازال على طرف الدوار وصار هكا !...همزتو بالفاس في ظهرو " انزع حزام الكرطوش وارمي سلاحك ..."
لا اراديا ضحك...الفلاڨ يموت و مايرميش سلاحو ...ويسيح دمو وما يعطيش رصاصتو ...الرصاصة بحسابها ...وجاية من الابعاد ...وعباد ماتت وصغار تيتمت باش توصلو ...وتجي هي بفاس فلاحة تخوفو وتهددو بحياتو .
كلمها وهو مازال عاطيها بالظهر " طيش من يدك الفاس ...الفارس ماتاخذ منو سلاحو كان بعد موتو "
همزتو بقوة مانجمت تحركو كان شوية " جاي تسرق وتخطف وتسمي روحك فارس "
مرة اخرى يضحك ...اخرة اولاد الڨايد سراق!! ...هاذي بعمرو ماخمم فيها ...وزادا هاذي بعمرها ماباش تعطلو على الرجوع لرجالو ايلي يستنو فيه باش يرجعو ...دار بخفة خطف الفاس منها ...دورتو كانت قوية وموش متوقعة خلاتها تترهوج و على شوية تكبت على وجها ...لولا ذراعو القوي شد كتفها حست معاها انو بدنها الكل تخدر ....شهقت بخوف وايلي زاد من حالتها هي شوفة وجهو...عينيه الكحل مسو قلبها واكثر من الشهيلي لفح بشرتها حست بريحو تلفح ضلوعها...
قدامو ...كانت صبية ...عودها طري تحسسو بصوابعو القاسية...خصلاتها حرير هاربين من تحت غطاء راسها...اشفارها متصافين كيف الطيور على حافة عيونها...وقوتها ايلي كانت في صوتها في لحظة تبخرت وشاف الخوف ياخو بلاصتو في خزرتها .
بعد عليها شوية فماش ماتتنفس وتفهم انو موش ناوي ياذيها " حصاني شرد...والفرسة متاعك شغبتو ...جيت نرجع فيه موش نسرق فيك "
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Приключения⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
