🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )

🎪الفصل 21 : مولات السفساري ...شكون🎪

راسها يدور ويسطر تسطير بالوجيعة وكيف قامت من فرشها حست الدنيا الكل دارت بيها ،كبست نواظرها بكفوفها الصغار باش تنجم تركز شوية وتفهم اش قاعد يصير معاها ،غمضت عينيها ترجع في سيناريو ليلة لبارح ...او بالاحرى فضايح ليلة لبارح ...صرفڨت روحها بكف " ياغلبتك يا حذامي ...ياشومي ...ياناري ..."
كل شي عاودتو كلمة كلمة وحركة حركة ...يافضيحتها وياخيبتها ...كل شي صبتو ليوسف...حتى انها حبت توريه ماعندها باش يصدق ،وقفت وبدات تدادي في الشومبر ...الحمد الله كانت وحدها وهو موش موجود والا كانت دفنا روحها تحت الارض من الحشمة ...سلتت وجها وندبتو " مشيت فيها ...اذا وانا كراجل طمع فيا ...فمابالك مرا ...ليلة من الليالي الا مااا....ياااا شومي"
صونت في راسها كلماتو ايلي قالهملها ' نعرفك مرا ...وين الجديد في هذا "
عاودت صرفڨت روحها بكف اخر " ياربي صبرك ...كيفاش عرف !؟...واذا هو نجم يمكشفني فأكيد بارشا كشفوني ...وعلاش قعد ساكت ومافضحنيش !؟ ..يعطيني قصة في ها اللسان وبكشة ..."
أنبها عقلها كيفاش توصل بيها تذوق من الشراب المحرم ...يعني هي صحيح تقصت دور الراجل اما موش لها الدرجة "ياربي سامحني ...ياربي اغفرلي
..يااااربي والله ماكان قصدي ...والله عدوها علي ...." لمعت عينها بغل وقت تفكرت ايلي عداها عليها ...ناكر ونكير كيما سمتهم ...ماهيش حذامي بنت التونسي اذا ما رجعتش منهم ثارها.. الا ماتفرت عليهم كرشة وتفضحهم فضيحة كلبة ...غسلت حالتها وبدلت حوايجها وهبطت تجري في الدروج متحلفة في هاك الزويز ...قعدت تلوج عليهم لين لقاتهم واقفين في الساحة ومعاهم عبد الرحمان ،عمر ، راييس ....اول ماراها نصر شاخ ضحك وبدا يتمايل يقلد فيها " شاااااطح ...بااااطح "
قهقه اسماعيل وهو يقلد في صوتها الرقيق " انت ناااكر...وانت نكير "
عمر وحسب ماكانو يحكولو عليها مانجمش مايضحكش ،اما رايس فتبسم دوبلاش بالاخير هو صاحبو ايلي عرفو قبل الناس الكل وعيب يضحك عليه ...شوفتهم يضحكو وعاملينها كاراكوز زاد شعل نارها وخلاها تغلي غليان ...على اول ما وصلت تضرب نصر ببونية في وجهو طول ...الحق البونية كانت ماتوجعش اما نصر حسها اهانة كبير ليه خصوصي انها جاتو من فرخ كيف حاتم...
عقد حواجبو وهو يتلمس في بلاصة البونية " ياخا من كل عقلك تضربني "
حمار وجها وهبلت عليه هبلان " ايه نضربك ونزيد نضربك شنوة تستخايل روحك ياخا ...كيفاش تحطلي هاك السم وتتفاهم عليا انت والسخطة اسماعيل وتعملوني ضحكة "
نبهها اسماعيل وهو يقرب منها خطوة " اووه اوه ...اعرف اش تخرج من فمك يا خنثة "
حبسو نصر بيدو و قدم هو في بلاصتو " يافرخ ...وصلت بيك تمد ايدك على سيادك "
راييس حسها باش تنتن بيناتهم فحب يتدخل بالحسنى " نصر ...فك عليك ...بالاخير انتوما عملتولو عملة مزمرة هو و طاهؤ "
اما نصر معادش يفرز بين ايلي يجي وايلي مايجيش ،هز ساقو وجابهالها في كرشها طول ،الضربة كانت قوية خلتها تجي مفروشة على ظهرها ...توجعت وهي تحاول تقوم واول ما شدت روحها كمللها ببونية في عينها ،تفلق معاها خشمها بالدم "