🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )

🍀الفصل الرابع :تقابلنا ومن جديد 🍀

قبل ما يكمل محمود حديثو للبقية ...تسمع صوت تزمير متاع كرهبة (الكراهب القدم ايلي يبدوا البيباب متاعهم يتحلو العكس ومسكرين من فوق بحاجة كيف الباش المتين في هاك الوقت شكون وشكون يشراها  )...خزر للباب وين كان مسكر ...قعد يخزر لحظات للكرهبة ايلي تاقف بعيد عليه من بعد شاور بكفو للبواب باش يحل الباب ويخليه يدخل ...عقد محمود ذراعاتو لتالي وهز راسو بكل ثقة وهو يشوف في طفل صغير يا دوبك يعمل العشرين في عمرو ...وجهو ضاوي يحكي قداش هو مدلل ...لابس  كبوط  كوير يوصل لركبتو  وتحتها شوميزة بيضاء وفوقها بدعية كوير...صباطو نوار مسكر حد الكعبة ويلمع لمعان ...شافو يهز يديه لفوق وهو حال فمو في الجموع ايلي قدامو ..قرب منو وهو يتبسم "يظهرلي جيت روتار "

ضيق عينو محمود "إسمك !؟ "

حط صبعو على صدرو "انا !؟ "

ضيق محمود عينو اكثر "علاه جبت معاك شواطنك زادا؟! "
ضحك وهو يبعد شعرو على عينيه "حلوة منك...صاحب نكتة  "

خذى نفس قوي وغمض عينو لحظات وصاااح "حل *****  فمك وتكلم شنوة اسمك "

الجماعة الكل لبدو  في بلاصتهم وترعبو من صوتو ..اما الطفل فنظف وذنيه بكل برودة دم  في علامة انو الصياح قلقو ...مشى خطوات ناحية محمود وجبدو من مرفقو ليه وهو يوشوشلو " خلينا نتفاهمو مع بعضنا ...انا لا عيني في اكاديمية ولا تدريب ...انا نخرج وانت تاخو قد ماتحب فلوس ...مصلحة مشتركة "غمزو وهو يتبسم .

بحلق فيه محمود للحظات ومن بعد جبد مرفقو من عندو بالشوية ...هندم لبستو وركح الحزام ايلي على وسطو ومن بعد وخر خطوتين لتالي والطفل يثبت فيه موش فاهم ..خزر محمود للجنود ايلي وراه" علقوه "

شهق وهو موش مصدق "يعلقوني !؟ "

جراولو تلاثة جنود وكل واحد شدو من يد والثالث جبد حبل  واحل في الحيط و قرب منو ...صاح "يااا....انا يوسف شيشان ....يوسف ....ولد الشادلي ..."

ربطلو الجندي يديه الزوز مع بعضهم والاخرين فكسوه باش مايتحركش وهو يحتج "ياخا واعين فيلي تعملو فيه ...ولد الشادلي شيشان  ..."

تجبد الحبل وتعلق هو من يديه وقعدت ساقيه بين هواء وفضاء"هبطووووووني ....هبطوووووني "

عاود محمود قرب  منو وهو مازال مضيق عينو "ماكش خارج من الاكاديمية ....موش كي تكون ولد الشادلي ...حتى لو كنت ولد الباي "

وجه كلامو للجنود الاخرين " هبطوه كيف يطيح الليل"

صاح "لااااا...هبطوووني تواااا ...نحكي معاااااكم راااو "

لا حد عبرو ولا سمعو ولا حتى خزرلو قعد يتدرجح غادي وجاي وهو ينطط في ساقيه ويصيح لعل يهبطوه ...رجع محمود لوين كانو البقية واقفين يستنو فيه مع دبشهم ، تنهد وهو يخزر كل مرة في عينين واحد " انتوما توا باش تمشاو لاول بيرو ع اليمين ...كل واحد فيكم ياخو  الزي متاعو ...لوازمو ...و مفتاح الشومبر متاعو ومايحاسبنا بيه كان بعد عامين ...اي حاجة تصير فيها هو مسؤول عليها ...يلا واحد وراء واحد ...بالصف ...نحب النظام  وكلمة مانحبش نسمعها حتى لو كانت توشويشة "
                🌸🌹🌹🌹🌹🌸