🌺حب تحت حكم الفلاڨة🌺
☁☁💚☁☁
كل شي واقف ...الحصنة والفرسان ...محفل كامل حابس ..يستنى في الخبر يوصل ...يا خير ...يا شر ...ولكل الفرضيات هو محضر روحو ...واذا صدق وبنتو تمست منها شعرة ...الرحمة يدفنها في الطبقة السابعة للارض ...مابين شي للبقية...ملامح العادة ايلي ماتفهم منها ...عينين الذيب ضيقة تستنى في حد يطل ...صوت ركيض حصان خلى القلوب تهيض وتخض ...ياساتر ع الخبر ...وصل يوسف الاول وبعدو ابراهيم بلحظات ...تقول متفاهمين ع الوقت ...اول ماشافو الدم والتراب على دبش العريس خافو ...عرضو طاهر يجري ووراه راييس ايلي سألو " واش صار ها يوسف "
تبسم ببرود ...وشيع عينو لمحمود " نكملو ثنيتنا ...شوية دود ورجعناه للحفر "
ضرب اسماعيل كتفو " ماتخممش ...جبتلك كسوة جديدة ...كنت مخليها ضمانة اذا توسختلك الاولى "
شد محمود لجام حصانو ونخزو باش يتحرك " هيا خفو...الليل قريب يطيح ...والعرس يستنى "
تعدى جنب يوسف وخزراتو كانت فيهم نوع من المشاعر المخلطة ...مشاعر المعلم للتلميذ ...مشاعر القايد للجندي ...مشاعر البو ...للولد...لا فرسانو سالو اش صار ...ولا يوسف قال شنوة السبة ...ولا ابراهيم تباهى ...قالها سيرو ...سارو ...كلمة لا ...وهوما اصلا مشاو وراء محمود بعين عمياء وفم ساكت من قبل موش من تو .
☁☁💚☁☁
تزغريطة طويييلة وعريضة تسمعت من وسط الحوش وزغرطت النسوة من وراها ...ضرب ااطبال و ضرب البارود في السماء ضوى مع نجوم الليل ...شطحت النساء بمحارمها وتمايلت الرجال حافلة ...الزكرة واصل صوتها لاخر الدوار ...والفرحة زادت بعد ماسمعو ايلي صار لعسكر فرانسا ...مخطت بية لين شبعت ...وقعدت حذامي تسكت فيها " يابنتي والله مابيا شي ...هاك ترى ...راني عظم صحيح ومتدربة عند محمود "
مسحت خدودها بكفها واكتافها تتهز وتتحط " لكلو جرايري ...وثقت في هاك البومة ...وقلتلها تقعد جنبك "
ضحكت حذامي وادككت عليها " اممم...قول تبكي خاطر انت زادا تحب تعرس ...هاااه "
ضحكت من بين دموعها وحذامي مدت كفوفها مسحتلها خدودها " هيا عاااد...زغرطيلي "
"ما...نعرفش نزغرط ...."
"اتو نعلمك ...." حطت يدها فوق فمها وعطاتها صيفة زغروطة خلت بية باهتة فيها " يابنتي عيب العروسة تزغرط "
دوحت بيدها " وموش عيب العروسة تعرس وراسها مجروح "
ضحكو الزوز و هوما يدزو في اكتاف بعضهم...دخلت سعدية عليهم كيف الجن ...مستلبسة " انت ...يا بنت العاصمة حركي روحك وايجي هزي التاي للرجال ..."
دخلت يدها في مرفق حذامي وحطت راسها على كتفها " مدام اسينات قتلي من جنبها ما نقومش "
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Aventure⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
