عملتلها حاجة خفافي لف لف وحطتلها تفطر و زيد غطست معاها من فوق ، ڨحرتلها حذامي على جنب وحنكها منفوخ معبيتو بالماكلة " ياخا طامعة في طرف العجة متاعي؟! "
مسحت بية وجها من الرذاذ ايلي جاء على وجها " تي ابلع وبعد تكلم ...بالرسمي ها الذري فسدوك ...نسوك حتى في انوثتك ...يابنتي راك مرا ...شوية فيانة بعيشك "
كملت سيبت بلادتها وهي تحط ڨدمة خبز في فمها " سامحني فيانة هاذي تتاكل بالخبز والا بلاش "
ضحكت على الريق متاعها "لا انت ضيعت طول ...قلي بربي ... اذا وليت ذكر ولد الڨايد كيفاش باش يخزرلك تره ؟!"
بلعت ايلي في فمها وتكلمت بكل جدية " معادش تفكرني فيه ...شهر كامل مطيشين في الجبل يحكي معايا بعشرة وافي ...تقول يكرهني الراجل وموش طايق يخزر في عيني ...مافهمتش من انا طينة ...تي راهو بااارد سارد تقول بوه الشتاء وامو الخريف ..."
زمت بية شفايفها بتفكير " اممم ...زعمة ...موش طايح في حبك درباني مع هاك الفرنساوية جوليات !؟ "
عوجت حذامي فمها " منين جبتها جوليات هاذي ...اسمها برنادات ...ومايحبهاش"
"وشكون قالك "
نزلت على سنونها " انا نقول والا كلمتي ماتمشيش !؟ "
ضحكت بية " تمشي مالا لا ...وكان لزم نشوشطوها ها جوليات هاذي "
"وووه على بابا وعلى رقبتو ...برنااادات ...موش جوليات "
"تي ايلي هي ..." محمحت وحاولت ماتشلقش على روحها " و...هاك الخواف شنوة عمل ...هرب كي العرب "
لحست ايلي بقى في الصحن بڨدمة خبز " اناهو من الخوافة ...عندنا بارشا منهم "
"هاااكي ...ايلي اسمو ...عمر "
"اه....عميراتو ...بالعكس رجال ...تحمل الدهك وماتشكاش "
قلبها زادت دقاتو وماتعرفش علاش فرحت كي سمعتها تشكر فيه...نبها عقلها ،بجدها بدات تتعلق بيه ؟!...صرت سنونها و هربت من عينين حذامي ايلي وساعو على كبرهم وحبست ع المضغان " جحشة ...تقليش ....ايلي في بالي ؟!"
عملت روحها مافيبالها بشي" ش...شنوة ايلي في بالك ؟!"
"عاجبك عمر ؟!!!!"
وقفت "لا لا..لا لا ...وه...ياخا هبلت !!!..."
قرصتها حذامي من زنودها " اخزرلي هوني ..."
رمشت بشوافرها متوترة وقررت تحكي ايلي في قلبها " ما ...مانعرفش " عاودت قعدت " هو قال كلمة بتفذليك وانا كيف البوهالية سرحت بخيالي ...ومافقت كان بروحي نخمم فيه ليل ونهار ...وكي خدمتها في مخي لقيتو طفل نظيف ويهبل وياسر دافي وحدو وحدو دخل لقلبي ...اما ...واحد كيفو هو ومن عايلة كبيرة باش يخزر لطفلة كيفي انا !"
تنهدت بوجيعة " آه ه ...الدنيا سعود وانا سعدي مكبوب من اولو "
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Adventure⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
