🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )

💜الفصل 62 : حرب 💜

صحيح اغلبية الجنود كانو في وسط الساحة رهائن لكن بقاو كعبات نجمو يهربو  في غفلة ...وبحكم البيبان كانت مسكرة مانجموش يخرجو اضطرو يتخبو في التراكن ايلي تعرضهم  على امل يلقاو حل ...لكن الصيادة كانو معملين يصطادوهم الواحد وراء الواحد    ... تفرق عمر و عبد الرحمان  في جيهات معاكسة بعد ما ربطو الجنود ووزعو سلاحهم على بقية الضباط ايلي ماعندهم كان فرد صغير ...قلوبهم كانت تخض بقوة باحساس مخلي بدوناتهم خفيفة  وروحهم تجنح بالفرحة ...ممكن هاكي المرة الاولى يفهمو ويطعمو معنى تكون حامي للوطن .

جرى يوسف على طول الطريق وسلاحو في يدو معبي برصاصو حاضر ...بينو وبين مانويل قصة طويلة وعريضة ومليانة سلف ورد دين ...صحيح وجيعة فراق بوه زادت وسيطرت عليه لكن جاء الوقت باش ياخو حقو وحق الناس ايلي ظلمها و قسملهم قلوبهم .

ابراهيم كان مع خطوة يمشيها ،يخلي عينيه تمسح البلاصة مسحان مالازمش يفوتو حتى تفصيل صغير ...الاكاديمية تحت تصرفهم ...اما زادا اي غلطة واي غفلة تنجم تقلب كل شي وبالنسبة ليه هو المسؤول الاول على ارواح بقية الضباط ومايحبش يزيد يخسر ارواح ..

مانويل كان يكركر في بنتو وراه وهو يجري بالجهد ايلي نجمو ...تسلسب بين الشجر المغروس و طول نادى بالباب ايلي من المفروض يلقى وراه جنودو ...بدل رايو كيف شاف نصر و اسماعيل سابقينو لغادي ،خطف الدورة نيتو يهرب من الجيهة الاخرى وايلي زادا  توقع يلقى  اتباعو ...لكن حتى ثنيتو هاكي لقى فيها ضباط متدربين ...في صفوف منظمة ...اول مايراوه ومن غير مايخممو يقتلوه هو وبنتو ...بنتو ايلي ماعندوش حل غير انو يخبيها في اي تركينة حماية ليها حتى لين يلقى حل انسب ...مسد شعرها وحاول يهديها (لغة فرنسية ) "مزيانتي ...ماانجمش نغامر بيك ...استناني هوني ...نشوف مخرج لينا ونرجعلك ...ماتخافش "

دموعها هابطة بلا حساب و اطرافها يرعشو وموش منجمة تتحكم فيهم ...شافتو يبعد ويغيب عليها وراء الحيوط العالية ...خزرت على اجنابها مرعوبة لا حد يظهرلها من بعض البلايص وهي لا قدرة عندها باش تدافع على روحها  ولا قلب يقاوم الخوف .

جرى يوسف محاذي الحيط العالي وسلاحو سابقو محضر روحو لاي حاجة تجيه على غفلة. ...مع دقة قلبو ايلي مامانتش كي العادة وبدنو الكل معاها سخن ولى عرقو  البارد يقطر من جبينو ...عرف انو ايلي المواجهة قربت ...وبالضبط ...وكيف ماتوقع ...ظهر مانويل وهو يلهث  ويتلفت يمين ويسار ...وخر خطوتين وضرب رصاصة وقت لمح يوسف ورجع تخبى لتالي ....تهز صدرو وتحط بانفاس سخونة متلاحقة ...معقول ضابط بقيمتو هو يخاف من ضابط اصغر منو ...لكن الوضع موش رتب عسكرية انما انتماء وحب للوطن ...طل براسو ولوج بعينيه عليه ...مالقى حتى اثر ليه ...وين مشى زعمة ؟! ...ممكن هذا كمين عاملهولو وهو مالازمش يخرج من تركينتو المخبي فيها  ويحصل ...لازم يخمم في حل اخر ...صوت ساقين تهبط ع الارض  من وراه ...تغبرها ويحس برجها تحتو  مع التنڨيزة والهبطة ايلي هبطها صاحبها ...دار كيف المجنون و صوابعو مانجمتش تنزل ع الزناد مليح هاكي علاه رصاصتو مشات مع الريح ...وقعد وجه لوجه مع عدوو ...رمشت عينيه وحاول مايبينش خوفو
" هذا اسمو خيانة ...وفرانسا موش باش تسامحكم "