كمل آخر عقدة من البرتكان متاعو سكرها ووقف ...دور عينيه في الشومبر يتفقد فيها ...مااخيبها وموحشها بلا بيها ...تنهد وقدم ناحية الزي متاعها المعلق ...مد يدو لقماشو وتحسسو برقة ...تبسم وهو يعدي صوابعو على رقبتو ...تمنى لو جات معاه وواقفة قدامو ...كان خذى منها ومن عينيها زادو وزوادو ...تنهد من اعماقو ودار ناحية الباب خارج
♥❇♥
عينيه مرشوقة في السماء ...يتفقد في نجومها ويحسب في سحابها ...ها الليلة مااحلاها ...ومااحلى نسمتها ...ماالطفها وماالطف ڨمرتها ...خذى هواء مالي رواريه وخزر لحيوط الاكاديمية العالية ...على قد ماهي واسعة على قد ماتضيق بيه ...كل نفس ياخذو حرام وكيف السم يمشي في عروقو مادام بوه في هاك الزنزانة مسجون حد مايدخلو وحد مايراه ...نفخ بقوة وهو يهبط الدروج ويدو تكبس في السبتة ايلي على حزامو .
♥❇♥
تلمس خدها الطري وعينيه ذايبة محبة وعشق فيها ...حتى وهي راقد ماخذة عقلو ...شكون قال ...الغزالة ايلي قتلتو بعيونها هي مرتو وحلالو تو وهو قاعد يتفرج في وجها السمح ويقيس في رموشها الطوال ...باس جبينها وخدها وهي تململت في غطاوة نومها ...ربت على كتفها وقام من جنبها بالسياسة باش ماتفيقش ...قعد يثبت فيها لحظات ومن بعد قصد الباب وجبدو وراه وهو يخرج .
♥❇♥
خطوة وراء خطوة ...موزونة واثقة ...مشى على طول الكلوار وهو يخزر لساقيه...طافت بعقلو ذكريات صغرو ...في الدوار مع امو ...وين كانت تحصد القمح والشعير وهو يتبع في خطاها و يقلد في كلمتها ...سمع رنة صوتها وهي تناديلو وذراعها يمسح في عرق جبينها "رايييييييس !! آراااااح "
تبان ضحكة تضوي وجهو ويجري لحضنها يتخبى "داااادا ...وعلاش سميتيني راييس(رئيس) ...يما ذري الدوار يضحكو عليا "
تمسح على شعرو وتظلل راسه بمحرمتها "الراييس هو سيد الناس وزعيمهم ...ونايا سميتك راييس نحبك تكبر ليا وتولي سيد الذري لها الدوار "
يتحمس وتلمعت عيونو "وكيفاش ا دادا "
كفوف يدها خشان ومافيهم طرف ليونة لكن على وجهو كانو رقاق وحنان "راييس الناس يكون فطين وذراعه هي لسانه ..." ضربت بساقها تراب الارض القاسية " يضرب أقدامها ع الارض يطلع ڨمحة وشعيرة ...يطرڨ المية ...من بعيد يبان وعلى ڨريب يتهاب ...كلامه كلمة وحدة مايعيدش بعدها "
يخزر بكل براءة للارض ااجافة " ا دادا الارض ڨاسية ...كيفاش نخرج ڨمحها وماها "
تبسمت وضمتو لصدرها "اسڨيها بعرڨك ودمك وماتبخلش عليها ...وهي تخرجلك الياڨوت "
غمض عينيه واستحلى نسمة الليل ...لوهلة حس انو ريحة امو تحوم فم ...ياريتك حذايا ها يما ...وحشي ليك زاد على مابيا ...وقتاش نلاڨيك ونشوف خيالك ...حتى من بعيد .
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Приключения⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
