🌺حب تحت حكم الفلاڨة🌺
💚🌿🌿💚
واد الحجر كان جرجوف كبير ...محجر وصخرو قاسي بارشا ...لكن قسوتو كانت جنة وبلسم على كفوف ايلي كانت طالعة فيه ووراها البنات والرجال ايلي قررو يمشو معاها لدعم الثوار...بدلت خطوتها بصعوبة تلوج بين اكوام الحجر لعل تلقى بلاصة لساقها تحطها عليها ...كبشت بكفوفها وهي تطلع شوية شوية لراس الجرجوف ...جهدها ...وبنيتها موش كيف قبل ...ذراعها ولى ابخل ومعادش اسينات ايلي في عمر التلاثين ...هزت راسها خزرت لفوق ...لازمها قوة اكبر...ماعاد ايلي عاد وتوصل ...خزرت وراها ...لقات روحها سابقة ايلي معاها ...وراها حذامي ...وفاطمة ...بية وشادية وزوز بنات اخرين كانو طالعين بعدهم و الرجال وراهم حامين ظهورهم ...
تعبت اسينات ومعادش نفسها يكفي تزيد تطلع ...لكن مجبورة ...صوت الكرطوش في الجبل زاد شجعها تكمل ...صرت سنونها وصاحت تقوي في روحها ...لكن ...للحق ...معادش تنجم تزيد تطلع ...خزرت بعين دامعة لفوق ...وخزرت لوطة بحصرة ...طلعت بارشا ...ظلم لو تحبس فم وهي قريب تشرب من العين ...وقت عاودت خزرت لفوق...شافت ذراع طويلة ...خشينة وقاسية تتمدلها ....رمشت فيسع لعل تشيح هاك الدموع العالقة بجفونها وتوضاح التصويرة قدامها...قابلها راجل جنش ،شعرو طويل مكبوس عليه بشاش اكحل من الصوف ...حرك ذراعو و فرق صوابعو اكثر فماش ما يحثها تاثق فيه...من هيئتو و لبستو وسلاحو ايلي معلق على ظهرو فهمت انو تابع الفرسان ...نزلت بقوة بساقيها ومدت صوابعها الرقيقة ايلي تجرحت وتزلعت كفوفها ...كبس بقوة على معصمها ...وبجبدة وحدة طلعها لفوق ...
تحركو رجالو بعدو وبداو يعاونو في البقية باش يطلعو الجرجوف ...ماخذاتش منهم الحكاية بارشا وقت ، يدية يدية لين طلعو الكل وماقعد حتى واحد منهم في قلب الواد ...تلمو وراء اسينات ايلي وقفت مقابلة هاك الراجل الطويل وسوطو بين صوابعو يتدلى ،شكرتو وسألت عليه وعلى صيفتو من غير ماتذكر محمود ولا تجيب سيرتو ..تخاف تكون طاحت في كمين وتطيحو معاها...ضيق عينو وخزر لفاطمة من دون الناس الكل ...قعد مثبت فيها وهو يجاوب بصوت واطي مبحوح " واحد باب الله هزتو الارياح ورماتو في ها البر "
خزرت لرجالو وقرت في وجوهم القوة والخبرة و الذكاء ...وفهمت من جوابو انو موش حاب يحكي شي على روحو ...قبل ماتزيد تسأل أكثر دوت اعلى الجبل قنابل حسو بصوتها قريب منهم وكاينها ضربت بحذاهم ...خزرت للبنات ولمتهم باشارة من يدها " خلونا نمشو ...الدقيقة بحسابها هيا "
تبعوها من غير حتى كلمة ...وقبل ما تتحرك فاطمة وقف قدامها هاك الراجل سد عليها الثنية ، خافت ووخرت خطوة لتالي وتحفزت بية وحذامي ،اذا تجرأ وضرها يتخرب ظهرو ايلي مقابلهم بالكرطوش ...لكن هو ماعلى بالو ...اضطر يقوس ظهرو شوية باش يوصللها"كيفاش الحال مع الحصنة ..."
وساعت عينها موش مصدقة وخزرتلو من فوق للوطة " ماتڨولش ليا انت...مولاااهم ؟! "
تبسم على جنب ونحى حزام كرطوشو علقهولها في وسطها ...مسد بكفو الخشينة على كتفها " يكفي تنادي يا بكير ...وانا نجيك حتى من اخر الدنيا "
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Adventure⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
