كل كلمة قالها كانت جمرة حرقت روح ضباطو ...فهمو و استطعمو كل حرف قالو ...لا اراديا كانت دموعهم هابطة سكابة ...ومع كلمة تحيا تونس ترجت قلوبهم...تقشعر بدنهم وسرى فيه احساس خلى اطرافهم تتنفض ...
بالنسبة لمانويل الكلام كان اهانة عظيمة خاصة قدام بنتو وقدام بقية الضباط...صر سنونو وهز يدو في اشارة للمسؤولين على اعدامو باش يستعدو وياخذو وضعية التصويب ...
غمض محمود عينو واستنى منيتو ...بصدر واسع و بفخر..عارف انو هاكي نهايتو وعارف ايلي عينين بنتو مرشوقة فيه وباش تبكي دم من بعدو ...لكن الشهادة دين الرجال ....
الظالم موش ديما رابح ...وصوت المظلوم على طول اقرب لربي ...خزرت لابراهيم الواقف بجنبها وبدورو خزر ليوسف ...في ثانية تحكى كل شي بعينيهم ...صاحو فرد صوت ويديهم تجبد فرودتهم من تحت زيهم "
"تحيااااااا توووووونس "
"اللـــــــه أكـبـــــر "
"يحياااااا الوطـــــن "
كانت ...من لحظات الخيال ايلي ماجربش يعيشها قبل ...اسم البلاد تترج بيه حيوط الاكاديمية ...دم الشباب يفور ويصيح باسم الوطن وباسم ايلي خلق الوطن ...وساعت عينو وهو يشوف في ضباطو يمشو اكبر واعظم واشجع خطوة ...التمرد ضد الظلم وضد الاستعمار ...
مع صوتهم دوت زوز رصاصات متلاحقات ...صابت زوز الجنود ايلي كانو من المفروض باش ينفذو الاعدام ...جبد مانويل سلاحو وغطى بنتو وهو يخزر للسطح ....كان متوقع القناصة ايلي موجودين فم من جماعتو ...لكن موش عارف كيفاش تقلب كل شي ...وظهرو عديانو ...
مع صوتهم ...كل الموجودين في الصف الاول دارو وفي ثانية و بكل دقة جبدو الفرودة متاعهم وصابو الخمسة جنود ايلي وراهم ...صاح ابراهيم وهو يخطف سلاح جندي منهم ويرميه لحذامي "انت وطاهر احمو الكابيتان "
هذا ...ايلي حاجتها بيه ...تحمي قايدها...كبيرها...مثلها الاعلى ...وبوها ...بروحها ...بدمها ...ببارودها ...ماهمهاش الكرطوش ايلي يطاير في الهواء وجرات لمحمود ...خلط عليها طاهر و حاول يغطي ظهرها من الرصاص ...حاولت ماتمسش بلايص التعذيب والجروح وهي تجبدو وراها تبعدو من الساحة ...خيرت تركينة صغيرة تخبت فيها معاه هي وطاهر وشيعت عينيها للساحة وين كانت تموج بالعسكر ...حرب صغيرة لخصت حرب العالم الكبيرة ....زوز متشابكين ...ماتعرفش الغلبة لشكون باش تكون ...خزرت ع اليمين شافت الضباط ايلي مع مانويل يهربو من الباب الموجود من الجهة هاكي ...تمنت لو كانت تنجم تخلط عليهم ...لكن اوامر ابراهيم واضحة ...'حد مايعمل حاجة من راسو '...هبط طاهر على ركايبو وقعد يستنى في اول راس يقرب باش يضرب كرطوشتو ...معادش للخوف مكان...ليوم...يا يفكو حريتهم....يا يخسرو حياتهم ...
✴✴✴
معادش رجوع ...وصلو لنقطة ماينجموش يوخرو فيها ولا يحبسو على بلاصتهم ...شبر سلاحو مع الفرنسيس وجه لوجه...وتحداهم برصاصاتو ...ووراه تصفف نصر ...اسماعيل ...عبد الرحمان ...يوسف ...وعمر ...على اجنابو الزوز بقية الضباط ...كلمة وتقالت ...لازم يكونو كثرة باش تكون عندهم الغلبة ....هو في تلاثة ايام نجم يلمد الكثرة ايلي حب عليها ...تحصرو الجنود الفرنسيس وطاحت قلوبهم خوف ورهبة من الشي ايلي ماشافوهوش قبل ...رصاص هابط عليهم من السطح كيف المطر ...محاوطين من يمينهم ويسارهم بصفوفو طويلة من الضباط ....قدامهم صيودة شمت ريحة الدم اخر حاجة يخممو فيها هي الموت ...
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Pertualangan⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
