ضحك عليها وعلى هبالها" كابيتان محمود يحكي هكا !؟"
خزرتلو على جنب "ايه ...ياخا بعمرك ماركزت معاه ؟!..."
قهقه وهو يدور راسو وراه يشوفش حد تبعهم ...اما ايلي راه خلاه ينڨز كيف المجنون ويتنطر بعيد " اااااااه ه ه "
فجعها وركبلها الرعب ،ولت حتى هي نڨزت وشدت في ذراعو بخوف وساقيها تتصكك ...خزرت وراها تشوف شفمة و تعرف شنوة سبة ها الحالة متاعو ...وعلى اول مارات ايلي واقف يخزرلهم بعين ضيقة خاصتها باش تڨدح بالنار حست بالدوخة تلعب عليها ومعدتها تعصرت وجاتها رغبة في الردان ..حتى الكلام مانجمتش تتكلم وقعدت تمهمه وحدها وهي مكبشة في يوسف ايلي جبد روحو منها وحاول ينفض ذراعاتها من عليه ... لصقت فيه وماحبتش تسيبو ...رغم ايلي يدز فيها عبارة مايعرفهاش ولا عمرو شافها ...قدم ناحيتهم خطوتين وهوما تحنطو على بلاصتهم ...لو جاهم عزرائيل وقتها ماكانوش خافو وتصدمو بهاك الطريقة
عوج فمو وڨحرلهم
"مالا الكابيتان محمود ...فرعون. .؟!."
شاورو بروسهم لاا فرد وقت وهو زاد قرب اكثر
" الكابيتان محمود ...حاط بوق في لسانو ...و عينيه تلهوس كيف الذيب؟!!!! "
تلعثم يوسف " حا ...حا....حاشااااك "
ضم شفايفو لبعضهم وخزر لحذامي من فوق للوطة " انا موش قتلك معادش تحط ساقك في ها الاكاديمية !؟ "
رمشت متوترة وخزرت ليوسف من تحت رموشها موش عارفة شتعمل واش تقول ، من شوية كانت تزهر كيف الصيد وتدز في صدرها وسمت روحها موسى وباش تحط حد لفرعون ...لكن وهي وجه لوجه معاه مانجمت تكون كان جرد جربوع اجرب يرعش خايف ...طرشق صوابعو بغل ومد يدو باش يجبدها ناحيتو وهي تكمشت على ذراع يوسف ولصقت عليها ...ولد الشادلي يسخايلو باش يضربها بكف والا بونية هاكي علاه خبالها وجها عندو وعرضلو ذراعو..اذا ضرب الضربة تجي فيه هو ...الحركة خلت محمود يزيد يعقد حواحبو اكثر واكثر ويڨحرلو بڨحرة خلاتو يبلع ريقو بخوف ويحاول يفهمو
" كا بيتا . ... ن ..انا ...وهو ...يعني ..."
جبدو من كول الزي متاعو قريب يكبو على وجهو " تحرك امشي لساحة التدريب "
شد ذراع حذامي وكبش فيه مليح وجبدها وراه وهم باش يمشي وكيف ايلي مافيبالو بشي ... لكن يد محمود رجعتها لبلاصتها وهو ينزل على سنونو بغل " وحدك....تمشي للساحة "
قعد يبحلق فيه بضياع وموش فاهم شنوة لازمو يعمل ...ماعطاهوش قلبو يخليها معاه فم ...وزيد كملت عليه هي بخزرتها التايهة والخايفة ايلي شواتو ...تلفتلها محمود ووقف قدامها بالضبط ماخلى مسافة كان للنفس
" بعمرو ماحد تجرأ وكسر كلمة محمود ...على اخر عمري تجي ..وحدة بنت امس وتتحداني وماتعملش لكلامي حساب ...تعرف شمعناها هذا ماو "
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Phiêu lưu⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
