على اول ركزة للكميون قدام الاكاديمية ركح فيه الكرطوش ،يمين ويسار بعد ما كان الجو هادي ماتسمعش فيه حتى رصاصة...بالعمل ايلي راكبين فيه مانجموش يهبطو وشطرهم ماتو على بلايصهم ...الشي ايلي خلى زوز الكماين الثانين يتفرقو وياخذو حذرهم ...تفرقو الجنود الفرنسيس منهم وكل واحد خذى بلاصتو ...طلت اسينات براسها واول مارات الكاسك الحديد على روسهم صرت سنونها ووشوشت ليلي بجنبها " هاذم مظليين ...يعني اذا مازربناش رواحنا باش تولي قصف بالطيارات ..." شاورتلو براسها للجيهة المقابلة " امشي مع الاخرين عاونهم اغلبيتهم مجاريح ..."
شبر سلاحو ناحية واحد من الفرنسيس عبارة ماسمعهاش وضرب رصاصتو جابو هو وعمرو من بعد خزرلها على جنب " سامحني مدام...على طول كنت نسمع اوامرك...لكن المرة هاذي ...سامحني...مهمتي اني نحميك وبايلي يصير مانخليكش وحدك..والرصاصة ايلي مقدرتلك ...انا ناخوها عليك ... "
نفخت بقلة صبر " انجم نحمي روحي .."خزرت وراها وين كانو الجنود الفرنسيس يمشو ويقربو "هيا امشي ماتضيعش الوقت "
عاود شبر سلاحو واصطاد واحد اخر " سامحني....هاذي اوامر الكابيتان "
وساعت عينيها وتالمون صوت الكرطوش قوي شكت انها سمعت بالغالط " شنوة قلت ؟!...شبيه الكابيتان ؟!"
هبطلها راسها لوطة باش ماينجموش يشوفوها " الكابيتان ...يعرف انك كبيرة عروڨ تونس"
حلت فمها ماردتو " يعرف ؟!!!"
زحف لين قربلها " ايه ...قبل عرسكم حتى ...هاكي علاه ولى يتعامل معانا وين ماتكون فمة عملية "
" كيفاش عرف ؟!..."
تبسم " انت على طول كنت قدام عينيه...وعلى طول كان حاميك من غير ماتشعر...هذا السر ايلي خبيتو عليك...ومهمتي كانت نحميك خصوصي لا تطيح تحت يدين ها المستعمرين ..."
حست انو قلبها رفرف وعمل جوانح...لا نهار حست انو بعرف حقيقتها ...لا نهار هي بينت انها تحارب في فرانسا كيفو ...الزوز كانو يعرفو انهم مقاومين وينادو بالحرية ..وكل واحد فيهم كان يعرف حقيقة الثاني ...لكن خيرو السكوت وربما هاكي كانت القوة ايلي زادت حبهم ...هبطت راسها تداري في دمعتها ...استحقت ثواني قليلة باش تخلي دموعها تجف ...نزلت على ركبتها وشبرت سلاحها ناحية الجنود وهي اتمتم
" معناها ...لازمني نليق بالكابيتان محمود "
مع اخر حرف خلت رصاصتها تصيب صدر جندي فرنساوي ...بخبرتها نجمت تعرف انو اعدادهم اضعاف ايلي قعدو معاها ...لكن لازم تقاوم حتى لين تجيهم امارة انو الوضع لداخل ماشي كيف ما يحبو ،وشوشت ليلي بجنبو
"اذا قعدنا هكا مفرقين بسهولة باش يقتلونا ...خلينا نتلمو الكعبات ايلي قعدو ونهجمو ...قبل ماواحد يموت فينا لازم يقتل ع الاقل واحد منهم "
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Aventura⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
